ەلىمىزدە كۇزەت قىزمەتكەرلەرىنە قويىلاتىن تالاپ پەن ولاردى دايارلاۋ جوسپارى قايتا قارالۋ ۇستىندە. قر ىشكى ىستەر مينيسترلىگىنىڭ كۇزەت قىزمەتىن باقىلاۋ دەپارتامەنتىنىڭ ساراپشىسى دانيار سۇلتانوۆ ءمالىم ەتتى, دەپ حابارلايدى Egemen.kz.
«قازىرگى تاڭدا ءبىزدىڭ دەپارتامەنت كۇزەتشىلەردى دايارلاۋدىڭ تيپتىك وقۋ جوسپارىن قايتا قاراپ جاتىر. جاڭا جوسپارعا سايكەس كۇزەت جانە تەرروريزمگە قارسى كۇرەس تاقىرىبىنا ارنالعان تەوريالىق جانە پراكتيكالىق تاپسىرمالاردىڭ سانى ارتا تۇسپەك. بۇگىندە كۇزەتشىلەردى كاسىبي دايارلاۋ - كۇن تارتىبىندەگى ماڭىزدى سۇراقتاردىڭ ءبىرى. سەبەبى, كۇزەتشى قىزمەتكەرلەر قوعام قاۋىپسىزدىگى ءۇشىن جاۋاپتى مامانداردىڭ ءبىرى. ەلىمىزدە كۇزەتشىلەردى ازىرلەۋدىڭ وزىندىك تالابى بار, ەندىگى ۋاقىتتا اتالعان تالاپتار جەتىلدىرىلە تۇسپەك. جاڭا وزگەرىس تەك كۇزەتشىلەرگە عانا ەمەس ولاردىڭ دايارلايتىن ورتالىقتار مەن ماماندارعا دا قاتىستى», دەدى دانيار سۇلتانوۆ «Kazakhstan Security Systems-2021» اتتى رەسپۋبليكالىق كونفەرەنتسيا بارىسىندا.
ونىڭ ايتۋىنشا, كۇزەتشىلەر بىلىكتىلىگىن زاڭدى تىركەلگەن ارنايى وقۋ ورتالىقتارىندا جەتىلدىرۋى ءتيىس. دايارلىق تەوريا مەن پراكتيكادان تۇرادى.