ەلىمىزدىڭ بانك جۇيەسى تالاي قيىن كەزەڭدى باسىنان وتكەرگەن. اتاپ ايتساق, الەمدىك نارىقتاعى تۇراقسىزدىقتار, عالامدىق ەكونوميكالىق داعدارىس, سونداي-اق, ۆاليۋتا باعامىنىڭ ويناقىلىعى سەكىلدى جاعدايلار. ەندى وسىنداي قيلى كەزەڭدى باسىنان وتكەرىپ, وسى كۇنگە دەيىن تابىستى جۇمىس ىستەپ تۇرعان بانكتەر ءبىر-اق كۇندە بانكروت بولىپ, ءوز جۇمىسىن توقتاتادى دەگەنگە قالاي سەنەسىز؟!
ەل ىشىندە نەندەي الىپقاشتى اڭگىمە جۇرمەسىن, مەيلى مۇددەلى توپتار ءتۇرلى ارەكەتتەرگە بارسا دا قازكوممەرتسبانك بۇرىنعىشا, داعدىلى جۇمىس رەجىمىمەن حالىققا قىزمەتىن كورسەتىپ وتىر. بىزدە نەسيەمەن جۇمىس ىستەۋ, جەكە تۇلعالاردىڭ سالىمى, تولەم كارتالارى مەن بانكوماتتىق جۇيەدە ەش كەدەرگى جوق جانە شۇباتىلعان كەزەكتى دە كورمەيسىز. وسى رەتتە مەن جەكە سالىمشىلارعا اۋەلى ءوز ەسەپشوتىڭىزداعى جيناقتالعان قارجىنى ءبىرجولاتا قايتارىپ الماس بۇرىن, بانك قىزمەتكەرلەرىمەن نەمەسە ءبولىمشە باسشىلارىمەن ءسويلەسىپ, اقىلداسىڭىزدار دەگىم كەلەدى. بۇل تەك ءبىزدىڭ بانكتىڭ كليەنتتەرىنە عانا ايتىلعان ءسوز ەمەس, وتاندىق بارلىق بانك سالىمشىلارىنا باعىتتالعان كەڭەس. ولاي دەيتىنىم, نەگىزسىز الىپقاشتى اڭگىمەگە سەنىپ سالىمشىلار بىرنەشە رەت شىعىنعا ۇشىراعانىن وزدەرى دە بايقاماي جاتادى.
بارشا وتانداستارىمىز ەسكەرەر ءبىر ماسەلە بار, ول – بىزدە, قازاقستاندا سالىمشىلاردىڭ قاراجاتىن قورعاۋ نيەتىمەن جاسالعان مىزعىماس مەحانيزمنىڭ جۇمىس ىستەپ تۇرعانىن ۇمىتپايىق. بىزدەگى بارلىق بانكتەر ءمىندەتتى ۇجىمداستىرىلعان ساقتاندىرۋ جۇيەسىنىڭ مۇشەلەرى جانە جەرگىلىكتى سالىمشىلاردىڭ قارجىسى تولىق قامسىزداندىرىلعان. بۇل دەگەنىڭىز, بانككە سالعان ۇلتتىق ۆاليۋتا دا, شەتەلدىك ۆاليۋتا دا ءوز قۇنىن تولىق ساقتاپ تۇرادى دەگەن ءسوز.
ءبىزدىڭ ەلىمىزدە وتىزدان اسا ءار دەڭگەيدەگى بانكتەر جۇمىس ىستەيدى. ولاردىڭ ىشىندە كەيبىر جەكەلەگەندەرى ۇزاق ۋاقىتتان بەرى ەل سەنىمىنە جاقسى ورنىققاندار. مىنە, ءبىز ۇنەمى ءوز كليەنتتەرىمىزگە ەگەر قارجى ماسەلەسىندە كۇماندانار بولساڭىز, بىرنەشە بانكتەن ءوز ەسەپشوتىڭىزدى اشىپ, ءارتۇرلى ۆاليۋتا تۇرىندە ساقتاپ كورىڭىز دەپ ايتامىز.
قازكوممەرتسبانك ەلدەگى وزگە بانكتەر سياقتى ۇنەمى ۇلتتىق ۆاليۋتانى ءوز دەڭگەيىندە ۇستاپ تۇرۋعا كۇش سالادى. جانە دە تەڭگە باعامىنا قاتىستى ماسەلەلەردە سالىمشىلاردىڭ ەسەبى تۇگەل بولۋىنا مۇددەلى ەكەندىگىمىزدى ەسكەرتكىم كەلەدى.
جازىپ العان
قانات ەسكەندىر,
«ەگەمەن قازاقستان».
الماتى.