سوچيدەگى الامان باستالعالى بەرى دە العايدىڭ قۇبا جولىمەن ارىنداپ شاپقان اتتاي تالاي ۋاقىت وتە شىعىپتى. اقپاننىڭ 14-ىندە XXII قىسقى وليمپيادا ءوزىنىڭ ەكۆاتورىنان استى. ورمەكتىڭ ءجۇزى اۋدى. بىلايشا ايتقاندا, ويىندار جارىس كۇندەرىنىڭ تەڭ جارتىسى ارتتا قالىپ, سپورتشىلار كەلەسى شەشۋشى شاققا قادام باستى. بۇل ۋاقىت ارالىعى قازاقستان قۇراماسى قورجىنىنا مانەرلەپ سىرعاناۋشى دەنيس تەن اكەلگەن قولا مەدال ارقىلى ءبىر جۇلدەنى ءتۇسىرتتى.
ەسەپتى كەزەڭدە وليمپيادانىڭ مەدالدار جيناۋ بويىنشا كوش باسىنا تالاس بۇرىنعىدان بەتەر قىزا تۇسپەسە, ءبىر سۇيەم دە تومەن تۇسكەن جوق. وسىناۋ ىمىراسىز باسەكە, اسىرەسە, ءبىز ءسوز ەتكەلى وتىرعان سەنبى-جەكسەنبى كۇندەرى, اسىرەسە, جۇگەن بەرمەدى. ازىرگە تەك 7 التىن مەدالى بار گەرمانيا قۇراماسى عانا كوپتەن بەرگى ءبىرىنشى ورنىنان مىزعىماي تۇر. ال بۇدان كەيىنگى ورىندارعا تابان تىرەۋشىلەر كۇن سايىن الماسۋدا. ايتالىق, كەيىنگى كەزدەرى تومەنگە ءتۇسىپ كەتكەن گوللانديا مەن نورۆەگيا سەنبىدەگى 5 جانە 7-پوزيتسيالارىنان جەكسەنبىنىڭ كەشىندە 2-3-بەلەستەرگە ءبىر-اق ىرعىدى. سەنبىدە عانا 2-ۇياشىقتا تۇرعان شۆەيتساريا ەرتەسىنە قايتادان 4-ساتىعا توپ ەتتى. سول كۇندەرى 3-ورىنعا دەيىن بارىپ قالعان رەسەي تاعى 5-تەپكىشەككە سىرعىپ كەتتى. بىراق ونىڭ سوڭىن الا كەلە جاتقان كانادا مەن اقش-تىڭ دا ارتتا قالىپ قويعاندارى شامالى. وسىنىڭ ءبارى ويىندار بىتكەنشە باسەكەنىڭ ءباسى ءبىر قايتپايتىنىن انىق بايقاتىپ وتىر.
جۇما كۇنگى جۇلقىنىستار
اقپاننىڭ 14-ءى شىن مانىندە دە قازاقستاندىق سپورتشىلار مەن جانكۇيەرلەر قاۋىمى ءۇشىن اق تۇيەنىڭ قارنى جارىلعان كۇنگە اينالدى. ءبىز جۇماداعى جۇلقىنىس تۋرالى ويعا العاندا, البەتتە, مانەرلەپ سىرعاناۋشى دەنيس تەننىڭ وسى كۇنى ءتۇن جارىمى اۋىپ بارا جاتقان شامادا, قىسقا جانە ەركىن باعدارلامالاردىڭ قوسسايىسى بويىنشا قولا مەدالعا قول جەتكىزىپ, بارشامىزدى كول-كوسىر قۋانىشقا بولەگەنىنە ءبىرىنشى كەزەكتە سالماق سالىپ وتىرمىز. وشكەندى جاندىرىپ, سونگەندى قايتا تۇتاتقانداي بۇل جۇلدە بىزدەر ءۇشىن اقيقاتىندا دا دوسپامبەت بابام جىرعا قوساتىن «شىرماۋىعى التىن, سابى جەز» ماراپات بولدى دا شىقتى.
