كەز كەلگەن ۇجىمنان باسپاناسىز قىزمەتكەرلەر تابىلادى. بۇلار – جاس ماماندار, ياكي وتباسىن جاڭادان قۇرعان قىزمەتكەرلەر مەن ارقيلى سەبەپتەرمەن ءۇيلى بولۋدى كەشەۋىلدەتكەندەر. مەملەكەتتىك قۇرىلىمداردا جۇمىس ىستەيتىندەردىڭ جايى بەلگىلى, ءتۇرلى جەڭىلدىكتەرمەن, مەملەكەتتىك باعدارلامالارمەن تۇرعىن ءۇي نەسيەلەرىن الۋعا جول تاۋىپ جاتىر. ال جەكەمەنشىك سەكتور مەن بيۋدجەتتىك ەمەس مەكەمەلەردەن نەسىبەسىن تاۋىپ وتىرعانداردىڭ باسپانا ماسەلەسى قالاي شەشىلەدى؟
وسىنداي جاعدايلارعا بايلانىستى وتباسى بانكىندە 2019 جىلى «كورپوراتيۆتى ءونىم» پايدا بولعان-دى. ەندىگى جەردە وسى باعدارلاماعا سەرپىن بەرۋدىڭ وزەكتىلىگى كۇن سايىن ارتىپ كەلەدى. اتالعان باعدارلاما ارقىلى جەكەمەنشىك كومپانيالار, كاسىپورىندار, ءتىپتى كوممۋنالدىق ۇيىمدار جەڭىلدىكپەن بەرىلەتىن تۇرعىن ءۇي يپوتەكاسىن الا الادى. قىسقاسى, وقىرماندارىمىزعا بارىنشا تۇسىنىكتى بولۋى ءۇشىن, ءتيىمدى جولدارمەن قالاي پاتەر نەمەسە ءۇي الۋعا بولاتىنى تۋرالى سۇراقتارىمىزدى «وتباسى بانك» اق باسقارما ءتورايىمىنىڭ ورىنباسارى نۇرلان اقشانوۆقا قويعان ەدىك.
– نۇرلان ساعىندىق ۇلى, بۇرىن قايىرىمدى كينولارداعىداي, ءبىر جەرگە جاس مامان رەتىندە جۇمىسقا تۇرىپ, ادال ەڭبەكپەن كوزگە ءتۇسىپ, كوپ ۇزاماي جاڭا دا جايلى ءبىر پاتەردە قونىستويىن تويلاپ جاتاتىندار بار ەدى. ول جۇيە كەڭەس وكىمەتىمەن بىرگە كەلمەسكە كەتتى. وسى زاماندا ەكى قولىندا ءبىر جۇمىسى بار كەز كەلگەن ازاماتقا بۇل ارماندى ورالتۋعا بولا ما؟ ءوزى «كورپوراتيۆتىك ءونىم» قالاي جاسالدى؟
– ءبىزدىڭ ەلىمىزدە دە باسپانا ماسەلەسى كەز كەلگەن ادامدى عانا ەمەس, كومپانيا باسشىلارىمەن قاتار قىزمەتكەرلەرىن دە تولعاندىرادى. بۇل ماسەلەنى شەشۋ ءۇشىن مەملەكەت, ءتىپتى بانكتەر تاراپىنان تالاي باعدارلاما جاسالعان, ونىڭ باسىندا ءبىزدىڭ بانك تە تۇر. ال وتباسى بانكى جۇزەگە اسىرىپ وتىرعان مەملەكەتتىك باعدارلامالار نەگىزىنەن اكىمدىكتەر ارقىلى كەزەكتە تۇرعان, جەڭىلدىكتەرى بار ساناتتاعىلاردى قامتيدى. بىراق وكىنىشكە قاراي, زاۋىتتىڭ قاراپايىم جۇمىسشىسى نەمەسە جەكەمەنشىك كلينيكالاردىڭ مەدبيكەسى جەڭىلدىكتەر قاراستىرىلعان يپوتەكالىق نەسيەگە ىلىگە الماي كەلە جاتقانى ايان. ولاردىڭ جالاقىسى كوپ جاعدايدا باستاپقى 50% جارنانى جيناۋعا جەتە بەرمەيدى.
