الماتى وبلىسى پد تابيعاتتى قورعاۋ پوليتسياسىنىڭ قىزمەتكەرلەرى بالقاش-الاكول وبلىسارالىق باسسەيندىك بالىق شارۋاشىلىعى ينسپەكتسياسىنىڭ قىزمەتكەرلەرىمەن بىرلەسىپ «براكونەر» جەدەل الدىن الۋ ءىس-شاراسىن وتكىزىپ جاتىر. رەيد كەزىندە ءبىر تونناعا جۋىق زاڭسىز اۋلانعان بالىقتى تيەپ العان كولىكتى ۇستادى. جۇرگىزۋشىدە بالىق اۋلاۋ جانە تاسۋعا قاتىستى وزىمەن بىرگە ەشقانداي قۇجاتتارى بولماعان, دەپ حابارلايدى Egemen.kz.
«جەدەل الدىن الۋ ءىس-شاراسى بارىسىندا پوليتسيا قىزمەتكەرلەرى «مەرسەدەس-بەنس سپرينتەر» ماركالى اۆتوكولىكتى توقتاتتى. كولىكتىڭ ءىشىن تەكسەرۋ كەزىندە جالپى سالماعى ءبىر تونناعا جۋىق ءتۇرلى بالىق تابىلدى», دەپ حابارلادى الماتى وبلىسى پد جپقب تقت ەتج اعا ينسپەكتورى, پوليتسيا مايورى سەرىك بايعوزينوۆ.
الىنعان بالىق ارنايى قابىلداۋ ورنىنا تاپسىرىلدى, ال ءىس بويىنشا ماتەريالدار ودان ءارى سوتقا بەرۋ جانە زاڭ شەڭبەرىندە ءتيىستى شەشىم قابىلداۋ ءۇشىن بالقاش-الاكول وبلىسارالىق باسسەين ينسپەكتسياسىنا بەرىلدى.
«جالپى ەسەپتەۋلەر بويىنشا اتالعان كولىك قۇرالىنان 14 كگ كوكسەركە, 21 كگ-دان استام سازان بالىعى جانە 800 كگ-گە جۋىق تابان جانە وزگە دە بالىقتار تابىلعان. تابيعي رەسۋرستارعا كەلتىرىلگەن زيان سوماسى 523 مىڭ 163 تەڭگەنى قۇرادى. ال 38 جاستاعى كۇدىكتى ءوز كەزەگىندە كىناسىن تولىق مويىندادى», دەدى مايور بايعوزينوۆ.