قۇرلىقتىق حوككەي ليگاسىندا (قحل) ونەر كورسەتىپ جۇرگەندەر ويىنشىلار اراسىندا ەڭ كوپ جالاقى الاتىنداردىڭ ءتىزىمى جاريالاندى. بۇل كوشتى نۇر-سۇلتاننىڭ «بارىس» كلۋبىنىڭ كاپيتانى داررەن ديتس باستاپ تۇر.
28 جاستاعى كانادالىق حوككەيشى 2017 جىلى «بارىستىڭ» جەيدەسىن كيدى. ارادا ءبىر جىلدان اسا ۋاقىت وتكەن سوڭ ول قازاقستاننىڭ ۇلتتىق قۇراماسىنىڭ ساپىندا ويناۋعا نيەت ءبىلدىردى. ءبىزدىڭ ەلگە كەلگەن بەتتە ديتس بىردەن كوماندانىڭ سەركەسىنە اينالىپ, ورەلى ونەرىمەن جەرگىلىكتى جانكۇيەرلەردىڭ جۇرەگىن جاۋلادى. سول سەبەپتى دە «بارىس ارەناعا» جينالعان كورەرمەن ونى «داۋرەن» دەپ ەركەلەتىپ اتاۋدى ادەتكە اينالدىردى. قازىرگى كەزدە ءتۇرلى بونۋستار مەن سىياقىلاردى ەسەپتەمەگەندە, ديتس جىلىنا 100 ميلليون رۋبل (شامامەن
597 337 300 تەڭگە) كولەمىندە جالاقى الادى.
ماسكەۋدىڭ «دينامو» كلۋبىنىڭ شابۋىلشىسى ۆاديم شيپاچەۆ ەكىنشى ورىندا. 34 جاستاعى رەسەيدىڭ سولتۇستىك-باتىسىنداعى چەرەپوۆەتس قالاسىنىڭ تۋماسى بۇل كۇندەرى ماسكەۋدىڭ «ديناموسىنىڭ» باستى جۇلدىزىنا اينالىپ وتىر. وليمپيا ويىندارىنىڭ جەڭىمپازى جانە الەم چەمپيونى دەگەن دارداي اتاقتارى بار سۇرمەرگەن ءار جىلدا 95 ميلليون ءرۋبلدى شىتىرلاتىپ تۇرىپ ساناپ, ءوز ءاميانىنا سالۋدا.
سۋومي ەلىنىڭ وكىلى تەەمۋ حارتيكاينەن مەن رەسەيلىك ماكسيم شالۋنوۆ ءۇشىنشى جانە ءتورتىنشى ورىنداردى ءوزارا بولىسۋدە. 31 جاستاعى حارتيكاينەن فينليانديانىڭ ۇلتتىق قۇراماسى مەن ۋفانىڭ «سالاۆات يۋلاەۆ» كلۋبى ساپىندا ونەر كورسەتۋدە. 28 جاستاعى شالۋنوۆ ءياروسلاۆلدىڭ «لوكوموتيۆىنىڭ» نامىسىن قورعاۋدا. ەكەۋى دە كحل-داعى ەڭ ۇزدىك شابۋىلشىلاردىڭ ساناتىندا. سوعان سايكەس ولاردىڭ جالاقىلارى دا وتە جوعارى. ارقايسى جىل سايىن 90 ميلليون رۋبل الىپ ءجۇر.
سونداي-اق «سالاۆات يۋلاەۆتىڭ» قوس ساڭلاعى – دانيالىق فيليپ لارسەن مەن فينليانديالىق يۋحا مەتسولا 80 ميلليوننان السا, امەريكالىق ريد بۋشە («لوكوموتيۆ»), فرانتسيالىق ستەفان دا كوستا («اۆتوموبيليست»), رەسەيلىك الەكسەي مارچەنكو («لوكوموتيۆ») مەن ۆلاديمير تكاچەۆ («تراكتور»), كانادالىق ەددي پاسكۋالە مەن شۆەتسيالىق اندرە پەتەرسسوننىڭ («لوكوموتيۆ») جالاقىلارى 75 ميلليون ءرۋبلدىڭ شاماسىندا.