ەندى شە, بۇل بولماعاندا, ءبارىمىز ءتۇگەل الا جىلان, اش باقانىڭ كۇيىن كەشىپ, توبەمىزدەن ىسكەندىردىڭ قوس ءمۇيىزى تارعاقتانىپ شىعىپ كەلە جاتقانداي حالگە جەتىپ قالىپ ەدىك. ءدال سول كوڭىلدى كۇيىستى كۇدىك كەرنەپ, تاڭدايدىڭ ءدامى كەرمەك تاتي باستاعان تالما تۇستا دەنيستىڭ اۋەدەن ۇشقان التى قازدى اينالدىرىپ اكەلىپ, الدىنا توپ ەتكىزىپ قوندىرعانداي تولايىم تىرلىككە تىرنەك جالعاۋى ەرەسەن ەرلىك بولدى. ول ءبىرىنشى سىناعىنىڭ ناتيجەسىندە 9-ورىندا قالىپ قويعاننان كەيىن كوڭىلسىز كۇيگە تۇسكەنىمىز راس. دەگەنمەن, ايبالتانىڭ سابىنداي, الاۋ وتتىڭ تابىنداي تۇيعىنىمىز ءبىزدىڭ ءبىرىنشى كەزەڭدە كەتكەن ەسەسىن نۇقىل ەكىنشى جاتتىعۋدا قايتارىپ الاتىن اۋىر اتلەتتەرىمىز سەكىلدى ەكەن. ءوزىنىڭ قابىرعادان ءبۇتىن شىققان سۇبەدەي سۇيەكتى ءىرى جىگىت ەكەنىن تانىتا بىلگەن ول جەمە-جەمگە كەلگەندە الدىنداعى التى بىردەي ازۋلى قارسىلاسىن شاڭ قاپتىرىپ كەتىپ, ايتارلىقتاي باسىمدىقپەن تۇعىردىڭ ءۇشىنشى بيىگىنە ۇلكەن سەنىممەن تابان تىرەدى.
جاسىراتىنى جوق, سوڭعى كۇندەرى ءبىزدى «سولت-لەيك-سيتي مەن تۋريندەگى احۋال اينا-قاتەسىز قايتالانعالى تۇرعان جوق پا؟» دەگەن ۇرى وي جىلتىڭداپ ءجيى مازالاپ ءجۇر ەدى. سونىڭ ءبارىن دەنيس تەن وسىلاي ءبىر-اق ساتتە جۋساتىپ تاستاپ, قايتادان الا قالجىڭ, اقتاي كۇلكىمىزدى شاقىرىپ بەردى. ەندى ۆانكۋۆەردەگى جاعدايعا تىم جاقىن تۇرمىز. ويىندارعا 88 ەلدىڭ ليزەنتسياعا قول جەتكىزگەن كىل «سەن تۇر, مەن اتايىندارى» جينالعان بولسا, كەشەگى كۇندى قوسىپ ەسەپتەگەندە, سولاردىڭ 26-سىنىڭ عانا ساڭلاقتارى مەدال الىپ ۇلگەردى. ءبىز – سونىڭ ءبىرىمىز. بۇعان دا تاۋبە! ال وليمپياداعا كەلەر الدىندا وي مەن قىرعا شاپقىلاعان وراسان ويلارىمىز, ويحوي, ورمان تەڭسەلتىپ, تەڭىز شايقالتىپ جاتىر ەدى. ايتاتىن نەسى بار, ءتىپتى, وسىندا جەتكەن كەزدىڭ وزىندە مەنىڭ سەيفوللا دوسىمنىڭ, اقىن سەيفوللا شايىنعازىنىڭ ءبىر جىر جولدارىندا: «اينالامىز اتاق پەن تولعان بەدەل, بىزدەردە نەبىر مىقتى بولعان دەپ ەر. ولەڭ جازىپ جاتىرمىن جاتىپ الىپ, ودان وزگە تۇك تە جوق قولدان كەلەر», دەپ تولعاناتىنىنداي, بىزگە دە ويىنداردىڭ بايگەسىنىڭ تورگى جاعىنان بىرىنەن سوڭ ءبىرى تابىلىپ جاتاتىن وزعاندارىمىز جايلى ماتەريال جازۋدان باسقاعا قولىمىز بوساماي قالاتىنداي بولىپ كورىنىپ ەدى.
