ارمەنيادا تمد ەلدەرىنىڭ جاستار ءىسى جونىندەگى كەڭەسى شەڭبەرىندە «تمد ءۇشىن 100 يدەيا» بايقاۋىنىڭ فينالدىق كەزەڭى ءوتتى, دەپ جازادى Egemen.kz.
قازىلار القاسىنىڭ شەشىمىمەن «تمد-عا ارنالعان 100 يدەيا» بايقاۋىنىڭ جەڭىمپازدارى بولىپ ءتۇرلى باعىتتار مەن نوميناتسيالار بويىنشا 12 جوبا تانىلدى.
اۆياتسيالىق, عارىشتىق جانە كولىك جۇيەلەرى نوميناتسياسىندا كوكشەتاۋ جوعارى تەحنيكالىق كوللەدجىنىڭ 5 كۋرس ستۋدەنتى كاير ءاليحان «تازا سۋتەگىمەن جۇمىس ىستەيتىن قوزعالتقىش» جوباسىمەن جەڭىمپاز بولىپ تانىلدى.
جالپى, بايقاۋدا 11 جاس قازاقستاندىق 10 باعىت بويىنشا وزدەرىنىڭ ستارتاپ-جوبالارىن ۇسىندى.
اتاپ كەتەيىك, قر اقپارات جانە قوعامدىق دامۋ مينيسترلىگى قازاقستاننىڭ اتىنان ۇلتتىق دەلەگاتسيانى جاساقتاپ, ونىڭ قۇرامىنا يننوۆاتسيالىق يدەيالارى بار تالانتتى جاستار كىرگەن بولاتىن.
بايقاۋدىڭ فينالىندا رەسەي, ارمەنيا, بەلارۋس, قىرعىزستان, وزبەكستان جانە تاجىكستاننىڭ جوبالارى ۇسىنىلدى. بارلىق تمد ەلدەرىنەن بارلىعى 50 ءوتىنىم بەرىلدى.
انىقتاما:«تمد ءۇشىن 100 يدەيا» جوباسى 2014 جىلدان باستاپ ەكى جىلدا ءبىر رەت كەزەڭدىلىكپەن ىسكە اسىرىلادى, ەكى كەزەڭنەن تۇرادى: ۇلتتىق (ىرىكتەۋ) جانە حالىقارالىق (فينال). جوباعا تمد – عا قاتىسۋشى مەملەكەتتەردىڭ اۆتورلىق جوبالارىن ۇسىنعان 14-35 جاس ارالىعىنداعى جاستار قاتىسا الادى.