مەكتەپتەردە ءۇش مىڭعا جۋىق روبوتوتەحنيكا كابينەتى اشىلدى

كابينەتتە وسى باعىت بويىنشا قىزىعۋشىلىق تانىتاتىن وقۋشىلار ءۇشىن ارنايى ۇيىرمەلەر وتكىزىلەدى. بارلىق كابينەتتە قاجەتتى كومپيۋتەرلىك جابدىقتار جانە وقۋ قۇرالدارى بار. 

«ايتا كەتەيىك, مينيسترلىك تاراپىنان پەداگوگتەردىڭ روبوتوتەحنيكا سالاسىنداعى ءبىلىمى مەن داعدىلارىن جەتىلدىرۋ بارىسىندا جۇمىس جۇرگىزىلدى. سوڭعى ەكى جىلدا ەكى مىڭعا جۋىق مۇعالىم روبوتوتەحنيكا كۋرسىنان ءوتتى», دەپ حابارلايدى قر بعم ءباسپاسوز قىزمەتى.

«روبوتوتەحنيكا ارنايى كونسترۋكتورلاردىڭ كومەگىمەن روبوت جاساۋ دەگەندى بىلدىرەدى. ءاربىر وقۋشى تەك ءدارىس تىڭداپ قانا قويماي, روبوتتى ءوز بەتىنشە جيناي الادى. مۇعالىمدەر بالالاردى مەحانيكانىڭ نەگىزدەرىمەن تانىستىرىپ, ولاردىڭ پراكتيكالىق داعدىسىن دامىتادى. بالالار بۇل پروتسەسكە قاتىسۋ بارىسىندا اسقان قىزىعۋشىلىق تانىتىپ, جوبالارىن ءوز بەتىنشە قۇرۋدى ۇيرەنەدى. بۇل بالالاردىڭ بويىنداعى جاۋاپكەرشىلىك, ءتارتىپ جانە زەيىندى دامىتادى. سونىمەن قاتار روبوتوتەحنيكا بالالاردىڭ فيزيكا, ماتەماتيكا جانە اقپاراتتىق تەحنولوگيالار سالاسىنداعى ءبىلىمىن جەتىلدىرەدى», دەدى قر بعم مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا.

الماس ساربوزوۆ قوستاناي وبلىسى امانتوعاي اۋىلىنداعى شاعىن جيناقتى اۋىل مەكتەبىندە ينفورماتيكا ءپانىنىڭ مۇعالىمى بولىپ ىستەيدى. ەكى جىل بۇرىن ول اۋىل وقۋشىلارىنا ارنالعان روبوتوتەحنيكا ۇيىرمەسىن اشتى. ەگەر باستاپقىدا ۇيىرمەگە 3-4 بالا عانا قىزىعۋشىلىق تانىتسا, قازىر وعان ءار ءتۇرلى جاستاعى 30-عا جۋىق بالا قاتىسادى.

«بالالارعا پايدامدى تيگىزگىم كەلىپ, روبوتوتەحنيكا ۇيىرمەسىن اشتىم. مەكتەپتەگى كابينەت جابدىقتالعان. قازىر وقۋشىلارىمىز ءتۇرلى كونكۋرستارعا قاتىسىپ, جۇلدەلى ورىندارعا يە بولىپ ءجۇر. پاندەميا كەزىندە  بالالار وزدىگىنەن ىسكە قوسىلاتىن سانيتايزەر ويلاپ تاپتى. وقۋشىلار ءتيىستى باعدارلامانى ازىرلەپ, قۇرىلعىنى جينادى. ادام سانيتايزەرگە جاقىنداعان كەزدە ول اۆتوماتتى تۇردە ىسكە قوسىلادى. جاقىن ارادا وقۋشىلارىمىز ەلىمىزدىڭ اتىنان حالىقارالىق جارىستارعا قاتىسىپ, جۇمىسىن كوپشىلىككە تانىستىرادى دەپ ۇمىتتەنەمىن», دەدى روبوتوتەحنيكا ۇيىرمەسىنىڭ جەتەكشىسى الماس ساربوزوۆ.