سەناتور اقىلبەك كۇرىشباەۆ ءبىلىم بەرۋ نىساندارىنداعى قاۋىپسىزدىكتى قامتاماسىز ەتۋ ساپاسىنا نارازى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
سەناتور ىشكى ىستەر, سونداي-اق ءبىلىم جانە عىلىم مينيسترلەرىنە جولداعان دەپۋتاتتىق ساۋالىندا جاقىندا رەسەيدىڭ قازان جانە پەرم قالالارىندا وقۋشىلار قايتىس بولعان قايعىلى جاعداي وقۋ ورىندارىن قورعاۋعا كوپ كوڭىل ءبولۋ كەرەكتىگىن كورسەتتى دەپ مالىمدەدى.
سەناتوردىڭ پىكىرىنشە, قازاقستاندا بۇل ماسەلەدە وتە ماڭىزدى كەمشىلىكتەر بار. مەكتەپتەر مەن ۋنيۆەرسيتەتتەردى كوبىنەسە كۇزەت اگەنتتىكتەرى تولەيتىن از جالاقىعا جۇمىس ىستەيتىن زەينەتكەرلەر كۇزەتەدى. ال كەيبىر جاعدايلاردا مۇنىمەن ليتسەنزيالارى دا, داعدىلارى دا, ءتارتىپ بۇزۋشىلاردى ۇستاۋ ءۇشىن ارنايى قۇرالدارى دا جوق شتاتتىق ۆاحتەرلەر اينالىسادى.
«ەلىمىزدىڭ وقۋ ورىندارىنداعى قاۋىپسىزدىك جۇيەسىندەگى پروبلەمالارعا بۇدان ءارى كوز جۇما قاراۋعا بولمايدى. سەبەبى تارازىنىڭ باسىندا – ءبىزدىڭ بالالارىمىزدىڭ ءومىرى مەن دەنساۋلىعى تۇر. ۋاكىلەتتى مەملەكەتتىك ورگاندارعا وسى سالاداعى ىستەردىڭ ناقتى جاعدايىنا سىني تالداۋ جۇرگىزۋدى جانە كۇزەت قىزمەتىنە قويىلاتىن تالاپتاردى كۇشەيتۋدى, جۇمىسقا كاسىبي كادرلاردى تارتۋ جانە قازىرگى زامانعى تسيفرلىق تەحنولوگيالاردى, ونىڭ ىشىندە بەينەمونيتورينگ پەن بەينەتالداۋدى پايدالانۋ ارقىلى ەلىمىزدىڭ ءبىلىم بەرۋ وبەكتىلەرىندە قاۋىپسىزدىك جۇيەسىن تۇبەگەيلى قايتا قاراۋدى ۇسىنامىن», دەدى سەناتور.
اقىلبەك كۇرىشباەۆ سەنات دەپۋتاتتارى بۇل جۇمىسقا زاڭنامالىق دەڭگەيدە بەلسەنە قاتىسۋعا دايىن ەكەنىن اتاپ ءوتتى.