مىسىر مەن يزرايل شەكاراسىنداعى تابا قالاسىندا تۋريستىك اۆتوبۋستى جانكەشتى جارىپ بەردى. بۇل تۋرالى مىسىر ىشكى ىستەر مينيسترلىگىنىڭ مالىمەتىنە سىلتەمە جاساعان يتار-تاسس حابارلادى.
ارنايى جۇرگىزىلگەن ساراپتاما بۇل تەراكتىنى 21 جاسار مىسىر ازاماتىنىڭ جاساعانىن انىقتادى. ونىڭ دەنەسىنە سالماعى 5-10 كيلو تارتاتىن جارىلعىش زات جاپسىرىلعان كورىنەدى.
وسىنىڭ الدىندا بۇل تەراكتى تۋرالى ءارتۇرلى بولجام ايتىلعان ەدى. سوڭعى تەكسەرۋ قورىتىندىسى حريستيان ساياحاتشىلارىنىڭ اۆتوبۋسىن جوعارىدا اتالعان ازاماتتىڭ جارعانىن دالەلدەپ بەردى. سول كەزدە وڭتۇستىك كورەيانىڭ ءۇش ازاماتى مەن جۇرگىزۋشى قايتىس بولعان ەكەن. ال وسى وقيعانى ۇيىمداستىرۋشى رەتىندە «انسار بەيت ال-ماكديس» ەكسترەميستىك توبى تانىلدى.
ايدار ورىسباەۆ.
دەرەككوز: Itar-tass.com.
فوتو: Itar-tass.com.