ءبىزدىڭ باعامىمىزشا, سونداي الار دەمى ءبىر توبەدەن سوعىپ تۇرعا بالاپ جۇرگەن «نەبىر مىقتىنىڭ» ءبىرى شاڭعىشى الەكسەي پولتورانين بولاتىن. جالپى, الەمدىك رەيتينگتە ءتورتىنشى تۇرعان ونىڭ سۇيىكتى قاشىقتىعى سانالاتىن 15 شاقىرىمعا كلاسسيكالىق تاسىلمەن جۇگىرۋدەن جۇلدەسىز قالادى دەگەن وي ءۇش ۇيىقتاساق تۇسىمىزگە كىرمەپتى. بىراق «ۇيدەگى باعانى بازارداعى نارىق بۇزدى». ءبىزدىڭ ءبىر جىل بويى جۇمىرتقانىڭ اعى مەن سارىسى اجىراتىپ بەرىپ باعىلعان تايبۋرىلدان بەتەر كۇتىم كورگەن سايگ ۇلىگىمىز سەنىمدى اقتامادى. «تۇڭدىكپەنەن كۇن بەرگەن, تۇتىكپەنەن سۋ بەرگەن» تارلانىمىز جارىس ءشۇۋ دەپ باستالعاننان سودەگەي ءجۇرىس, سولەكەت ىلىسكە سالىپ, اياعىنا جەم تۇسكەن ارعىماقتاي شوقىراقتاي بەردى. اقىرىندا تۇعىر باسىن شۆەيتساريالىق داريو كولونيا, شۆەدتەر يۋحان ۋلسسون مەن دانيەل ريچاردسسون ەنشىلەگەن بايگەنىڭ تۋ سىرتىندا قالىپ, كومبەگە توعىزىنشى بولىپ جەتتى.
ءبىز مۇنى ادەپكىدە تاۋ باسىندا قاردىڭ ەرىپ, ونىڭ كوبەسىنە سۋ شىلقىپ شىعا باستاعانىنان كورىپ ەدىك. جالپىعا ورتاق بۇل جاعداي سۇيەگى اۋىرلاۋ الەكسەيگە قاتتىراق باتاتىن شىعار دەپ پايىمداعانبىز. الايدا, وسى ءجۇگىرىسكە قاتىسىپ, 33-ورىنعا جايعاسقان كەلەسى شاڭعىشىمىز – نيكولاي چەبوتكو سورەدەن كەيىن ۇشىراسىپ قالعانىمىزدا, مۇنى بىردەن جوققا شىعاردى. «تراسسادا تۇرعان ەشتەڭە جوق. جۇرتتىڭ ءبارى جۇگىرىپ جاتىر. ءتىپتى, جامان جۇگىرىپ تە جاتقان جوق. بارلىق ماسەلە – ءبىزدىڭ وزىمىزدە. ءبىز بۇل سايىسقا دايىن ەمەس ەكەنبىز», دەدى ول. جالپى, قازىر سپورتشىلارىمىزدى وليمپياداعا دايىنداۋ ءۇشىن ەلىمىزدىڭ 1 ملرد. تەڭگە قارجى جۇمساعانى تۋرالى ايتىلىپ ءجۇر. سولاردىڭ دا باسىم بولىگى الەكسەي سياقتى جەكە جاتتىعۋ, دەربەس دايىندىقتا بولعان جەتەكشى سپورتشىلارعا جۇمسالعانى تاعى انىق. الايدا, جىگىتتەرىمىزدىڭ ءبىرازى مۇنى قوجاناسىردىڭ باياعى حانعا بەرگەن ءۋادەسىنە ساياتىن قاعيداتىنا ۇقساستىرىپ جاراتقانعا ۇقسايدى.