ءوزىڭىز ايتىپ وتىرعانداي, جاس مامان رەتىندە كاسىپورىنعا جۇمىسقا قابىلدانىپ, تاجىريبەسىن جەتىلدىرىپ, جاڭا ماماندىقتاردى دا مەڭگەرىپ, ءوز فوتوڭمەن قۇرمەت تاقتاسىندا جارقىراپ, ەڭبەگىڭ دە جانىپ جاتۋى مۇمكىن. بىراق پاتەرسىز جۇرە بەرمەي, كاسىپورىن ارقىلى جاپ-جاقسى ءۇي الۋ – ءاربىر ادامنىڭ ارمانى. ءبىر جاعىنان بۇل ەرتەگىدەي ەستىلەتىن دە شىعار. قازىردىڭ وزىندە بىزدە وسىنداي قۋانىشتى وقيعالاردىڭ ناقتى كەيىپكەرلەرى بار. دەمەك بۇل – ەندى ءبىر قول جەتپەيتىندەي جاعداي ەمەس. بانكتىڭ «كورپوراتيۆتى ءونىمى» دە وسى ماقساتتا قازاقستاندىق كاسىپورىنداردىڭ ۇجىمدارىنا قولايلى يپوتەكا ۇسىنۋ ءۇشىن جاسالدى.
جالپى, ۇجىم جەتەكشىلەرى كاسىبي بىلىكتىلىگىن باعالايتىن كادرلارعا جاسالىپ جاتقان سىيلىق, كەپىلدى ساقتاندىرۋ پاكەتتەرى, وقۋ اقىسىن تولەپ بەرۋ سياقتى مۇنداي مۇمكىندىكتەردى HR تىلىندە well ۆeing دەپ اتايدى. زاماناۋي تەرمين «ماماندارعا جاعداي تۋدىرۋ» دەگەندى بىلدىرەدى. ال ادام كاپيتالى, كادرلىق رەسۋرس تابىستى بيزنەستىڭ باستاۋى ەكەنىن ءتۇسىندىرىپ وتىرۋدىڭ ءوزى ارتىق. ەگەر قولىنان ءىس كەلەتىن ماماندار باسقا جاقتان جايلى ءومىر ىزدەي باستاسا, جۇمىستىڭ بەرەكەسى قاشاتىنى بەسەنەدەن بەلگىلى. ساراپشىلار دا مەنەدجمەنتتىڭ مۇنداي فورماتىن كوپتەگەن كومپانيا پاندەميا باستالىپ, ادامدار پسيحولوگيالىق جانە قارجىلىق تۇرعىدا قاجي باستاعانىن بايقاعان كەزدە ەنگىزگەنىن العا تارتىپ وتىر.
بۇرىن دا وتباسى بانك كورپوراتيۆتىك تۇرعىدا نەسيەلەۋدىڭ جەكە تاجىريبەلەرىن جاساپ كورگەن, بىراق ۇيىمدار تاراپىنان ايتارلىقتاي قۇلشىنىس, سۇرانىس بولماعاننان كەيىن «كورپوراتيۆتى ءونىم» جاساۋعا شەشىم قابىلدادىق, ال بۇل وتاندىق كاسىپورىنداردىڭ ءوز جۇمىسشىلارىنا قاراسۋىنا, قولداۋىنا جول اشادى. ەندى جۇمىس بەرۋشى ۇيىم قىزمەتكەرلەرىن ءۇيلى ەتۋ ءۇشىن ءوزىنىڭ ارتىق قاراجاتىن بانكتەرگە جەڭىلدىكتەرمەن زاەمدار بەرۋگە ۋاقىتشا ۇسىنا الادى.
