16-17 قازان كۇندەرى شىمكەنت قالالىق وپەرا جانە بالەت تەاترى ساحناسىندا «دوستىق اۋەندەرى» اتتى كونتسەرت ءوتتى. ەكى كۇنگە جوسپارلانعان ءىس-شارادا قر ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزى جانە حالىقارالىق بايقاۋلاردىڭ لاۋرەاتى, رەسەي فەدەراتسياسى ماسكەۋ قالاسىنان كەلگەن ەكاتەرينا گولوۆلەۆا ءوزىنىڭ ەرەكشە داۋسىمەن كوپشىلىكتى ءتانتى ەتتى, دەپ جازادى Egemen.kz شىمكەنت قالاسى اكىمدىگىنىڭ ءباسپاسوز قىزمەتىنە سىلتەمە جاساپ.
سونىمەن قاتار اقش-تىڭ سان-فرانتسيسكو قالاسىنان پيانيست ءارى ديريجەر, الەمدەگى ۇلكەن ساحنالاردا تانىمال بولعان تەمىرجان ەرجانوۆ كونتسەرتتە پيانينامەن سۇيەمەلدەپ, حالىقتىڭ قوشەمەتىنە بولەندى. ت.ەرجانوۆ – شۋمان اتىنداعى حالىقارالىق كونكۋرستىڭ التىن جۇلدەگەرى, قر ەڭبەك سىڭىرگەن قايراتكەرى, كونتسەرتمەيستەر.
كونتسەرتتە قازاق حالقىنىڭ اياۋلى قىزى, الەمدىك وپەرا ساحناسىنىڭ جارىق جۇلدىزى, قر مەملەكەتتىك سىيلىعىنىڭ لاۋرەاتى مايرا مۇحامەدقىزى دا ءان سالىپ, كورەرمەننىڭ ىستىق ىقىلاسىنا بولەندى.
ايتا كەتسەك, ەكى كۇنگە جالعاسقان ءىس-شارادا تۋىندىلارى تاريح بەتتەرىنەن وشپەيتىن, ايگىلى الەم كومپوزيتورلارى سەرگەي راحمانينوۆ جانە پەتر چايكوۆسكيدىڭ شىعارمالارى ورىندالدى.