قازاقستانداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن جاڭارتۋ جونىندەگى جۇمىس توبىنىڭ ءبىرىنشى وتىرىسى ءوتتى, دەپ حابارلايدى Egemen.kz.
شارا مەملەكەت باسشىسىنىڭ 2021 جىلعى 1 قىركۇيەكتەگى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىن ىسكە اسىرۋ اياسىندا بولدى.
اقپارات جانە قوعامدىق دامۋ ۆيتسە-ءمينيسترى اسقار ۋماروۆ جۇمىس توبىنىڭ مۇشەلەرىن تۇجىرىمدامانى جاڭارتۋ بويىنشا جۇمىستىڭ ماڭىزدى باعىتتارىمەن تانىستىردى.
«تۇجىرىمداما مەملەكەت باسشىسىنىڭ ايەلدەردىڭ قوعامداعى ەكونوميكالىق جانە ساياسي ۇستانىمدارىن قولداۋدى قامتاماسىز ەتۋ بويىنشا تاپسىرماسى, جالپىۇلتتىق باسىمدىقتار, مەملەكەتتىك جوسپارلاۋدىڭ جاڭا جۇيەسى, سونداي-اق وتباسىنىڭ ءومىر ءسۇرۋ ساپاسىن ارتتىرۋ, انا مەن بالانى قورعاۋ جونىندەگى جاھاندىق ترەندتەر مەن تەندەنتسيالار ەسكەرىلە وتىرىپ, جاڭارتىلاتىن بولادى», دەدى اسقار ۋماروۆ.
وتىرىس بارسىندا جۇمىس توبىنىڭ مۇشەلەرى قازاقستان رەسپۋبليكاسىنداعى وتباسىلىق جانە گەندەرلىك ساياساتتىڭ الداعى دامۋ ماسەلەلەرىن تالقىلادى جانە قازاقستان رەسپۋبليكاسىنداعى وتباسىلىق جانە گەندەرلىك ساياسات تۇجىرىمداماسىن جاڭارتۋدا ەسكەرىلەتىن بىرقاتار كونسترۋكتيۆتى ۇسىنىستاردى ەنگىزدى.
«حالىق ۇنىنە قۇلاق اساتىن مەملەكەت» ءپرينتسيپىن جۇزەگە اسىرۋ ماقساتىندا جۇمىس توبىنىڭ قىزمەتى اشىق, ترانسپارەنتتى تۇردە بولاتىندىعىن, باق جانە الەۋمەتتىك جەلىلەردە جاريالاناتىندىعىن اتاپ وتكەن ءجون.
جۇمىس توبىنىڭ وتىرىسىنا قر پارلامەنت دەپۋتاتتارى, قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى, عىلىمي-اكادەميالىق سالانىڭ, ۇكىمەتتىك ەمەس, حالىقارالىق ۇيىمداردىڭ جانە مۇددەلى مەملەكەتتىك ورگانداردىڭ وكىلدەرى جانە ساراپشىلار قاتىستى.