– ۇجىمدىق باعدارلاما ارقىلى ءۇي الۋدىڭ ناقتى جولدارى قانداي؟
– ءبىز سىناپ كورگەن وسىنداي كەيستىڭ ءبىرى, ياعني كورپوراتيۆتى ءونىم اياسىنداعى كەلىسىمشارت 2020 جىلى Eurasian Resources Group (ERG) كومپانياسىمەن جاسالدى. قاراپ وتىرساق, كومپانيا ءوز قىزمەتكەرلەرى ءۇشىن قۇرىلىس جۇرگىزۋدى قولعا العان ەكەن, بىراق ونى جۇمىسشىلارىنا قانداي ءتيىمدى نەسيە كەستەسىمەن ساتۋدى ۇزاق ىزدەستىرىپ جاتقان. ال ERG (ەۋرازيالىق توپ) قۇرامىندا «قازحروم» تۇك» اق, «سوكولوۆ-سارىباي كەن-بايىتۋ وندىرىستىك بىرلەستىگى» اق (سسكوب), «قازاقستان ءاليۋمينيى» اق, «قازاقستان ەلەكتروليز زاۋىتى» اق (قەز), «ەۋروازياتتىق ەنەرگەتيكالىق كورپوراتسياسى» اق (ەەك), «شۇباركول كومىر» اق, «ترانسكوم» جشس, «3-ەنەرگوورتالىق» اق مەن ERG Service جشس كىرەدى جانە ونىڭ بۇكىل ەلىمىزدە 60 مىڭنان اسا جۇمىسشىسى بار. ال نەگىزگى نازار كەلەشەگى بار, مىقتى جاس ماماندارعا اۋدارىلاتىن بولسا, وندا مۇنداي جاس كادرلاردى رۋدنىي, اقسۋ, ەكىباستۇز, حرومتاۋ سياقتى قالالاردا ۇستاپ قالۋدىڭ ماڭىزدىلىعى قانشالىقتى ەكەنىن وزدەرىڭىز ۇعا بەرىڭىزدەر. ءوز كەزەگىندە مۇنداي يندۋستريالدى پروفيلدەگى ماماندار ىرگەمىزدەگى رەسەيدە دە سۇرانىسقا يە جانە شەكارالاس ەلدەگى كاسىپورىندار الەۋەتتى جۇمىسشىلارعا جاقسى جاعداي جاساپ, وزدەرىنە تارتاتىنى بەلگىلى.
مۇنداي جاعدايدا ERG دا قاراپ وتىرماي, ءوز جۇمىسشىلارىن ۇستاپ قالۋدىڭ ارەكەتىن جاساۋى ءتيىس بولسا, اتالعان باعدارلاما اياسىندا كومپانيا 3-5 جىل ىشىندە ءبىراز جۇمىسشىسىن باسپانالى ەتە الادى. سونىمەن جالعا الۋ كەلىسىمشارتى بويىنشا جۇمىسشىلار جاڭا پاتەرلەرگە قونىستانىپ, ونىڭ اقىسىن تولەي وتىرىپ, ءبىر مەزەتتە وتباسى بانكتە باستاپقى جارنالارىن دا جيناقتاي بەرەدى. ءۇيدىڭ 30% جارناسى جيناقتالىپ بولعاننان كەيىن بانك قالعان 70%-ىنا جىلىنا 7% ۇستەمەمەن الدىن الا تۇرعىن ءۇي نەسيەسىن بەرەدى. قازىردىڭ وزىندە وسى كەستەمەن پاۆلودار, ەكىباستۇز, اقسۋ جانە قاراعاندى قالالارىندا «قازاقستان ءاليۋمينيى», ERG Servicە كومپانيالارى مەن قازاقستان ەلەكتروليز زاۋىتىنىڭ 467 جۇمىسشىسى جاڭا پاتەرلەردە قونىس تويىن اتاپ ءوتتى. بۇل پاتەرلەردىڭ بولاشاق قوجايىندارىنا باستاپقى جارناسىن جيناقتاپ بولعان ساتتەپ باستاپ نەسيە بەرىلە باستايدى.
– قاراپ وتىرساق, قاراپايىم جانداردىڭ كوپشىلىگىنە ءوز دەپوزيتىن اشىپ, قاراجات جيناقتاۋعا كەدەرگى كەلتىرەتىن سەبەپتىڭ ءبىرى – سەنىمسىزدىك. ادامدار كوپ جاعدايدا قارجىلىق مۇمكىندىكتەرىنە, نەسيە الا الاتىنىنا, ونى جابا الاتىنىنا كۇمان كەلتىرەدى. وتباسى بانكى وسى كەدەرگىنى جويۋ ءۇشىن دە «كورپوراتيۆتى ءونىمىن» ىسكە قوسقانى قۋانتادى.