شىمكەنتتەن شىققان شىنارلار
ءبىر ءتاۋىرى, جۇما كۇنى جوعارىداعىدان بولەك تاعى ءبىر جۇلقىنىس بولدى. ونى فريستايلشى جانبوتا الدابەرگەنوۆا جاسادى. شىنى كەرەك, تاۋ باسىندا تالاس قىزدىرعان شاڭعىشىلار جارىسىنان كەيىن ءبىز پاستەگى مانەرلەپ سىرعاناۋشىلار تۋرنيرىنە جەتىپ ۇلگەرۋ ءۇشىن كەشكە جوعارىدا وتەتىن بۇل سايىسقا ايالداي الماعان ەدىك. سوڭىنان فريستايلدىڭ اكروباتيكا تۇرىنەن ءبىر قىزىمىزدىڭ 6-ورىن العانىن ەستىگەندە, ءارى تاڭعالدىق, ءارى قاتتى قۋاندىق. وتكەن جىلعى قىركۇيەك ايىندا عانا 18-گە تولعان, «ماڭدايى كۇنگە تيمەگەن, جەلگە شاشىن ۇرلەگەن» جانبوتادان ەشكىم مۇنى كۇتپەسە كەرەك. الدىمەن ەكى بىردەي ىرىكتەۋ سىناعىن جاقسى اياقتاعان ول ەكى فينالدىق باسەكەدە الدان تابىلىپ تۇرعان. تەك مەدالدار تاعدىرىن شەشكەن ءۇشىنشى فينالداعى تورتتىكتىڭ قۇرامىنا عانا كىرە الماعان. ءبىز ءۇشىن مۇنىڭ ءوزى ۇلكەن تابىس! وسى جەتىستىگى ارقىلى جانبوتا قازاقستاندىقتار اراسىندا ازىرگە ويىنداردىڭ قولا مەدالىنىڭ يەگەرى دەنيس تەن مەن فريستايلدىڭ موگۋل تۇرىنەن بەسىنشى بولعان دميتري رەيحەردتەن كەيىنگى ءۇشىنشى ورىندا تۇر. سول سياقتى وسى سىندا وزىنەن 4 جاس كىشى سىڭلىسىمەن تىزە قوسىپ, الامانعا ات سالدىرعان ەكىنشى فريستايلشىمىز جىبەك اراپباەۆانىڭ تاڭداۋلىلاردىڭ توبىندا 19-ورىنعا توقتاعانىن دا ايتا كەتكەنىمىز ءلازىم. وليمپيادا سەكىلدى باسىرەلى باسەكەدە بۇل دا وتە جاقسى كورسەتكىش بولىپ تابىلادى.
