2 قاراشادا اۋعانستان استاناسى كابۋلداعى ساردار موحامماد داۋد حان اسكەري گوسپيتالىنىڭ جانىندا ەكى قۋاتتى جارىلىس پەن اتىس دىبىسى ەستىلدى, دەپ حابارلايدى Egemen.kz ToloNews-كە سىلتەمە جاساپ.
اۋعانستان ۋاقىتشا ۇكىمەتىنىڭ اقپارات جانە مادەنيەت ءمينيسترىنىڭ ەكىنشى ورىنباسارى بيلال كاريميدىڭ ايتۋىنشا, العاشقى جارىلىس كابۋلدىڭ 10-شى اۋدانىنداعى مۇحاممەد داۋد حان اۋرۋحاناسىنا كىرەر الدىندا بولعان. ەكىنشى جارىلىس اۋرۋحاناعا جاقىن جەردە بولدى.
ىشكى ىستەر مينيسترلىگىنىڭ وكىلى سايد گوستي جارىلىستاردىڭ ءبىرى اۋرۋحاناعا كىرە بەرىستە بولعانىن راستادى. ونىڭ ايتۋىنشا, اۋىر زارداپ شەككەندەردىڭ بارلىعى اۋرۋحاناعا جاتقىزىلعان. وقيعا ورنىنا قاۋىپسىزدىك كۇشتەرى كەلدى. جەدەل جاردەم ماشينالارى جارالىلاردى وسى ايماقتاعى اۋرۋحانالارعا اپارادى. جارىلىستاردىڭ سالدارىنان كەم دەگەندە توعىز ادام جاراقات الىپ, كابۋلداعى جەدەل جاردەم اۋرۋحاناسىنا جەتكىزىلدى.
تاسس حابارلاعانداي, مۇحاممەد داۋد حان اتىنداعى اۋرۋحانا 400 توسەك-ورىنعا ەسەپتەلگەن جانە اۋعانستان قورعانىس مينيسترلىگىنە تيەسىلى. كۋاگەرلەردىڭ ايتۋىنشا, وقيعا مينالانعان كولىكتىڭ جارىلۋى سالدارىنان بولعان.