تاۋ-كەن مەتاللۋرگيا ونەركاسىبى مەن قۇرىلىس, حيميا سالاسىندا جۇمىس ىستەپ تۇرعان 18 كاسىپورىن ەلدەگى ەڭ 50 ءىرى لاستاۋشى كاسىپورىن تىزىمىندە. قر يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ ۇكىمەت وتىرىسىندا وسى كومپانيالاردىڭ ەكولوگيالىق مىندەتتەمەلەردى قالاي ورىنداپ جاتقانى تۋرالى مالىمەت بەردى, دەپ حابارلايدى Egemen.kz.
«لاستاۋشى زاتتاردىڭ ەداۋىر بولىگى ونەركاسىپكە, اتاپ ايتقاندا, تاۋ-كەن مەتاللۋرگيا كەشەنى سەكتورىنا تيەسىلى. مينيسترلىك 122 ءىرى جانە ورتا كاسىپورىنمەن بىرلەسىپ اتموسفەراعا تاستالاتىن ەكولوگيالىق شىعارىندى كولەمىن ازايتۋ بويىنشا شارالار قابىلداۋدا.
اتاپ ايتقاندا, تاۋ-كەن مەتاللۋرگيا ونەركاسىبىنىڭ, قۇرىلىس جانە حيميا سالاسىنىڭ جۇمىس ىستەپ تۇرعان 18 كاسىپورنى ەلدىڭ ءبىرىنشى ساناتتاعى 50 ءىرى لاستاۋشىلار تىزىمىنە كىرەدى. وسى كاسىپورىندارمەن ناقتى ينديكاتورلاردى قامتيتىن شىعارىندىلاردى ازايتۋ تۋرالى ءتيىستى مەموراندۋمدارعا قول قويىلدى جانە ىسكە اسىرىلا باستادى», دەگەن ۆيتسە-مينيستر ءوندىرىس الپاۋىتتارىنىڭ ارقايسىسىنا جەكەلەي توقتالدى.
«كازتسينك» جاۋاپكەرشىلىگى شەكتەۋلى سەرىكتەستىگىندە كۇكiرت قىشقىلى زاۋىتىندا گاز-اۋا قوسپاسىن زالالسىزداندىرۋ جانە سۇزگى جۇيەسى جابدىقتارىن جاڭارتۋ ارقىلى شىعارىندىلار كولەمى 53,3 تونناعا تومەندەتىلدى. «اليۋميني قازاقستان» كاسىپورنى شىعارىندىلاردى ازايتۋ ستراتەگياسى قابىلدانىپ, ەميسسيالاردى 10 مىڭ تونناعا تومەندەتۋ ءۇشىن 34 ملرد تەڭگە ينۆەستيتسيالاۋ جوسپارلاۋدا», دەدى قايىربەك وسكەنباەۆ.
ۆيتسە-مينيستر «ارسەلورميتتال تەمىرتاۋ» كاسىپورنىنىڭ دا ەكولوگيانى جاقسارتۋعا باعىتتالعان جوسپارى بار ەكەنىن اتادى.
«مۇندا مازۋت, سۇيىتىلعان گاز بەن قاتتى وتىندى تابيعي گازعا اۋىستىرۋ, شاڭ تازالاۋ جابدىقتارى مەن تازارتاتىن قۇرىلىستاردى جاڭارتۋ, سونداي-اق ەلەكتر سۇزگىلەرىن سالۋ جۇمىستارى باستالدى. جالپى «ارسەلورميتتال تەمىرتاۋ» الداعى 10 جىلدا ەكولوگيالىق احۋالدى جاقسارتۋ شارالارىنا 830 ملن دوللاردان استام قارجى ينۆەستيتسيالاۋدى جوسپارلاپ وتىر», دەدى ۆەدومستۆو وكىلى.