ابۋ-دابيدە ايقاسادى
قازاقتىڭ قايسار ۇلى دامير يسماعۇلوۆ UFC-دەگى ءوزىنىڭ كەزەكتى جەكپە-جەگىن 30 قازاندا بىرىككەن اراب امىرلىكتەرىنىڭ استاناسى – ابۋ-دابي قالاسىندا وتكىزەدى.
رەسەيدىڭ ورىنبور وبلىسىندا تۋىپ-وسكەن 30 جاستاعى قانداسىمىز 2014 جىلدان بەرى وسى سپورت ءتۇرىن جانىنا سەرىك ەتىپ كەلەدى. سول ارالىقتا 21 كەزدەسۋ وتكىزىپ, تەك بىرەۋىندە عانا ۇتىلدى. وزگە باسەكەلەردىڭ بارلىعىندا قارسىلاستارىن سىپىرا ۇتتى. 10 جەكپە-جەكتى مەرزىمىنەن بۇرىن اياقتادى. دامير 2017 جىلى رەسەيدەگى م-1 ۇيىمىنىڭ التىن بەلبەۋىن يەلەنىپ, سول اتاعىن بىرنەشە رەت ءساتتى قورعادى. سودان كەيىن الەمدەگى ەڭ بەلدى پروموۋشەن – UFC-مەن كەلىسىمشارتقا وتىردى. وسى ۇيىمنىڭ مۇرىندىق بولۋىمەن وتكەن جارىستاردا ءتورت رەت وكتاگونعا شىعىپ, بارلىق باسەكەدە جەڭىسكە جەتتى. ەندى ول رەسەيلىك ماگومەد مۋستافاەۆپەن كۇش سىناسادى.
ماگومەد 33 جاستا. داعىستاننىڭ تۋماسى ارالاس جەكپە-جەكتەن وتەتىن جارىستارعا 2011 جىلدان بەرى ۇزدىكسىز قاتىسىپ كەلەدى. سول كەزدەن بەرى 18 رەت ايقاس الاڭىنا شىعىپ, 14 كەزدەسۋدى ءوز پايداسىنا شەشتى. سول سايىستاردىڭ بارلىعىندا ول ايقىن باسىمدىق تانىتتى.
«بارىس» تاعى دا ۇتىلدى
قۇرلىقتىق حوككەي ليگاسىندا (قحل) كۇش سىناسىپ جۇرگەن نۇر-سۇلتاننىڭ «بارىسى» كەزەكتى تۋر ويىنىن ومبىنىڭ «اۆانگاردىمەن» وتكىزدى.
ماسكەۋ وبلىسى اۋماعىندا ورنالاسقان «ارەنا بالاشيحادا» وتكەن ماتچ ءبىر مينۋت ۇنسىزدىكپەن باستالدى. وسىلايشا, حوككەيشىلەر وسىدان 13 جىل بۇرىن دۇنيەدەن وزعان الەكسەي چەرەپانوۆقا تاعزىم ەتتى. اسا دارىندى ويىنشى 2008 جىلدىڭ 13 قازانىندا «اۆانگارد» پەن «ۆيتياز» كلۋبتارى اراسىنداعى باسەكە بارىسىندا كەنەتتەن جۇرەگى توقتاپ, قايتىس بولعان ەدى. ول نەبارى 19 جاستا بولاتىن.... ال ماتچتىڭ وزىنە كەلەتىن بولساق, العاشقى شايبا ويىن باستالعاننان 33 مينۋتتان كەيىن سوعىلدى. بۇل گولدىڭ اۆتورى – كوربەن نايت. 40-مينۋتتا الەكسەي ەمەلين مەرگەندىك تىنىتسا, 50-مينۋتتا نيكيتا ميحايليس ەسەپ ايىرماسىن قىسقارتتى. بىراق ودان ارىگە قوناقتاردىڭ ءالى جەتپەدى. 51 جانە 59-مينۋتتاردا «اۆانگاردتىڭ» ويىنشىلارى تاعى ەكى رەت نىسانانى ءدال كوزدەدى. ەسەپ – 4:1.
قازىرگى كەزدە «بارىس» تۇراقتى بىرىنشىلىكتىڭ جارىس كەستەسىندە 14 ۇپايمەن 18-ورىندا كەلەدى. ءوزىنىڭ كەلەسى كەزدەسۋىن جەرلەستەرىمىز 15 قازاندا مىتيششيدە قىتايدىڭ «كۋنلۋن رەد ستار» كلۋبىمەن وتكىزەدى.
جاپونيادا سايىسقا تۇسەدى
27 قازاندا جاپونيانىڭ كيتاكيۋسيۋ قالاسىندا كوركەم گيمناستيكادان الەم چەمپيوناتى باستالادى. مىڭ بۇرالعان سۇلۋلار جينالاتىن سايىستا قازاقستاندىق سپورتشىلار دا باق سىنايدى.
كۇنشىعىس ەلىندە ەلىمىزدىڭ ەڭ ۇزدىك گيمناسشىلارى ونەر كورسەتەدى. سولاردىڭ اراسىنان ەلجانا تانيەۆانى ەرەكشە اتاپ وتۋگە بولادى. بۇل كۇندەرى ماسكەۋدەگى يرينا ۆينەر-ۋسمانوۆا اتىنداعى كوركەم گيمناستيكا ورتالىعىندا جاتتىعىپ جۇرگەن ول بيىلدىڭ وزىندە بىرقاتار حالىقارالىق تۋرنيردە مول ولجاعا كەنەلىپ, مايتالمان مامانداردىڭ نازارىن وزىنە اۋداردى. كۇنى كەشە عانا رەسەي استاناسىندا وتكەن Olympico Cup تۋرنيرىندە قازاقتىڭ دارىندى قىزى ءۇش قولا مەدالدى يەلەندى. جەكەلگەن سايىستا ەلجانامەن قاتار, ءدىلناز بايلەنوۆا دا ءوز ونەرىن ورتاعا سالادى. ال توپتىق باسەكەدە ايدانا مەن دايانا شاياحمەتوۆالار, ميلانا بۋدنيك, الينا چەرنىشەۆا, ايسۇلۋ مىرزاعاليەۆا جانە ساعينا مۇراتقىزى سىندى گيمناسشىلار باق سىنايدى.
ۇلتتىق كوماندامىزدىڭ باس باپكەرى ءاليا يۋسۋپوۆانىڭ ايتۋىنشا, ءبىزدىڭ سپورتشىلاردىڭ دايارلىعى جاقسى. قازاقستاننىڭ تانىمال گيمناسشىلارى اراسىنان سابينا باقاتوۆا عانا جاراقاتىنا بايلانىستى ءدۇبىرلى دودادان شەت قالىپ وتىر.