اتىراۋ وبلىسىندا كاسپي جاعالاۋىنداعى قامىس ءورتى تولىق سونگەن جوق. جالىندى سوندىرۋگە تىكۇشاقپەن 63 توننا سۋ توگىلدى, دەپ جازادى Egemen.kz.
وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتىنەن ءمالىم ەتكەندەي, 11 قازاندا جەرگىلىكتى ۋاقىتپەن ساعات 12:00-گە دەيىن تەڭىز جاعالاۋىنىڭ 550 گەكتار اۋماعىندا قامىس ورتەنگەن. قازىر ەكى فرونتالدى جانۋ وشاعى انىقتالىپ وتىر.
«ونىڭ ءبىرى يساتاي مەن قۇرمانعازى اۋدانىنىڭ شەكاراسىنداعى ماقاش اۋىلدىق وكرۋگىنىڭ, ال, ەكىنشىسى تەڭىز اۋىلدىق وكرۋگىنىڭ اۋماعىندا ورنالاسقان. ورتەنگەن اۋماق 550 گەكتاردى قۇرايدى. بۇگىنگە دەيىن 420 گەكتار اۋماقتىڭ ءورتى ءسوندىرىلدى. ونىڭ ىشىندە سۋ اعىزۋ قۇرىلعىسىنىڭ كومەگىمەن 35 گەكتاردا, جەكە قۇرامنىڭ كۇشىمەن 197 گەكتاردا جانعان جالىن جويىلدى. ال, 188 گەكتاردىڭ ءورتى وزدىگىنەن ءسوندى» دەپ حابارلادى دەپارتامەنتتىڭ ءباسپاسوز قىزمەتى.
تەڭىز جاعالاۋىندا تۇتانعان جالىندى ءسوندىرۋ ءۇشىن «قازاۆياقۇتقارۋ» اق تىكۇشاعىنىڭ سۋ شاشۋ قۇرىلعىسىمەن 21 رەت سۋ توگىلگەن. جالىندى ءسوندىرۋ ءۇشىن توگىلگەن سۋدىڭ مولشەرى 63 توننا.
ءدال قازىر قامىس ءورتىن ءسوندىرۋ ءۇشىن اتىراۋ وبلىستىق توتەنشە جاعدايلار دەپارتامەنتىنىڭ جەكە قۇرامىنان 34 ادام, 5 تەحنيكا, 4 موتوسورعىش, 1 گەنەراتور, 40 جەڭ, 1 ۇرلەمەلى شاتىر, و.كوشەكوۆ اتىنداعى اتىراۋ اگرارلىق-تەحنيكالىق كوللەدجىنەن 1 ادام, 1 John Deere-6135b تراكتورى, سونداي-اق, «قازاۆياقۇتقارۋ» اق-نىڭ 5 قىزمەتكەرى مەن «مي-871» تىكۇشاعى تارتىلعان.