ەلىمىزدىڭ جالپى ءبىلىم بەرەتىن مەكتەپتەرىنە 6 900-دەن استام پەداگوگ-پسيحولوگ قاجەت. بۇل جايىندا سەنات دەپۋتاتتارىنىڭ ساۋالىنا قر ءبىلىم جانە عىلىم ءمينيسترى اسحات ايماعامبەتوۆتىڭ جاۋابىندا ايتىلعان, دەپ حابارلايدى Egemen.kz.
«جالپى ءبىلىم بەرەتىن مەكتەپتەردە 7 652 پەداگوگ-پسيحولوگ جۇمىس ىستەيدى. وڭىرلەردە 1 876 پسيحولوگيالىق قىزمەت جۇمىس ىستەپ تۇر, وندا 11 مىڭنان استام مامان قىزمەت اتقارادى. ءبىلىم بەرۋ ۇيىمدارى مەملەكەتتىك ءبىلىم بەرۋ ۇيىمدارى قىزمەتكەرلەرىنىڭ ۇلگى شتاتتارىنا سايكەس پەداگوگ-پسيحولوگتىڭ شتات بىرلىكتەرىمەن قامتاماسىز ەتىلەدى.
2021-2023 جىلدار ارالىعىندا رەسپۋبليكالىق بيۋدجەت ەسەبىنەن «ورلەۋ» بىلىكتىلىكتى ارتتىرۋ ۇلتتىق ورتالىعى» اق بازاسىندا 97 672 ملن تەڭگە سوماسىنا 1 535 پەداگوگ-پسيحولوگتىڭ بىلىكتىلىگىن ارتتىرۋ جوسپارلانعان», دەلىنگەن مينيستر جاۋابىندا.
ۇسىنىلعان دەرەكتەرگە سايكەس, 2021 جىلى – 500, 2022 جىلى – 500, 2023 جىلى 535 ادام اتالعان ورتالىقتا بىلىكتىلىگىن ارتتىرادى. 2019 جىلعى 1 قىركۇيەكتەن باستاپ ۇلتتىق تەستىلەۋدەن ءساتتى وتكەن جاعدايدا پەداگوگ-پسيحولوگتەرگە پەداگوگيكالىق شەبەرلىك ساناتى بەرىلەدى جانە قوسىمشا اقى تولەنەدى.
«سونىمەن قاتار ءبىلىم بەرۋ ۇيىمدارىندا پسيحولوگيالىق قىزمەت جۇيەسىن ودان ءارى دامىتۋ ءۇشىن قولدا بار دەرەكتەر بويىنشا قوسىمشا 6 900-دەن استام پەداگوگ-پسيحولوگ قاجەت.
جوعارىدا باياندالعاندى ەسكەرە وتىرىپ, بالانىڭ قۇقىقتارىن قورعاۋدى كۇشەيتۋ, تۇرمىستىق زورلىق-زومبىلىققا قارسى ءىس-قيمىل جانە جاسوسپىرىمدەر اراسىندا ءسۋيتسيدتىڭ كوبەيۋى ماسەلەلەرىن شەشۋ جونىندەگى 2020-2023 جىلدارعا ارنالعان جول كارتاسىنىڭ اياسىندا مەملەكەتتىك ءبىلىم بەرۋ ۇيىمدارى قىزمەتكەرلەرىنىڭ ۇلگىلىك شتاتتارىنا وزگەرىستەر ەنگىزۋ كوزدەلگەن. بۇل پەداگوگ-پسيحولوگتەر شتاتىن ۇلعايتۋعا مۇمكىندىك بەرەدى», دەدى ول.
ءمينيستردىڭ ايتۋىنشا, اتالعان جول كارتاسى اياسىندا پەداگوگ-پسيحولوگتەردىڭ قىزمەتىن ادىستەمەلىك سۇيەمەلدەۋ بويىنشا ءىس-شارالار كوزدەلگەن.
«جەرگىلىكتى دەڭگەيدە پەداگوگ-پسيحولوگتەردىڭ قىزمەتىن ادىستەمەلىك سۇيەمەلدەۋدى جانە ۇيلەستىرۋدى قامتاماسىز ەتەتىن وقۋ-ادىستەمەلىك ورتالىقتار جۇمىس ىستەيدى. پەداگوگ-پسيحولوگتەردىڭ قىزمەتىن ادىستەمەلىك سۇيەمەلدەۋ بولىگىندە مينيسترلىك شەتەلدىك ارىپتەستەرمەن (UNICEF) جانە ۇكىمەتتىك ەمەس ۇيىمدارمەن تىعىز جۇمىس جۇرگىزۋدە», دەپ اتاپ وتەدى اسحات ايماعامبەتوۆ.