– وسى ماسەلەگە بايلانىستى ءبىزدىڭ بانكتىڭ بيزنەس جانە تەحنولوگيالار دەپارتامەنتىندەگى ارىپتەستەرىمىز قارجىلىق تەتىك ويلاپ تاپتى بۇل – تولەم قابىلەتىن الدىن الا باعالاۋ قۇرالى. قالاعان ادام بانكتىڭ كەز كەلگەن فيليالىنا بارىپ, بولماسا 300 نومىرىنە حابارلاسىپ, بانك قىزمەتكەرىنە ءوزىنىڭ جەكە مالىمەتتەرىن تەكسەرۋگە رۇقسات بەرەدى. ول ساتتە ءبىزدىڭ قىزمەتكەرلەر ءسىزدىڭ جسن-ءىڭىز بويىنشا سۇراۋ سالىپ, نەسيە تاريحىڭىزدى, زەينەتاقى قورىڭىزدا قانشا قاراجات جيناقتالعانىن بىلەدى. قالعان شارۋانى ماتەماتيكا اتقارادى: تابىس كوزى انىقتالىپ, العىڭىز كەلەتىن نەسيە كولەمىمەن سالىستىرىپ, سول زاماتتا كليەنتكە الۋعا بولاتىن زاەمنىڭ ناقتى سوماسى كورسەتىلگەن سەرتيفيكات بەرىلەدى. بۇل قۇجات ەكى ايعا دەيىن جارامدى بولعاندىقتان, كليەنتكە جاڭا پاتەر ىزدەپ, تاۋىپ, شەشىم قابىلداۋعا مۇمكىندىك بار.
– ەندى ايماقتارداعى اتالعان باعدارلامانىڭ ناقتى كورىنىسى قانداي؟
– قازىر پاتەرلەردىڭ 60%-ى يەلەرىن تاپتى, قالعانى رەسىمدەلىپ جاتىر. پاۆلودارداعى 216 پاتەردىڭ 131-ىندە قونىستويى تويلانىپ, تاعى 53 ۇمىتكەر جالعا الۋ كەلىسىمشارتىن جاساۋعا كىرىستى. اقسۋدا 140 پاتەرلى 3 ءۇيدىڭ 70 پاتەرىنە اقسۋداعى فەرروقورىتپا زاۋىتىنىڭ قىزمەتكەرلەرى كىردى, قالعان مامانداردىڭ تولەم قابىلەتتىلىگى تەكسەرىلۋ ۇستىندە. ەكىباستۇزداعى 70 پاتەردىڭ 65-ىنە «ەۋروازياتتىق ەنەرگەتيكالىق كورپوراتسياسى» اق جۇمىسشىلارى قونىستاندى. قاراعاندىداعى 41 پاتەرگە ۇمتىلعان ۇمىتكەرلەردىڭ دە قۇجاتتارى رەسىمدەلىپ جاتىر. وسى ارادا ايتا كەتۋ كەرەك, تۇرعىن ۇيلەردى جالعا الۋ كەلىسىمشارتى زاەم كەلىسىم شارتىنا قول جەتكىزىلگەننەن كەيىن بىردەن قىزمەتكەردىڭ جەكەمەنشىگىنە اينالادى.
بانك قازىر بەلسەندى تۇردە ERG-ءدىڭ بارلىق قىزمەتكەرىنە تولايىم كەڭەس بەرىپ وتىر. قانشا دەگەنمەن ونداعى كەيبىر ءوندىرىس نىساندارى ۆاحتامەن جۇمىس ىستەيتىندىكتەن, جۇمىس ورىندارىن ۇزاق ۋاقىتقا تاستاپ كەتە المايدى. سوندىقتان ءبىزدىڭ كەڭەسشىلەر ولارعا وزدەرى بارادى. سول جەردە كليەنتتەردىڭ ماقۇلداناتىن نەسيەسىنىڭ ناقتى سوماسى ەسەپتەلىنەدى. سوماسى كورسەتىلگەن سەرتيفيكات سول ارادا قولدارىنا تيەدى. جوعارىدا ايتتىق قوي, بۇل قۇجات ەكى ايعا دەيىن جارامدى وسى ارالىقتا الدىن الا ماقۇلدانعان زاەم بويىنشا كليەنت وزىنە كەرەك پاتەردى تاۋىپ الا الادى. پاتەر تابىلعاننان كەيىن ول باعالاۋدان ءوتىپ, سودان كەيىن نەسيە رەسىمدەلەدى جانە مۇنى بەينەبانكينگ ارقىلى قاشىقتان جاساي بەرۋگە بولادى.