وسى تۇستا بارىپ, ويىندار الدىندا گازەتتە وليمپياداشى سپورتشىلارىمىز تۋرالى ارنايى ءبولىم دايىنداپ جاتقان كۇندەرىمىزدە, شىمكەنتكە قوڭىراۋ شالىپ, جىبەكتىڭ جايى تۋرالى سۇراستىرعانىمىزدا, ارىپتەسىمىز باقتيار تايجاننىڭ مۇنداعى فريستايلشىلار اراسىنداعى مىقتىسى ول ەمەس, جانبوتا ەكەنىن ايتقانى ويىمىزعا ورالدى. كانىگى سپورت ءجۋرناليسىنىڭ ايتقانى ايداي كەلدى. ەندى عانا حالىقارالىق دەڭگەيگە شىعا باستاعان جاس قىز ءوزىنىڭ ءبىرىنشى وليمپياداسىندا وسىلاي بىردەن جارقىراپ كورىندى. ەڭ باستىسى, ونىڭ بار بولاشاعى ءالى الدا. بۇل ءۇشىن ونىمەن بىرگە جارىس جولىنا جالىن قوسىپ, چەمپيون اتانعان بەلارۋس سپورتشىسى اللا تسۋپەردىڭ جاسى قازىر 34-تە, ەكىنشى بولعان قىتاي مەنتاو ءسيۋدىڭ 24-تە, ال ءۇشىنشى ورىنداعى اۆستراليالىق ليديا لاسسيلانىڭ 32-دە ەكەنىن ايتساق تا, كوپ نارسە تۇسىنىكتى بولا تۇسەتىن شىعار دەپ ويلايمىز.
سونىمەن بىرگە, كۇنى سوچيگە جەتەعابىل ىستىق, بىراق ءدال مۇنداعىداي باسىن قار باسقان تىم بيىك تاۋلارى جوق شىم قالادان ەكى بىردەي فريستايلشىنىڭ شىعىپ, وليمپيادادا ەل نامىسىن قورعاعانى دا جەكە ءبىر اڭگىمەنىڭ ارقاۋىنا لايىق تاقىرىپ بولسا كەرەك. بۇل, ءسوز جوق, وبلىستىڭ قازىرگى باسشىلىعى مەن سپورت سالاسىن باسقارىپ جۇرگەن اتان جىلىكتى جىگىتتەردىڭ ەرەسەن ەڭبەكتەرى ارقاسىندا مۇمكىن بولىپ وتىر. بايقايمىز, بۇل بەت الىسىمەن شىمكەنت كەلەشەك قازاقستاننىڭ ناعىز فريستايل ورتالىعىنا اينالاتىن ءتۇرى بار. وعان ءبارىمىز قۋانا قول سوعۋىمىز كەرەك. ولاي بولسا, كۇنى ىستىق, قىسى قىسقا وڭتۇستىك ولكەدەن شىققان جىبەك اراپباەۆا مەن جانبوتا الدابەرگەنوۆا باستاعان تالاپتى دا تالانتتى قىزدار سوڭدارىنان ءالى تالاي سىڭلىلەرىن ەرتەتىن شىعار دەگەن ۇمىتتەمىز.
كومەسكى تارتقان كوكجيەكتەر
قازاقستاندىقتاردىڭ قاتىسۋىمەن جۇما كۇنى بۇلاردان بولەك تاعى ەكى جارىس بولىپ ءوتتى. سايىستاردىڭ بارىنەن بۇرىن سورە تارتقانى – تاۋ شاڭعىشىلارى باسەكەسىندە ءبىزدىڭ ەڭ جوعارى ناتيجە كورسەتكەن وكىلىمىز يگور زاكۋرداەۆ مارەگە 37-بولىپ جەتتى. المان ەلىنەن الاقانعا سالىپ اكەلگەن مارتين حۋبەر ەسىمدى كەلەسى شاڭعىشىمىز وتكەن جولعى سايىسىنداعىداي 42-ورىندا قالدى. ال ويىندار الدىندا بۇلاردىڭ ەكەۋىنىڭ دە تاۋلاردان اسىپ, باۋلاردى باسىپ وتە شىعاتىندارى تۋرالى تالماي ايتىپ, اپى كىرىپ, كۇپى شىققاندارى ەندى ەسكە ءتۇسىپ وتىر. ۇمىتپاساق, يگور ءتىپتى ۇشتىككە كىرۋ ءۇشىن كۇرەسەتىنىن دە جاريالاپ جىبەرگەن. وكىنىشكە قاراي, ولار مۇندا وعان ۇقسايتىن ءبىر قادام دا جاساي الماي, جاپان تۇزدە جەر شولىپ ءجۇر. ماسەلەن, زاكۋرداەۆ وسىنىڭ الدىنداعى سايىستا كومبەگە 33-بولىپ كەلسە, كەيىن, جەكسەنبى كۇنگى جارىستا 44-ورىنعا تۇراقتادى. ودان الگىندەگى حۋبەر مەن دميتري كوشكيننىڭ ۇزاپ كەتكەن جەرلەرى جوق. تەك بۇلاردىڭ سوڭعىسى عانا 16 اقپاندا وتكەن 59 باسەكەلەستىڭ قيقۋ قوسقان سۋپەر-گيگانت جارىسىندا 30-كەزەكتە مارە سىزىعىن قيىپ ءوتىپ, ارىپتەستەرىنەن ءبىرشاما جوعارى كورىنگەن.
