بىزگە فۋتبول ارقىلى عانا بەلگىلى برازيليا ەلىمەن پالەندەي قارىم-قاتىناسىمىز جوق دەپ ويلايمىز عوي. بىراق شالعايداعى مەملەكەتپەن دە رەسمي بايلانىس ورناتىلىپ, ءتىپتى ساۋدا-ساتتىق تا جولعا قويىلعان. ماسەلەن, 2021 جىلدىڭ 8 ايىندا ەكى ەل اراسىنداعى تاۋار اينالىمى 2,3 ەسە ءوسىپ, 109,8 ملن اقش دوللار قۇراعان, وسى ۋاقىتتا ەكسپورت 92,6 پايىزعا ءوسىم كورسەتىپ, 47,4 ملن دوللارعا جەتىپتى.
ال برازيليادان ءبىز ساتىپ الاتىن تاۋار كولەمى 2,7 ەسە وسكەن, تيىسىنشە 62,4 ملن دوللاردى قۇراعان. قازاقستان برازيلياعا كۇكىرت, فەرروقورىتپا, قارا مەتالداردان جاسالعان بۇيىمدار مەن ۋراندى كوبىرەك ساتسا, ولار بىزگە نەگىزىنەن قانت, جەمىس-كوكونىس شىرىندارى, كوفە, ءدارى-دارمەكتەر يمپورتتايدى. ساۋدا جانە ينتەگراتسيا ۆيتسە-ءمينيسترى قايرات تورەباەۆتىڭ ايتۋىنشا, قازىرگى كەزدە قازاقستاندا برازيليانىڭ قاتىسۋىمەن 5 كاسىپورىن جۇمىس ىستەيدى.
«قازاقستان 433,8 ملن دوللار سوماسىنا 55 الەۋەتتى تاۋار جەتكىزۋگە دايىن. مەتاللۋرگيا, تاماق, حيميا جانە ماشينا جاساۋ سالالارىنىڭ ونىمدەرىن جەتكىزۋدى ۇلعايتۋعا مۇمكىندىگىمىز بار» دەيدى ق.تورەباەۆ.
ول سونىمەن قاتار برازيليالىق ينۆەستيتسيالاردى تارتۋ ءۇشىن «قورعاس» شىحو الەۋەتىن پايدالانۋدى, سونداي-اق ونى قحر نارىعىنا كوتەرمە-بولشەك ەكسپورتتاۋ ءۇشىن الاڭ رەتىندە پايدالانۋدى ۇسىندى.
ق.تورەباەۆتىڭ ايتۋىنشا, قازاقستان ەاەو بىرىڭعاي تاۋار وتكىزۋ جۇيەسىنىڭ (ەتپس) جانە ونى ودان ءارى كەڭەيتۋ پەرسپەكتيۆاسىمەن ورتالىق ازيا ەلدەرىنىڭ تىرەك نۇكتەلەرى بولاتىن شەكارا ماڭىنداعى يندۋستريالىق ساۋدا-لوگيستيكالىق حابتار جەلىسىن ىسكە اسىرادى.
«قورعاس «حشىو» اەا ارتىقشىلىقتارى – قحر جانە ەاەو نارىعىنا قولجەتىمدىلىك, ۆيزاسىز رەجىم, اەا قاتىسۋشىلارىنا بەرىلەتىن سالىق جەڭىلدىكتەرى, باجسىز ساۋدا, دايىن ينجەنەرلىك جانە كولىك ينفراقۇرىلىمىنىڭ بولۋى», دەدى قايرات تورەباەۆ.
ءوز كەزەگىندە بايا شتاتىنىڭ گۋبەرناتورى رۋي كوستا دوس سانتوس برازيليانىڭ الەۋەتى زور ەكەنىن جانە مۇناي-حيميا جانە وڭدەۋ سەكتورىندا, اۋىل شارۋاشىلىعىندا جانە تاۋ-كەن ونەركاسىبىندە ىنتىماقتاسۋعا دايىن ەكەنىن اتاپ ءوتتى.