قر ساۋدا جانە ينتەگراتسيا مينيسترلىگى 2021 جىلعى 1 شىلدەدەن باستاپ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» قر كودەكسىنىڭ 110-بابى 2-تارماعىنىڭ 16-تارماقشاسى كۇشىنە ەنگەنىن ەسكە سالدى, دەپ حابارلايدى Egemen.kz.
اتالمىش زاڭ تالابى تەمەكى بۇيىمدارىن, ونىڭ ىشىندە قىزدىرىلاتىن تەمەكىسى بار بۇيىمداردى, كاليانعا ارنالعان تەمەكىنى, كاليان قوسپاسىن, تەمەكىنى قىزدىرۋعا ارنالعان جۇيەلەردى, ەلەكتروندىق تۇتىنۋ جۇيەلەرىن جانە ولارعا ارنالعان سۇيىقتىقتاردى (تەمەكى ونىمدەرى) ورنالاستىرىپ جانە اشىق كورسەتە وتىرىپ ساتۋعا تىيىم سالادى. مينيسترلىكتىڭ ءباسپاسوز قىزمەتىنىڭ حابارلاۋىنشا, ساۋدا جەلىلەرىندە زاڭنامانىڭ وسى نورمالارى جۇيەلى تۇردە بۇزىلادى.
«وسىعان بايلانىستى, ساۋدا مينيسترلىگى اكىمدىكتەرگە, سونداي-اق «اتامەكەن» قر ۇلتتىق كاسىپكەرلەر پالاتاسىنا, ساۋدا جەلىلەرى وداعىنا, ساۋدا كاسىپورىندارى مەن شاعىن ماركەتتەر قاۋىمداستىعىنا ساۋدا قىزمەتى سۋبەكتىلەرىنىڭ نازارىنا ءتۇسىندىرۋ اقپاراتىن جەتكىزۋ, سونداي-اق تەمەكى ونىمدەرىن ورنالاستىرۋ جانە ساتۋ كەزىندە زاڭنامانى بۇزۋعا جول بەرمەۋ ماقساتىندا قاجەتتى شارالار قابىلداۋ قاجەتتىلىگى تۋرالى حات جولدادى. سونىمەن بىرگە, تەمەكى ونىمدەرى تۋرالى اقپارات ساتىپ الۋشىلاردىڭ نازارىنا ءماتىنى ءبىر ساۋدا ورنىنا كولەمى 40ح30 سانتيمەتردەن اسپايتىن اق فوندا قارا ءتۇستى بىردەي مولشەردەگى ارىپتەرمەن ورىندالعان جانە قانداي دا ءبىر گرافيكالىق بەينەلەر مەن سۋرەتتەردى پايدالانباي ساتىلاتىن تەمەكى ونىمدەرىنىڭ باعاسىن كورسەتە وتىرىپ, الىپبيلىك تارتىپپەن جاسالعان ساتىلاتىن ءونىمنىڭ تىزبەسىن ورنالاستىرۋ ارقىلى جەتكىزىلەتىنىن قوسىمشا تۇسىندىرەمىز», دەلىنگەن حابارلامادا.
ساۋدا نىسانىندا ساتىپ الۋشىعا تەمەكى ءونىمىن كورسەتۋ, ساتىلاتىن تەمەكى ءونىمىنىڭ تىزبەسىمەن تانىسقاننان كەيىن ونىڭ تالاپ ەتۋى بويىنشا جۇزەگە اسىرىلۋى مۇمكىن.
سونداي-اق, اقپارات تۋرالى, تەمەكى جانە تەمەكى بۇيىمدارى تۋرالى, تەمەكى جانە تەمەكى بۇيىمدارىن ساتۋ جونىندەگى, سونداي-اق تەمەكى بۇيىمدارىن يميتاتسيالايتىن تاۋارلاردى, ونىڭ ىشىندە قىزدىرىلاتىن تەمەكىسى بار بۇيىمداردى ءوندىرۋ, ساتۋ جانە تاراتۋ جونىندەگى زاڭنامانىڭ تالاپتارىن بۇزعانى ءۇشىن «اكىمشىلىك قۇقىق بۇزۋشىلىق تۋرالى» قر كودەكسىنىڭ (اقبتك) 198 جانە 199-باپتارى شەڭبەرىندە اكىمشىلىك جاۋاپكەرشىلىك كوزدەلگەنىن اتاپ وتەمىز.
بۇل رەتتە, اقبتك-ءنىڭ 198-بابى بويىنشا ىستەردى قاراۋ ىشكى ىستەر ورگاندارىنىڭ قۇزىرەتىنە, 199-بابى بويىنشا - وبلىستىڭ, رەسپۋبليكالىق ماڭىزى بار قالانىڭ, استانانىڭ, اۋداننىڭ, وبلىستىق ماڭىزى بار قالانىڭ جەرگىلىكتى اتقارۋشى ورگاندارىنىڭ قۇزىرەتىنە جاتادى.
198-باپتى بۇزعانى ءۇشىن ايىپپۇل سانكتسيالارى كاسىپكەرلىك سۋبەكتىسىنىڭ نىسانىنا جانە بۇزۋشىلىقتاردىڭ قايتالانۋىنا بايلانىستى 10-نان 100 ايلىق ەسەپتىك كورسەتكىشكە دەيىن (اەك) جانە 199-باپتى بۇزعانى ءۇشىن 15-تەن 120 اەك-كە دەيىن قۇرايدى.