قازاقستاننىڭ تۇڭعىش پرەزيدەنتى – ەلباسى كىتاپحاناسىنىڭ مۋزەيىندە قازاقستان مەن يندونەزيانىڭ بالالار مەن جاسوسپىرىمدەر اراسىنداعى «مەنىڭ ەلىمنىڭ مادەني مۇراسى» اتتى حالىقارالىق بايقاۋىن قورىتىندىلاعان كورمەسى ءوتتى. مازمۇندى ءىس-شارانى ەلباسى كىتاپحاناسى, قازاقستاننىڭ يندونەزيا رەسپۋبليكاسىنداعى ەلشىلىگى, يندونەزيا رەسپۋبليكاسىنىڭ قازاقستان رەسپۋبليكاسىنداعى ەلشىلىگى, يندونەزيا رەسپۋبليكاسىنىڭ ۇلتتىق كىتاپحاناسى جانە نۇر-سۇلتان قالاسىنداعى بالالار كوركەمسۋرەت مەكتەبى – يۋنەسكو كلۋبى ۇيىمداستىردى.
جوبانىڭ نەگىزگى ماقساتى – بالالاردى قازاقستان مەن يندونەزيانىڭ مادەنيەتى مەن شىعارماشىلىعىمەن تانىستىرۋ, سونداي-اق ولاردىڭ جەكە ءارى شىعارماشىلىق الەۋەتىن اشۋعا جاعداي جاساۋ. بايقاۋ قورىتىندىسى بويىنشا 60 ۇزدىك جۇمىس ىرىكتەلىپ, كورمەگە قويىلدى.
كورمەنىڭ اشىلۋىندا ەلباسى كىتاپحاناسىنىڭ ديرەكتورى باقىتجان تەمىربولات قاتىسۋشىلاردى بايقاۋدىڭ ماڭىزى تۋرا ايتا كەلىپ: «بۇل ءىس-شارا قازاقستان تاۋەلسىزدىگىنىڭ 30 جىلدىعى مەن يندونەزيا تاۋەلسىزدىگىنىڭ 76 جىلدىعىنا ارنالدى. قوس ەلدىڭ بالالار مەن جاسوسپىرىمدەر جۇمىستارىنىڭ كورمەسى ەكى مەملەكەت اراسىنداعى مادەني ىنتىماقتاستىق پەن قۇندىلىقتى, دوستىق قارىم-قاتىناستى كورسەتەدى. بايقاۋعا قاتىسقان قوس ەلدىڭ تالانتتى جاس بۋىنىن قۇتتىقتاي وتىرىپ, ولارعا جاڭا شىعارماشىلىق تابىستار تىلەيمىن!» دەپ ىزگى لەبىزىن ءبىلدىردى.
ودان كەيىن قازاقستاننىڭ يندونەزيا رەسپۋبليكاسىنداعى ەلشىسى دانيار سارەكەنوۆ بەينە – جولداۋ جولداپ, قازاقستان مەن يندونەزيانىڭ ورتاق تۇستارى كوپ ەكەندىگىنە توقتالدى. ء«بىزدىڭ ەلدەرىمىز – ازاتتىق العان جىلدار ىشىندە قوعامدىق جانە ەتنوسارالىق كەلىسىمدى ساقتاپ, نىعايتا العان كوپۇلتتى مەملەكەتتەر. جاس بۋىننىڭ جۇمىستارىنان وسى قۇندىلىقتى اڭعارۋعا بولادى. بايقاۋعا قاتىسقان جاستار بارىن سالدى, ولاردىڭ بۇل ەڭبەكتەرى جوعارى باعاعا لايىق» دەسە, يندونەزيا رەسپۋبليكاسىنىڭ قازاقستانداعى ەكس-ەلشىسى راحمات پرامونو بالالار ءوز شىعارماشىلىعى ارقىلى وتانعا, بەيبىتشىلىك پەن دوستىققا دەگەن سۇيىسپەنشىلىكتى دارىپتەيتىن الەمنىڭ ەلشىلەرى ەكەنىن اتاپ ءوتتى.
يندونەزيالىق قاتىسۋشىلار مەن جەڭىمپازدار, سونداي-اق يندونەزيانىڭ دجاكارتاداعى ۇلتتىق كىتاپحاناسى ءىس-شاراعا Zoom بەينەبايلانىس ارقىلى ونلاين قاتىستى.
ايتا كەتەيىك, قازاقستان مەن يندونەزيانىڭ بالالار مەن جاسوسپىرىمدەر اراسىنداعى «مەنىڭ ەلىمنىڭ مادەني مۇراسى» اتتى حالىقارالىق كونكۋرس ماۋسىم ايىندا جاريالانعان. ەكى ەلدىڭ 400-گە جۋىق بالالارى مەن جاسوسپىرىمدەرى ءوز جۇمىستارىن قازاقستاننىڭ نەمەسە يندونەزيانىڭ داستۇرلەرى; قازاقستاننىڭ نەمەسە يندونەزيانىڭ اڭىزدارى, فولكلورى; قازاقستاننىڭ جانە يندونەزيانىڭ كورىكتى جەرلەرى, قازاقستان مەن يندونەزيا اراسىنداعى دوستىق پەن قازاقستان نەمەسە يندونەزيادا تاۋەلسىزدىك كۇنىن قالاي اتاپ وتەمىن تاقىرىپتارى اياسىندا جولداعان.
كورمە اياقتالعاننان كەيىن بالالاردىڭ تۋىندىلارى 2021 جىلدىڭ جەلتوقسان ايىندا يندونەزيانىڭ دجاكارتا قالاسىنداعى ۇلتتىق كىتاپحاناسىندا كوپشىلىك نازارىنا ۇسىنىلادى.
ءىس-شارا سوڭىندا اتالعان بايقاۋدىڭ ءبىزدىڭ ەلىمىزدەن توپ جارعان جۇلدەگەرلەرى ماراپاتتالدى.