ءبىز قازىر باسقا دا ءىرى كومپانيالار ERG-دەن ۇلگى الاتىنىنا ءۇمىت ارتامىز, كەلەشەكتە دە ساتىپ الۋ مۇمكىندىگىمەن پاتەرلەردى جالعا الۋ ءبىزدىڭ بانك ارقىلى نەسيەگە قول جەتكىزۋدىڭ جالعىز جولى ەمەس.
– وتباسى بانكىمەن ەڭ ءبىرىنشى بولىپ قانداي كومپانيا وسىنداي مامىلە جاساپ ەدى؟
– 2019 جىلى «قاراجانباسمۇناي» اق ءبىرىنشى بولىپ بىزبەن ارىپتەستىككە ۇمتىلدى. «كورپوراتيۆتى ءونىم» مۇناي ءوندىرۋشى كومپانيانىڭ دا 100 قىزمەتكەرىنە باسپانالى بولۋ باقىتىن سىيلادى. ارينە, مۇنايشىلاردىڭ تابىسى جامان ەمەس, بىراق قازاقستاننىڭ باتىسىندا دا كوپبالالى وتباسىلار بارشىلىق, بالالارى ۇيلەنىپ, باستارىنا باس قوسىلىپ جاتقان كەزدە ءۇي ارتىقتىق ەتپەيدى.
بىراق ءبىز بۇل كومپانيامەن باسقا كەستە بويىنشا جۇمىس ىستەدىك. «قاراجانباسمۇناي» ءوزىنىڭ جەكە قورىنان 1,3 ملرد تەڭگە ءبولدى. كەلىسىمشارتتارى بويىنشا ءبىز بۇل قاراجاتتى جىلىنا 2% ۇستەمەمەن الىپ, جۇمىسشىلارعا جىلىنا 5% ۇستەمەمەن نەسيە بەرۋگە, 4 جىلدان كەيىن وسى سومانى كومپانياعا قايتارۋعا مىندەتتەمە قابىلدادىق. بۇل جاعدايدىڭ ەرەكشەلىگى سوندا, كومپانيا قىزمەتكەرلەرى ءبىر تيىن دا باستاپقى جارنا تولەمەي, اسا ءتيىمدى جاعدايدا نەسيەگە قول جەتكىزدى.
– دەمەك ۇجىمدىق باعدارلامانىڭ ارقاسىندا كليەنتتەر جەكەلەگەن جاعدايلاردى يەمدەنە الادى عوي؟
– ءبىر جاعىنان كورپوراتيۆتى ءونىم كونسترۋكتورعا ۇقسايدى: بولشەكتەرى كوپ ۇسىنىستاردىڭ ىشىنەن قازاقستاندىق نەمەسە شەتەلدىك كومپانيالار ءدال وزدەرىنە قولايلى نۇسقالاردى تاڭداپ الا الادى. ءبىز كومپانيالاردان قاراجاتتى پايىزعا الا الامىز, ياكي وزدەرى بىزگە دەپوزيتكە سالىپ, ءتىپتى قاجەت دەپ تاپسا وبليگاتسيالارىن دا شىعارا الادى. نەسيەنىڭ ەڭ جوعارى سوماسى – 50 ملن تەڭگە, زاەمنىڭ مەرزىمى 6 ايدان باستاپ 8 جىلعا دەيىن بەرىلەدى. سونداي-اق بىرىككەن زاەمشىلار تاۋىپ, جەكەلەگەن نەمەسە بۇكىل وتباسىنىڭ زەينەتاقى جيناقتارىن پايدالانۋعا بولادى.
