قۇرمانعازى اۋدانىنىڭ كوپتوعاي اۋىلىندا تۇراتىن ءماريام يشانعاليەۆا 3-سىنىپتا وقيدى. بيىلعى شىلدەدە «الەمدىك مودەل – 2021» حالىقارالىق بايقاۋىنا سۋرەتتەرىن جولداعان ەكەن. ال قىركۇيەكتە بايقاۋ قورىتىندىسىمەن ءبىرىنشى ورىنعا يە بولىپ, اقتىق سايىسقا جولداما العان. جاقىندا شەشۋشى سايىس سوچيدە قورىتىندىلاندى.
بيىل «الەمدىك مودەل» بايقاۋىنا الەمنىڭ 40 ەلىنەن ۇمىتكەرلەر قاتىسۋى ءتيىس ەدى. بىراق كوروناۆيرۋس پاندەمياسىنا بايلانىستى 25 ۇمىتكەر باق سىنادى. قازىلار القاسىنىڭ جەتى مۇشەسى ءماريامدى 6-9 جاستاعى قاتىسۋشىلاردىڭ اراسىنان جەڭىمپاز دەپ تانىدى. وسىلايشا, اتىراۋلىق وقۋشى بايقاۋدىڭ باس جۇلدەسىن يەلەنىپ, «الەم جۇلدىزى» اتاندى. وعان «جەر شارىنىڭ سۋپەرمودەلى – 2021» اتالىمى قوسا بەرىلدى.
̶ قىزىم جولعا شىعاردا «مەن باسىما ءتاج كيىپ كەلەمىن» دەگەندە, تاڭعالعان ەدىم. سايىس كەزىندە از-كەم قوبالجىعانى بايقالدى. ويتكەنى حالىقارالىق سايىستا ەلىمىزدىڭ اتىنان جالعىز ءوزى قاتىستى. ءبىز قۇرمانعازى اۋدانىندا تۇرامىز. سول سەبەپتەن, ساحناعا قۇرمانعازىنىڭ «اداي» كۇيىمەن شىقتى. ءتاجدى باسىنا كيگىزگەن ساتتە قۋانىشتان جىلاپ جىبەردى, – دەيدى اناسى اراي قارابالاەۆا.
سەگىز جاسىندا الەمدىك سۋپەر مودەل اتانعان ءماريام يشانعاليەۆا بوس ۋاقىتىندا بي ۇيىرمەسىنە قاتىسادى. وعان قوسا وبلىستىق, رەسپۋبليكالىق بايقاۋلاردىڭ جەڭىمپازى اتانعان. ارمانى – وڭتۇستىك كورەيادا جوعارى ءبىلىم الىپ, دارىگەر بولۋ.