فەدەراتسيا باسشىلىعى وزگەردى
قازاقستاندىق بالۋانداردىڭ توكيو وليمپياداسىنداعى جانە نورۆەگيادا وتكەن الەم بىرىنشىلىگىندەگى ساتسىزدىكتەرىنەن كەيىن گرەك-ريم, ەركىن جانە ايەلدەر كۇرەسى فەدەراتسياسىنىڭ باسشىلىق قۇرامىندا بىرقاتار وزگەرىس بولدى.
قازاقستان كۇرەس تۇرلەرى فەدەراتسياسىنىڭ مالىمەتى بويىنشا, گرەك-ريم, ەركىن جانە ايەلدەر كۇرەسى فەدەراتسياسىنىڭ پرەزيدەنتى بولىپ بۇعان دەيىن ۆيتسە-پرەزيدەنت قىزمەتىن اتقارعان ەرلان قوجاسباي سايلاندى. ال ايەلدەر كۇرەسى بويىنشا ەركىن كۇرەستەن 2006 جىلعى ازيا چەمپيونى نۇرجان قاتاەۆ, گرەك-ريم كۇرەسى بويىنشا تالعات جىلىسباەۆ, باپكەرلەر مەن تورەشىلەردىڭ كۋراتورى بويىنشا الماتى قالاسى سپورت باسقارماسىنىڭ باسشىسى رۇستەم بايسەيىتوۆ, وڭىرلىك دامۋ باعىتى بويىنشا نۇر-سۇلتان قالاسىنىڭ «دەنە شىنىقتىرۋ جانە سپورت باسقارماسى» مم باسشىسى سامات ەرعاليەۆ ۆيتسە-پرەزيدەنتتىككە تاعايىندالدى.
سونىمەن قاتار ەلىمىزدىڭ داڭقتى بالۋانى, ازيا چەمپيوناتىنىڭ ەكى دۇركىن جەڭىمپازى, الەم بىرىنشىلىگىنىڭ بەس دۇركىن جۇلدەگەرى المات كەبىسپاەۆ گرەك-ريم كۇرەسى قۇراماسىنىڭ ۇيلەستىرۋشىسى, 2018 جىلعى ازيا چەمپيونى اسحات دىلمۇحامەتوۆ فەدەراتسيانىڭ ماركەتينگ باعىتىنداعى ۇيلەستىرۋشىسى, ءۇش دۇركىن ازيا چەمپيونى, الەم بىرىنشىلىگىنىڭ جۇلدەگەرى داۋلەت نيازبەكوۆ ەركىن كۇرەس قۇراماسىنىڭ ۇيلەستىرۋشىسى بولدى.
ال بالۋانداردىڭ جەتىستىگىنە تىكەلەي قاتىسى بار ۇلتتىق قۇرامانىڭ باس باپكەرلەر قۇرامىندا ازىرگە وزگەرىس بولا قويعان جوق.
ەكىنشى كەزەڭدە ءسۇرىندى
تەننيستەن قازاقستاننىڭ – ءبىرىنشى, الەمنىڭ 36-راكەتكاسى الەكساندر بۋبليك پاريجدە ءوتىپ جاتقان جۇلدە قورى 2,6 ملن ەۋرودان اساتىن ATP 1000 ءتۋرنيرىنىڭ ەكىنشى اينالىمىندا ءسۇرىندى.
جەرلەسىمىز تۋرنيردەگى تۇساۋكەسەر كەزدەسۋىندە الەمنىڭ 24-راكەتكاسى, ۇلىبريتانيالىق دەنيەل ەۆانسپەن كەزدەسىپ, ءۇش سەتتىڭ قورىتىندىسى بويىنشا 2:6, 7:5, 7:5 ناتيجەسىمەن جەڭىسكە جەتكەن ەدى. وكىنىشكە قاراي, ەكىنشى اينالىمدا الەمنىڭ سەگىزىنشى, وسى دودانىڭ 6-راكەتكاسى, نورۆەگيالىق كاسپەر رۋدتىڭ وسال تۇسىن تابا المادى. نورۆەگيالىق تەننيسشى 1 ساعات 17 مينۋتقا سوزىلعان باسەكەدە ءوزىنىڭ شەبەرلىگى ارقاسىندا وتانداسىمىزدان ەكى سەتتە 6:4, 6:0 ەسەبىمەن باسىم ءتۇستى.
باسەكە بارىسىندا بۋبليك 6 ەيس جاساپ, 6 برەيك-پوينتتىڭ ەكەۋىن عانا پايدالاندى. قارسىلاسى 2 ەيس, 6 برەيككە (16 برەيك-پوينت) قول جەتكىزدى. ك.رۋد جارىستىڭ شيرەك فينالىنا شىعۋ ءۇشىن ارگەنتينالىق ديەگو شۆارتسمان نەمەسە امەريكالىق ماركوس گيروننىڭ بىرىمەن تالاسادى. ا.بۋبليك جەكەلەي سىنداعى جارىستى اياقتاعانىمەن, جۇپتىق باسەكەسىندە يسپانيالىق روبەرتو باۋتيستامەن بىرگە ونەر كورسەتەدى.
پروموۋتەرسىز قالدى
قازاقستاندىق كاسىپقوي بوكسشى باتىر جۇكەمباەۆ (18-1, 14 كو) كانادالىق Eye of The Tiger Management پروموۋتەرلىك كومپانياسىمەن جۇمىس ىستەمەيتىن بولدى. بۇل تۋرالى بوكسشىنىڭ ءوزى مالىمدەدى.
«كانادادا كاسىپقوي بوكسشى رەتىندە جولىمدى اشقان ەوتتم پروموۋتەرلىك كومپانياسىنا جانە ونىڭ باسشىسى كاميل ەستەفانعا العىس ايتقىم كەلەدى. ەندىگى مانسابىمداعى وڭ ناتيجەلەردى كوزدەي وتىرىپ, ءوزارا بەيبىت كەلىسىممەن, قوس تاراپتىڭ سەرىكتەستىگى اياقتالدى. دەسە دە الەم چەمپيونى اتانۋ ماقساتىم ءوز كۇشىندە قالا بەرەدى», دەپ جازدى سپورتشى الەۋمەتتىك جەلىسىندەگى پاراقشاسىندا.
ايتا كەتەيىك, باتىر جۇكەمباەۆ شارشى الاڭداعى سوڭعى جەكپە-جەگىن وسى جىلدىڭ 30 مامىرىندا اقش-تىڭ لوس-اندجەلەس قالاسىندا پۋەرتو-ريكالىق سابريەل ماتياسپەن (17-1-0, 17 كو) وتكىزىپ, تەحنيكالىق نوكاۋتپەن جەڭىلىپ قالعان ەدى.