پاندەميادان 34 پوليتسيا قىزمەتكەرى قايتىس بولدى. بۇل تۋرالى ماجىلىستەگى ۇكىمەت ساعاتىندا قر ىشكى ىستەر ءمينيسترى ەرلان تۇرعىمباەۆ ايتتى, دەپ حابارلايدى Egemen.kz.
«الدىمەن ەلدەگى كريمينوگەندىك جاعدايعا توقتالايىن. جالپى قىلمىستىق احۋال تۇراقتى. كىسى ءولتىرۋ, دەنساۋلىققا اۋىر زيان كەلتىرۋ, توناۋ, ۇرلىق, بۇزاقىلىق, زورلاۋ فاكتىلەرى ازايدى. كوشەلەردە جانە قوعامدىق ورىنداردا, بۇرىن سوتتالعاندارمەن, كامەلەتكە تولماعاندارمەن, ماس كۇيىندە, سونداي-اق قارۋ قولدانۋ ارقىلى جاسالاتىن قىلمىستار تومەندەدى. قىلمىستىڭ اشىلۋى جاقساردى. مۇنداي جاعداي 3 جىل بويى ساقتالۋدا», دەدى مينيستر.
ونىڭ اتاپ وتۋىنشە, الەمدىك پاندەميا پوليتسيا جۇمىسىنا وزگەرىستەر ەنگىزدى. پاندەميا كەزىندە پوليتسيا قىزمەتكەرلەرى دارىگەرلەرمەن بىرگە كۇندىز-ءتۇنى, ۋاقىتپەن ساناسپاي جۇمىس ىستەدى. كۇنىنە 12 مىڭ قىزمەتكەر جۇمىسقا شىقتى. كارانتين جاريالانعاندا 50 مىڭ قىزمەتكەرگە دەيىن جۇمىلدىرىلدى.
«ولار – قوعامدىق قاۋىپسىزدىكتى قامتاماسىز ەتتى. 445 بلوك-پوستى كۇزەتتى. 700 اۋرۋ تاراعان ايماقتى قورشاۋعا الدى. مەيرامحانالار مەن ويىن-ساۋىق وشاقتارىنىڭ جۇمىسىن باقىلادى. تىكەلەي مىندەتتەن بولەك وسىنداي جاۋاپتى جۇمىستارمەن اينالىستى. وكىنىشكە قاراي, پاندەميادان 34 قىزمەتكەر قايتىس بولدى. 19 612 قىزمەتكەر اۋرۋدان جازىلىپ شىقتى. قازىرگى تاڭدا قىزمەتكەرلەردىڭ 98 پايىز ۆاكتسيناتسيادان ءوتتى», دەدى ەرلان تۇرعىمباەۆ.