جۇما كۇنى بياتلونشى قىزدارىمىز, ءدالىرەگى, ەلەنا حرۋستالەۆا تاعى دا توپ اراسىنداعى توپاندا قالىپ قويدى. ول 15 شاقىرىمعا جەكە جارىسۋدا بىزدەن ەڭ تومەنگى كورسەتكىشتى كورسەتىپ, 47-ورىنعا عانا تابان تىرەي الدى. اراسات وتى جانعاندا, بۋرا مۇزعا تايعاندا, سوڭعى كۇشىن جيسا دا, ءبىر قارادان كورىنەر, دەگەن قىزىمىز وسىلاي ۆانكۋۆەردىڭ شىنىمەن الىستا قالىپ قويعانىن كۇن سايىن ايعاقتاپ كەلە جاتىر. وعان قاراپ بەت تۇزەپ جۇرگەن باسقا قىزدارىمىز دا وسى شامادان اسىپ تۇسە الار ەمەس. ءبىز بۇل جەردە داريا ۋسانوۆا, گالينا ۆيشنەۆسكايا جانە الينا رايكوۆا جايىندا ايتىپ وتىرمىز. ال ءبىزدىڭ قىزدارسىز وتكەن تويدى بۇل كۇنى تاعى دا التىننان القا تاققان بەلارۋس جۇلدىزى داريا دومراچەۆا, شۆەيتساريالىق سەلينا گاسپرين جانە تاعى ءبىر بەلورۋس قىزى نادەجدا سكاردينو تويلادى. ءوتىپ بارا جاتقان داۋرەن-اۋ, 2010 جىلعى وليمپيادادا تاپ وسى دومراچەۆا ءبىزدىڭ حرۋستالەۆادان ءبىر ساتى قالىپ قويىپ, ءۇشىنشى ورىن العان ەدى...
بۇدان كەيىنگى كۇندەرى كونكيشى جىگىتتەرىمىز دە, قىزدارىمىز دا جارىس جولىنا شىعىپ, اۋىز تولتىرىپ ايتاتىنداي جەتىستىكتەرگە جەتە المادى. اقىرى ءبىر اقابا سۋداي ارقىراپ اعار دەپ جۇرگەن دەنيس كۋزينىمىزدىڭ تاعى دا «قوسقان ءيتى قىڭىر جۇگىرىپ», قيسىننان قياس كەتتى. بۇل جولى بايگەنىڭ ءتورىن بۇرىن الەم كۋبوگىنىڭ كەزەڭىنەن بولەك, بىردە-ءبىر جەكە تابىسى بولماعان پولياك زبيگنەۆ برۋدكا الىپ كەتىپ, ۇلكەن سەنساتسيا تۋعىزدى. ءسويتىپ, بۇل بايگەدە تەك الەكسەي پولتورانين مەن ەلەنا حرۋستالەۆا عانا ەمەس, سونىمەن قاتار, دەنيس كۋزيننىڭ دە كومبە كوكجيەكتەرى كومەسكى تارتىپ تۇر.
