بۇگىن سەناتتا ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ ۇيىمداستىرۋىمەن «تەحنيكالىق رەتتەۋدىڭ جانە ستاندارتتاۋدىڭ مەملەكەتتىك جۇيەسىنىڭ زاڭنامالىق بازاسىن جەتىلدىرۋ: پروبلەمالارى مەن پەرسپەكتيۆالارى» تاقىرىبىنا ارنالعان دوڭگەلەك ۇستەل وتىرىسى بولدى. كوميتەت توراعاسى داۋرەن ادىلبەكوۆ شاراعا توراعالىق ەتتى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
دوڭگەلەك ۇستەلگە قاتىسۋشىلار تەحنيكالىق رەتتەۋ سالاسىنداعى زاڭنامانى ودان ءارى جەتىلدىرۋ, اتاپ ايتقاندا تاۋارلار مەن جابدىقتاردىڭ سايكەستىگىن باعالاۋ تۋرالى قۇجاتتاردىڭ بولۋىنا باقىلاۋدى كۇشەيتۋدى, «سايكەستىكتى باعالاۋ تۋرالى» زاڭ جوباسىنىڭ تۇجىرىمداماسىن, تسيفرلاندىرۋ جانە باسقا دا ماسەلەلەردى تالقىلادى.
سەناتور ەدىل مامىتبەكوۆ ءوز بايانداماسىندا تەحنيكالىق رەتتەۋ تۋرالى زاڭ مىندەتتەرىنىڭ ءبىرى وتاندىق تاۋار وندىرۋشىلەردىڭ باسەكەلەستىك ارتىقشىلىقتارىن ىسكە اسىرۋ ەكەنىن اتاپ ءوتتى. ول ءۇشىن بيزنەستى قولداۋدىڭ ناقتى شارالارى قابىلدانۋى كەرەك.
«مەملەكەت باسشىسى وندىرىلەتىن ونىمدەگى جەرگىلىكتى ۇلەستى ۇلعايتۋدىڭ ماڭىزىن بىرنەشە رەت اتاپ ءوتىپ, ءتيىستى تاپسىرمالار بەرگەن بولاتىن. اعىمداعى جىلعى 26 قاڭتاردا ۇكىمەتتىڭ كەڭەيتىلگەن وتىرىسىندا ەلىمىز پرەزيدەنتى ونىمدەگى قازاقستاندىق ۇلەستى ارتتىرۋ جونىندەگى مىندەت كۇشىندە ەكەنىنە تاعى دا نازار اۋداردى. سونىمەن قاتار, مەملەكەتتىك ساتىپ الۋدى جۇزەگە اسىرۋ كەزىندە تاۋار يمپورتتاۋشىلارعا ارتىقشىلىق بەرىلەتىن جاعدايلار ءالى جالعاسىپ كەلەدى. بۇل رەتتە, نورماتيۆتىك قۇجاتتار تالابىنا سايكەستىگىن راستايتىن قۇجاتتارى جوق تاۋارلاردى, ونىڭ ىشىندە ازاماتتاردىڭ قاۋىپسىزدىگىنە اسەر ەتەتىن تاۋارلاردى ساتىپ الۋ جۇزەگە اسىپ جاتقانىن اتاپ ءوتۋ ماڭىزدى», دەدى ەدىل مامىتبەكوۆ.
سونداي-اق ىشكى نارىقتى «جاڭساق» سەرتيفيكاتتارمەن راستالعان تاۋارلاردان قورعاۋ, تەحنيكالىق رەتتەۋ سالاسى دەڭگەيىنىڭ تومەندىگى مەن دامۋ قارقىنى, ستاندارتتاۋدىڭ ۇلتتىق جۇيەسىنىڭ حالىقارالىق تالاپتارعا تولىق سايكەس كەلمەۋى جانە تسيفرلىق تەحنولوگيالاردى ەنگىزۋ ارقىلى ءونىمدى قاداعالاۋدى كۇشەيتۋ ماسەلەلەرى كوتەرىلدى.
دوڭگەلەك ۇستەلگە قاتىسۋشىلار ەاەو تەحنيكالىق رەتتەۋ جۇيەسىن دامىتۋدىڭ وزەكتى باعىتتارىن دا قارادى. ەۋرازيالىق ەكونوميكالىق كوميسسيانىڭ تەحنيكالىق رەتتەۋ جانە اككرەديتتەۋ دەپارتامەنتىنىڭ ديرەكتورى تيمۋر نۇراشەۆتىڭ ايتۋىنشا, بۇل باعىتتاعى جۇمىستا ەاەو تەحرەگلامەنتتەرىنىڭ تالاپتارىن ءتۇسىندىرۋ تەتىگىنىڭ جوقتىعى جانە ولاردى ازىرلەۋ مەن ىسكە قوسۋ مەرزىمدەرىن ۇزارتۋدا بىرقاتار پروبلەمالار بار.
سەنات كوميتەتىنىڭ توراعاسى داۋرەن ادىلبەكوۆ دوڭگەلەك ۇستەل وتىرىسىن قورىتىندىلاي كەلىپ, قولدانىستاعى تەحنيكالىق رەتتەۋ جانە ستاندارتتاۋ جۇيەسىنىڭ كەشەندى پروبلەمالارىنا نازار اۋداردى, سونداي-اق سەناتورلاردىڭ ۇكىمەتكە ازىرلەگەن بىرقاتار ۇسىنىستارىن اتاپ ءوتتى.
«مورالدىق جانە فيزيكالىق تۇرعىدان توزعان جابدىقتاردى, سونداي-اق تاۋارلاردىڭ سايكەستىگىن باعالاۋ جونىندەگى ەسكىرگەن ادىستەمەلەردى پايدالانۋ ماسەلەسى ەرەكشە ماڭىزدى. بۇگىندە ءتىپتى 1940 جىلى شىعارىلعان جابدىقتاردىڭ ۇلگىلەرى دە قولدانىلاتىنىن ايتا كەتۋ كەرەك. وسىعان بايلانىستى, ءبىز وسىنداي زەرتحانالاردى جاڭعىرتۋدى قامتاماسىز ەتۋگە باعىتتالعان «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارى اياسىندا بيزنەستى مەملەكەتتىك قولداۋ تەتىكتەرىن كەڭەيتۋ مۇمكىندىگىن قاراستىرۋدى ۇسىنامىز», دەدى داۋرەن ادىلبەكوۆ.
سەناتور سونداي-اق تەحرەگلامەنتتەردى ۋاقتىلى ىسكە قوسۋ, حالىقتىڭ قاۋىپسىزدىگىن قامتاماسىز ەتەتىن تاۋارلارعا ەرەكشە باقىلاۋ جۇرگىزۋ قاجەتتىگىن جانە ولاردى شەشۋ ءۇشىن ۇكىمەت پەن مەملەكەتتىك ورگاندارعا پارمەندى شارالار قابىلداۋ ماڭىزدى ەكەنىن جانە باسقا دا بىرقاتار ماسەلەلەردى اتاپ ءوتتى.
دوڭگەلەك ۇستەل جۇمىسىنا ساۋدا جانە ينتەگراتسيا ءمينيسترى باقىت سۇلتانوۆ جانە سالالىق مەملەكەتتىك ورگانداردىڭ, بيزنەستىڭ, ۇلتتىق اككرەديتتەۋ ورتالىعى مەن كوممەرتسيالىق ەمەس ۇيىمداردىڭ وكىلدەرى قاتىستى.