نۇر-سۇلتان قالاسى كۆي بويىنشا «قىزىل» ايماقتان قانداي جاعدايدا شىعا الاتىنىن ەلوردانىڭ باس سانيتارلىق دارىگەرى سارحات بەيسەنوۆا وكق بريفينگىندە ايتتى, دەپ حابارلايدى Egemen.kz.
باق وكىلدەرى ەلوردا نەگە جارتى جىلدان استام ۋاقىت كۆي بويىنشا «قىزىل» ايماقتان شىقپايتىنىن سۇرادى. بىراق, وعان قاراماستان قالادا كوۆيدتىك ستاتسيونارلار جابىلۋدا: ماسەلەن, ەگەر جازدا ەلوردادا كوروناۆيرۋستىق ناۋقاستاردى ەمدەۋگە ارنالعان توسەك-ورىن قۋاتى 4 مىڭعا جۋىق 16 ستاتسيونار جۇمىس ىستەسە, بۇگىندە 990 توسەك-ورىنعا ارنالعان 7 ينفەكتسيالىق ستاتسيونار جۇمىس ىستەپ تۇر. وسى اپتادا تاعى ءبىر كوۆيدتىك ستاتسيوناردى جابۋ جوسپارلانىپ وتىر.
سارحات بەيسەنوۆا بەلگىلى ءبىر ايماق 100 مىڭ تۇرعىنعا ەسەپتەلەتىن اۋرۋدىڭ قارقىندى كورسەتكىشىنە بايلانىستى «قىزىل», «سارى» نەمەسە «جاسىل» ايماقتارعا قوسىلاتىنىن حابارلادى.
«ەگەر ول 100 مىڭ تۇرعىنعا شاققاندا 100 جاعدايدان اسىپ كەتسە, وندا ءبىز «قىزىل» ايماقتا بولامىز. ءبىز سىرقاتتانۋشىلىقتىڭ ازايۋ ءۇردىسىن كورىپ وتىرمىز, بىراق بۇل رەتتە بىزدە قارقىندى كورسەتكىش - بۇگىنگى كۇنى 172-گە تەڭ, ياعني بۇل 100-دەن جوعارى. سوندىقتان ءبىز «قىزىل» ايماقتا تۇرمىز», دەپ ءتۇسىندىردى ول.
ءوز كەزەگىندە نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ قازىر ستاتسيونارلار جاعدايىندا 578 ادام ەم قابىلداپ جاتقانىن ايتتى.
«بۇل ءبىر دياگنوز ءۇشىن وتە كوپ. كوۆيدتىك توسەكتەردى 4 مىڭنان 990-عا دەيىن, پاتسيەنتتەر سانىن 3 مىڭنان 600-گە دەيىن تومەندەتكەنىمىزگە قاراماستان, اۋرۋ ءالى دە جوعارى. اۋرۋ ءالى جويىلعان جوق», دەدى ول.