بۋلليتتە باسىم ءتۇستى
قۇرلىقتىق حوككەي ليگاسىندا باق سىناپ جاتقان ەلوردانىڭ «بارىسى» كەزەكتى سىرت الاڭداعى ويىندار سەرياسىن جەڭىسپەن باستادى. قىتايدىڭ «كۋنلۋن رەد ستار» كلۋبىمەن كەزدەسكەن جەرلەستەرىمىز بۋلليت سەرياسىندا ۇستەمدىك تانىتتى.
ماسكەۋ وبلىسىنداعى «مىتيششي ارەنادا» («كۋنلۋن» ءوز ايدىنىنداعى ويىندارىن رەسەي جەرىندە وتكىزىپ جاتىر) ۇيىمداستىرىلعان باسەكەنىڭ نەگىزگى ۋاقىتى 1:1 ەسەبىمەن تەڭ اياقتالدى. ماتچتىڭ ءبىرىنشى كەزەڭىندە حوككەيشىلەر ءبىر-ءبىرىنىڭ قاقپاسىنا گول سوعا المادى. دەگەنمەن ۇزىلىستەن كەيىن يۋري ميحايليس شاكىرتتەرى مۇزايدىندا بەلسەندى قيمىلدادى. ناتيجەسىندە, ويىننىڭ 21-مينۋتىندا وللە السيننەن تاماشا پاس العان نيكيتا ميحايليس قارسىلاس قاقپاسىن ءدال كوزدەپ, كومانداسىن العا شىعاردى.
ءۇشىنشى كەزەڭدە «كۋنلۋن» حوككەيشىلەرى بارىن سالدى. 58 مينۋت بويى ورتيو قورعاعان قاقپادان ساڭلاۋ تابا الماعان قىتايلىقتار ماتچىڭ اياقتالۋىنا ەكى مينۋت قالعاندا تارازى باسىن تەڭەستىرىپ كەتتى. شايبا اۆتورى – تايلەر ۆونگ. وسىلايشا نەگىزگى ۋاقىت تەڭ اياقتالعان سوڭ, كەزدەسۋ وۆەرتايمعا ۇلاستى. بىراق بۇل كەزەڭدە دە جەڭىمپاز انىقتالعان جوق. ال بۋلليت سەرياسىندا «بارىس» ويىنشىلارى دالدىك تانىتتى. قورىتىندى ەسەپ – 2:1, «بارىستىڭ» پايداسىنا. جەرلەستەرىمىز بۇل جەڭىسىنەن كەيىن «شىعىس» كونفەرەنتسياسىنداعى تۋرنير كەستەسىندە ەكى ساتى جوعارىلاپ, 7-ورىنعا تۇراقتادى.
جەتى كۇندەگى ەكىنشى جەڭىسى
«استانا» ۆەلوكلۋبىنىڭ قازاقستاندىق كوشباسشىسى الەكسەي لۋتسەنكو ءبىر اپتانىڭ ىشىندە ەكىنشى مارتە يتاليا تاس جولدارىندا وتكەن ءبىر كۇندىك ۆەلوجارىستىڭ جەڭىمپازى اتاندى.
وتكەن اپتادا «كوپپا اگوستوني» دوداسىندا ۇزدىك شىققان قازاقستاندىق ۆەلوشاباندوز بۇل جولى يتاليانىڭ سولتۇستىك-شىعىسىندا تەك اق قيىرشىق تاس جولدار بويىمەن وتكەن دەبيۋتتىك «سەرەنيسسيما گراۆەل» ءبىر كۇندىك جارىسىندا توپ جاردى.
الەكسەي لۋتسەنكو 132 شاقىرىم قاشىقتىقتى 3 ساعات 24 مينۋت 14 سەكۋندتا ءجۇرىپ, تۇڭعىش رەت ۇيىمداستىرىلعان جارىستىڭ باس جۇلدەسىن جەڭىپ الدى. ەكىنشى جانە ءۇشىنشى ورىنداردى يەلەنگەن يتاليالىق ريككاردو مينالي مەن اۋستراليالىق ناتان حااس جەرلەسىمىزدەن 42 سەكۋندقا قالىپ قويدى. سونىمەن قاتار «استانانىڭ» تاعى ەكى وكىلى – داۆيدە مارتينەللي (4-ورىن) مەن سامۋەلە باتتيستەللا (9-ورىن) ۇزدىك وندىقتىڭ قاتارىنان كورىندى.
فينالدا ءسۇرىندى
قازاقستاننىڭ ءبىرىنشى, الەمنىڭ 16-راكەتكاسى ەلەنا رىباكينا اقش-تىڭ ينديان-ۋەللس قالاسىندا وتكەن BNP Paribas Open WTA 1000 ءتۋرنيرىنىڭ جۇپتىق باسەكەسىندە رەسەيلىك ۆەرونيكا كۋدەرمەتوۆامەن بىرگە ونەر كورسەتىپ, باس جۇلدەگە قول سوزىم جەر قالعاندا ءسۇرىندى.
قازاقستاندىق-رەسەيلىك جۇپ فينالدا بەلگيالىق ەليزە مەرتەنس پەن تايۆاندىق سە سۋ-ۆەيمەن كەزدەستى. 1 ساعات 34 مينۋتقا سوزىلعان ويىندا رىباكينا مەن كۋدەرمەتوۆا قارسىلاستارىنان 6:7(1:7), 3:6 ەسەبىمەن جەڭىلىپ, ەكىنشى ورىنعا تابان تىرەدى. BNP Paribas Open فينالىنا شىققانى ءۇشىن ەلەنا مەن ۆەرونيكا 650 رەيتينگتىك ۇپاي مەن 220 مىڭ اقش دوللارىن قانجىعالارىنا بايلادى. ايتا كەتەرلىگى, بۇل رىباكينا مەن كۋدەرمەتوۆانىڭ بىرگە ويناعان ەكىنشى ءتۋرنيرى. بۇعان دەيىن ولار تامىز ايىندا مونرەالدا (كانادا) وتكەن جارىستىڭ جارتىلاي فينالىنا دەيىن جەتكەن ەدى.
دايىنداعان ءالي بيتورە