تالدىقورعاندا قازاقستان رەسپۋبليكاسى اۋىر اتلەتيكا فەدەراتسياسى جاتتىقتىرۋشىلار كەڭەسىنىڭ وتىرىسى ءوتتى, دەپ حابارلايدى Egemen.kz مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
«وتىرىس بارىسىندا جاتتىقتىرۋشىلار كەڭەسىنىڭ كوپشىلىك داۋىسىمەن اۋىر اتلەتيكادان قازاقستان قۇراماسىنىڭ باس باپكەرى بولىپ داۋرەن بەكمۇحامەدوۆ سايلاندى. بۇل جاعدايعا البەرت ليندەردىڭ ءولىمى مەن ودان كەيىنگى بىرقاتار وقيعا, سپورتشىلاردىڭ, جاتتىقتىرۋشىلاردىڭ, سونداي-اق, البەرت ليندەردىڭ تۋىستارىنىڭ كوپتەگەن ۇندەۋى سەبەپ بولدى. وقيعاعا مينيستر ارالاسقاننان كەيىن جاتتىقتىرۋشىلار شتابى تاراپىنان ورەسكەل ەرەجەبۇزۋشىلىقتار انىقتالدى, سونىڭ سالدارىنان قۇرامانىڭ باس جاتتىقتىرۋشىسى باقىت احمەتوۆ, اعا جاتتىقتىرۋشى سەرگەي سەدوۆ جانە باسقالارى جۇمىستان شەتتەتىلدى», دەلىنگەن حابارلامادا.
سونىمەن قاتار, سپورتتاعى ادىلەتسىزدىك تۋرالى وتىنىشتەردىڭ كوبەيۋىنە جانە ونى راستايتىن دالەلدەردىڭ انىقتالۋىنا بايلانىستى كەڭەستە ەركىن ستيلدەگى تانىمال قازاقستاندىق پالۋان, قازاقستان رەسپۋبليكاسىنىڭ ەڭبەك سىڭىرگەن سپورت شەبەرى, 2000 جىلى وتكەن سيدنەي وليمپياداسىنىڭ كۇمىس جۇلدەگەرى يسلام يلياسوۆيچ بايرامۇقوۆ سپورت بويىنشا ومبۋدسمەن بولىپ تاعايىندالعانى ايتىلدى.