مىسالى, كوممۋنيكاتسيا سالاسىندا جۇمىس ىستەيتىن ءبىزدىڭ ءبىر سەرىكتەسىمىز ءوز قىزمەتكەرلەرى ءۇشىن وتباسى بانكىندە ستاندارتتى جاعدايدا نەسيە رەسىمدەگىسى كەلەدى دەلىك, بىراق نەسيەنىڭ العاشقى جىلدارىندا ايتارلىقتاي بىلىنەتىن پايىزدىق ۇستەمەنىڭ ءبىر بولىگىن وتەۋگە مىندەتتەمە الىپ, وسىلايشا وزدەرىنىڭ ەڭ مىقتى ماماندارىن قولداۋدى جوسپارلاي الدى.
بىراق ايتا كەتۋ كەرەك, ەگەر سومانى 100% زاڭدى تۇلعا قاراجاتتاندىراتىن بولسا, وندا نەسيەلىك ۇستەمە سوڭعى زاەمشى ءۇشىن 0%-دان باستاپ 5%-دى قۇرايدى. ەگەر زاەمداردى قورلاندىرۋعا بانك 40% جانە 60% قاعيداتىمەن قاتىساتىن بولسا, وندا 40% قاراجاتتى بانك بولەدى, 60% – قاراجاتتى كومپانيا بەرەدى. مۇنداي جاعدايدا باستاپقى جارنا پاتەردىڭ 10%-نا دەيىن جيناقتالۋى ءتيىس جانە نەسيەنىڭ جىلدىق ۇستەمەسى 8% بولادى. وسىعان ۇقساس كەستەمەن (50% دە 50%) ءبىز اكىمدىكتەرمەن دە جۇمىس ىستەپ جاتىرمىز. شىنداپ كەلگەندە, «كورپوراتيۆتى ءونىم» دۇنيەگە اكەلگەن دە وسى اكىمدىكتەرمەن جەڭىلدىكتەر بويىنشا نەسيە بەرۋدەگى كوپجىلدىق ارىپتەستىك دەۋگە بولادى.
وسىلايشا, كەز كەلگەن اۋقىمداعى كاسىپورىن وسى ءونىمنىڭ يگىلىگىن كورە الادى. مىسالى, ءبىر كومپانيا 8 وبلىستاعى ءبىر وكىلىن قولداۋ ءۇشىن 80 ملن تەڭگە ءبولدى. ءبىز ەشكىمنىڭ دە بەتىن قايتارمايمىز, جاڭا ۇيدەن بولسىن, ەكىنشى نارىقتاعى پاتەر بولسىن, نەسيە الۋىنا سەپتەسەمىز. ەڭ باستىسى – بارلىق قادام ءبىز كوزدەگەن ماقساتقا جۇمىس ىستەسە بولعانى.
– مۇنداي باعدارلاما جاھاندىق پاندەميادان ەسىن جيا الماي جاتقان ۇجىمدار مەن كومپانيالاردىڭ HR-برەندىن كۇشەيتۋگە زور ۇلەسىن قوساتىن شىعار؟
– البەتتە, «كورپوراتيۆتى ءونىمنىڭ» كومەگىمەن كومپانيالار نارىقتا ءوز بەدەلىن ابدەن كوتەرە الادى. سۇرانىسقا يە ماماندار جەڭىلدىگى بار يپوتەكالار ۇسىناتىن كومپانيالاردى تاڭدايدى. بۇل – دا پاندەميادان كەيىنگى وزىندىك well being, ۇجىم مۇشەلەرىنە قامقورلىق تانىتۋدىڭ وڭدى باستاماسى.
اينالىپ كەلگەندە, تىنباي ەڭبەكتەنىپ جۇرگەن ادام تۇبىندە جەڭىلدىكپەن ءۇيلى بولاتىنىن بىلسە, جۇمىس بەرۋشىلەرىنە دە ادالدىق تانىتقان بولار ەدى. ايتپاقشى, ەكىباستۇزدا ارىپتەستەرىنە ۇلگى بولا الاتىن ءبىر جىگىت بولعان, ءوزى – الپينيست, رافتەر جانە جاستار قوزعالىسىنىڭ جەتەكشىسى. جاپ-جاس بولسا دا جاقسى اكە, تاماشا وتاعاسى. وسى جىگىت ءبىزدىڭ جاڭا باعدارلاما ارقىلى ءۇي العانىن ەستىگەندە, ءدال وسىنداي ادامدار ءۇشىن جاڭا باعدارلاما ويلاپ تاپقانىمىزعا قۋاندىم.
