مۇنايلى ءوڭىر كومانداسىنىڭ باس باپكەرى لاۋازىمىنا ۆلاديمير چەبۋرين تاڭدالدى, دەپ حابارلايدى Egemen.kz.
جەرگىلىكتى فۋتبول كلۋبىنىڭ ءباسپاسوز قىزمەتىنەن ءمالىم ەتكەندەي, قازاقستاندىق مامان ەڭبەك جولىن قاراعاندىنىڭ «شاحتيور» كلۋبىندا ويىنشى بولىپ باستاعان.
«2009 جىلى «شاحتيور» كلۋبىن ەل چەمپيوناتىنىڭ قولا جۇلدەسىنە جەتكىزىپ, قازاقستان كۋبوگىنىڭ فينالىنا شىعاردى. كەيىن «وقجەتپەس» كلۋبىن قايتادان پرەمەر-ليگاعا الىپ شىقتى. حالىقارالىق دەڭگەيدە دە ۇلكەن جەتىستىكتەرگە قول جەتكىزدى. ونىڭ جەتەكشىلىگىمەن ليتۆانىڭ «سۋدۋۆا» كلۋبى ءۇش رەت ەل چەمپيونى اتاندى. اتالعان كوماندا ەۋروكۋبوكتاردا ءساتتى ونەر كورسەتىپ, ۋەفا تۋرنيرلەرىنىڭ پلەي-وفف كەزەڭىنە دەيىن جەتتى», دەپ حابارلادى كلۋبتىڭ ءباسپاسوز قىزمەتى.
ول جاتتىقتىرعان ليتۆانىڭ «جالگيريس» كلۋبى ءۇش مارتە ەل چەمپيونى, ەكى مارتە ليتۆا كۋبوگىنىڭ جەڭىمپازى اتانعان. وسىنداي جەتىستىكتەرى ءۇشىن ۆلاديمير چەبۋرين ليتۆادا ءۇش رەت «جىل باپكەرى» اتاعىن يەلەنگەن.
ەسكە سالا كەتەلىك, بۇدان بۇرىن «اتىراۋ» فۋتبول كلۋبىنىڭ باس باپكەرى قىزمەتىنەن كەتكەنىن حابارلاعان ەدىك.