ءبىزدىڭ قۇراما مۇشەلەرىنىڭ قاتىسۋلارىمەن وتكەن باسقا جارىستار جايىندا بولە-جارا ايتاتىنداي ەشتەڭە جوق. ەندى جۇلدە الا قويادى دەپ ىشتەي ۇكىلەپ وتىرعان مايتالماندارىمىز دا جوقتىڭ قاسى. دەگەنمەن, شاڭعىشىلاردىڭ الدا بولاتىن ەستافەتاسىنا ءالى دە ەلەڭدەپ وتىرمىز. بۇدان بولەك, 21 اقپان كۇنى ءبىزدىڭ شورت-ترەكشى جىگىتتەرىمىز فينالعا شىققان 4 كوماندانىڭ ءبىرى رەتىندە جۇلدەلەر بولىسىنە تۇسپەكشى. بۇعان دا «قازان اۋزى جوعارى» دەگىمىز بار. اينالىپ كەلگەندە, ءالىپتىڭ ارتىن باعامىز.
دەرەك پەن دايەك
ۇيىمداستىرۋشىلاردىڭ دەرەگى بويىنشا, وليمپيادادا اقپاننىڭ 14-ىنە دەيىن 1 000 000 بيلەت ساتىلعان.
ءوز كوماندالارى مەن سپورتشىلارىن قولداۋ ءۇشىن سوچيگە 124 ەلدىڭ جانكۇيەرلەرى اتباسىن تىرەگەن.
ويىنداردى ءارتۇرلى ەلدەردىڭ 13 477 ءجۋرناليسى كورسەتىپ-جازىپ ءجۇر.
وسى كەزگە دەيىن 18 500 ۆولونتەر جالپى مولشەرى 76 090 اۋىسىمدا 760 ساعاتتان استام ۋاقىت جۇمىس جاسادى.
ۆولونتەر-اۋدارماشىلار الەمنىڭ 30-دان استام ەلى دەلەگاتسياسى مۇشەلەرىنە تارجىماشىلىق قىزمەت كورسەتۋدە.
ويىنداردىڭ العاشقى جارتىسىندا ءسوچيدىڭ كولىك جۇيەسى 1,3 ملن. ادامدى تاسىدى. ولاردىڭ 400 مىڭى اۆتوبۋستارمەن, 900 مىڭى «لاستوچكا» پويىزىمەن باراتىن جەرلەرىنە جەتكىزىلدى.
قالادا 1400 قوعامدىق تاماقتاندىرۋ ورنى كۇن سايىن 185 مىڭ پەرسونالدى, كليەنتتەر توپتارىن جانە كورەرمەندەردى تاماقتاندىرادى. وسى كەزگە دەيىن اس-سۋ دايىنداۋ ءۇشىن 2500 توننا ازىق-ت ۇلىك ونىمدەرى جاراتىلدى.
قالا الاڭدارىندا وتكىزىلىپ جاتقان «سوچي-2014» مەرەكەسىن تاماشالاۋعا جالپى سانى 270 مىڭ كورەرمەن كەلدى. سپورت جانە ەسترادا جۇلدىزدارىنىڭ قاتىسۋلارىمەن بارلىعى 187 شارا وتكىزىلدى.
ويىنداردىڭ مادەني باعدارلاماسى شەڭبەرىندە 92 ونەر ۇجىمىنىڭ كۇشىمەن 213 كونتسەرت قويىلسا, كورەرمەندەر سانى 200 مىڭ ادامنان استى.
قالا الاڭدارىنداعى ۇلكەن ەكراندار ارقىلى جارىستاردان 120 ساعات ءۇزىلىسسىز ترانسلياتسيا كورسەتىلدى.
ويىندار باستالعالى بەرى وليمپيادا پاركى اۋماعىندا 550 مىڭ ادام بولىپ ۇلگەردى.
سەرىك ءپىرنازار,
«ەگەمەن قازاقستان» – سوچيدەن.