وزبەكستان مەن اۋعانستان وكىلدەرى 16 قازاندا تەرمەزدە (وزبەكستاننىڭ اۋعانستانمەن شەكاراداعى سۋرحانداريا وبلىسىنىڭ ورتالىعى) ءوتتى. وزبەكستان سىرتقى ىستەر مينيسترلىگىنىڭ سايتىندا تاراپتار ەلەكتر جەلىلەرى مەن تەمىرجول قۇرىلىسىنىڭ بىرلەسكەن جوباسىن ىسكە اسىرۋ تۋرالى كەلىسىمگە قول جەتكىزدى دەپ حابارلاندى, دەپ حابارلايدى Egemen.kz.
وزبەكستان دەلەگاتسياسىن پرەمەر-ءمينيستردىڭ ورىنباسارى, ينۆەستيتسيا جانە سىرتقى ساۋدا ءمينيسترى ساردور ۋمۋرزاكوۆ باسقاردى, اۋعانستان تاراپىن اۋعانستاننىڭ ۋاقىتشا ۇكىمەتى باسشىسىنىڭ مىندەتىن اتقارۋشى ابدۋل سالام حانافي باسقاردى.
مينيسترلىك مالىمدەمەسىندە كەزدەسۋدە ساۋدا-ەكونوميكالىق ىنتىماقتاستىق, شەكارا قاۋىپسىزدىگى, ەنەرگەتيكا سالاسىنداعى كەلىسىم, حالىقارالىق جۇك تاسىمالى مەن ترانزيت ماسەلەلەرى تالقىلانعانىن حابارلادى. سونىمەن قاتار, ءبىلىم بەرۋ جانە گۋمانيتارلىق سالاداعى قاتىناستاردى دامىتۋ جونىندە پىكىر الماستى.
«ينفراقۇرىلىمدىق جوبالاردى ىسكە اسىرۋعا, سونىڭ ىشىندە «سۋرحان-پۋلي-حۋمري» ەلەكتر جەلىسىنىڭ تارتىلۋىنا جانە «تەرمەز-مازاري-شاريف-كابۋل-پەشاۆار» تەمىرجولىنىڭ قۇرىلىسىنا ەرەكشە نازار اۋدارىلدى», دەپ اتاپ ءوتتى وزبەكستان ءسىم.
وزبەكستان ءسىم اۋعانستان دەلەگاتسياسى وزبەك ۇكىمەتىنە قوناقجايلىق كورسەتىپ, ءساتتى كەلىسسوز جاساعانى ءۇشىن ريزاشىلىق بىلدىرگەنىن حابارلادى.
ريا نوۆوستي «تاليبان» قوزعالىسى مالىمدەمەسىنە ساي وزبەكستانمەن كەلىسسوزدەر ناتيجەسىندە بىرلەسكەن جۇمىس توپتارى قۇرىلعانىن حابارلادى.
«ەكى جاقتىڭ اراسىندا كوپتەگەن سالادا بىرلەسكەن جۇمىس توپتارى قۇرىلدى. جۇمىس توپتارى وزەكتى ماسەلەلەردى تالقىلاپ, باسشىلارىنا كەلەسى قادامدار بويىنشا ۇسىنىستار تاستايدى», دەدى تاليبان وكىلى زابيحۋللا مۋجاحيد مالىمدەمەدە.
مالىمدەمەگە سايكەس, الداعى ون كۇندە تاراپتار باسشىلىققا ۇسىناتىن جول كارتاسىن ازىرلەيدى.