– ءدال وسى نارىقتا سىزدەرگە باسەكەلەس بولا الاتىن بانكتەر بار ما؟
– ءار ادامنىڭ ءوز تاڭداۋى بار – بىرەۋ كوممەرتسيالىق بانكتەرگە جۇگىنگەندى قۇپ كورەدى, ەندى بىرەۋلەر ءوزىنىڭ جيعان-تەرگەنىنە سۇيەنىپ ءۇيلى بولادى. اكە-شەشەسىنەن مۇراعا قالعان باسپانانى ۇلكەيتىپ, جاعدايىن جاساپ جاتقاندار دا بار. ەندى بىرەۋلەر الەۋمەتتىك جاعىنان قورعالعان, جەڭىلدىكتەرى قاراستىرىلعان مەملەكەتتىك قۇرىلىمدارعا ۇمتىلادى. ەگەر كليەنت ءۇشىن كۇرەستى باسەكە دەپ ەسەپتەيتىن بولساق, وندا زاەمشىلاردى ءبىز ىزدەمەيمىز, وزدەرى كەلەدى. الايدا قازاقستاندا «كورپوراتيۆتىك ءونىمنىڭ» بالاماسى جوق. ال شەتەلدەردەگى ارىپتەستەرىمىز ءۇشىن جاۋاپ بەرە المايمىن, ماسەلەن, وزىمە بەلگىلىسى باتىستا تۇرعىن ءۇي جاعدايى اركىمنىڭ جەكە ماسەلەسى بولىپ ەسەپتەلەدى.
– قىسقاسى, وسى باعدارلاما ارقىلى بارلىق ۇجىم وزدەرىنىڭ ءۇيسىز-كۇيسىز قىزمەتكەرلەرىن جارىلقاپ, ساۋاپقا بولەنە الا ما؟
– ءبىزدىڭ باعدارلاماعا كۆازيمەملەكەتتىك سەكتورداعى بولسىن, جەكە كاسىپورىنداردا, قىسقاسى, كەز كەلگەن زاڭدى تۇلعا قاتىسا الادى. ال سوڭعى كليەنت – زاەمشىنىڭ ءوزى تۋرالى ايتاتىن بولساق, ەڭ باستىسى نەسيەسىن جابا الاتىن جاعدايى بولعانى ءجون. جاسى, ازاماتتىعى ماڭىزدى ەمەس, ەگەر كومپانيالار ءتىپتى 70-كە كەلگەن قىزمەتكەرىنە دە ءۇي الىپ بەرەمىن دەسە, قۋانامىز.
– «كورپوراتيۆتى ءونىمنىڭ» ومىرشەڭدىگىنە قاتىستى وتباسى بانكتىڭ قانداي دا ءبىر بولجامدارى بار ما؟
– قازىرگە ءبىز ورگانيكالىق اۋقىمداعى ناتيجەلەردى كورىپ وتىرمىز, 2022 جىلعا قاراي اربىر وڭىردەگى فيليالدارىمىزدا توقسان سايىن وسىعان ۇقساس بىرنەشە جوبادان تاۋىپ وتىرساق دەگەن جوسپارىمىز بار. وسىلايشا, كەمى 20 شاقتى كومپانيا جاڭا باعدارلامانىڭ يگىلىگىن كورىپ, وزگە ارىپتەستەرىنە, باسشىلارىنا جەتكىزىپ, قىزمەتكەرلەرىنىڭ باسپانا ماسەلەسىن شەشىلمەيتىن باستى ماسەلەلەردىڭ قاتارىنان سىزىپ تاستاۋعا سەپتەسەتىنىنە سەنەمىز.
– اڭگىمەڭىزگە راحمەت. كوپتىڭ العىسىنا بولەنە بەرىڭىزدەر!