سپورت بارلىعىنا قول جەتىمدى بولادى. نۇر-سۇلتاندا «قولجەتىمدى سپورت» اتتى جاڭا جوبا باستاۋ الدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
جوبا قالا تۇرعىندارىن سپورتتىڭ 11 تۇرىنە ۇيرەتەدى, وندا 8 جەردە 84 نۇسقاۋشى ساباق وتكىزەدى.
نۇر-سۇلتان قالاسى اكىمدىگىنىڭ قولداۋىمەن, سول سياقتى قالالىق دەنە شىنىقتىرۋ جانە سپورت باسقارماسىنىڭ ۇيىمداستىرۋىمەن بارلىق ساباق تەگىن وتەدى. جوبا 2021 جىلدىڭ جەلتوقسان ايىنىڭ سوڭىنا دەيىن جالعاسادى.
ساباقتار 6 ساياباق پەن 2 سكۆەردە مىناداي سپورت تۇرلەرى بويىنشا وتكىزىلەدى: جۇگىرۋ, كاراتە, سكانديناۆيالىق ءجۇرىس, اسىق اتۋ, ستريتبول, بادمينتون, فيتنەس, زۋمبا. ساباقتار اپتا سايىن سەيسەنبى, بەيسەنبى, سەنبى كۇندەرى ساعات 17:00-دەن 19:00-گە دەيىن وتەدى.
«قولجەتىمدى سپورت تۇرلەرىنىڭ ءبىرى - اسىق اتۋ ۇلتتىق ويىنى. وعان كەز كەلگەن جاستاعى تۇرعىندار قاتىسا الادى. بۇل ۇلتتىق سپورت ءتۇرى, ونى التى جاستان اسقاندار ويناي الادى», دەدى نۇر-سۇلتان قالاسىنىڭ «اسىق ويىنى» فەدەراتسياسىنىڭ پرەزيدەنتى ەسكەندىر راحمەتوۆ.
ايتا كەتۋ كەرەك, جوبا مەملەكەت باسشىسىنىڭ «حالىق بىرلىگى جانە جۇيەلى رەفورمالار – ەل وركەندۋىنىڭ بەرىك نەگىزى» اتتى قازاقستان حالقىنا جولداۋىنىڭ مىندەتتەرىن ىسكە اسىرۋ اياسىندا ازىرلەندى. باعدارلامالىق قۇجاتتا پرەزيدەنت دەنە شىنىقتىرۋدى دامىتۋعا ەرەكشە نازار اۋدارىپ, بۇقارالىق جانە بالالار سپورتىمەن اينالىسۋ ءۇشىن بارلىق جاعدايدى جاساۋدى تاپسىردى.
ەستەرىڭىزگە سالا كەتەيىك, جوبانىڭ سالتاناتتى اشىلۋى وتكەن دەمالىس كۇندەرى استانالىق ساياباقتا «World Class Green» فيتنەس-ورتالىعىنىڭ فيتنەس-نۇسقاۋشىلارى مەن «Azimuth» سپورت كلۋبى سپورتشىلارىنىڭ كورسەتىلىمدەرى ءوتتى. سونىمەن قاتار ساياباققا كەلگەن دەمالۋشىلار اراسىندا اسىق اتۋ ويىنى بويىنشا جاتتىعۋلار وتكىزىلدى.