ەلوردادا قۇرىلىس الاڭىنان ارماتۋرا ۇرلاعان كۇدىكتى جاسوسپىرىمدەر ۇستالدى, دەپ حابارلايدى Egemen.kz.
«16 جاستاعى 2 ءجاسوسپىرىم قۇرىلىس نىسانىنان 1 ملن تەڭگەنىڭ ماتەريالىن ۇرلاپ كەتكەن. كامەلەتكە تولماعان بالالار 5 كۇن بويى كۇزەتى جوق نىساننان ارقايسىسىنىڭ ۇزىندىعى 6 مەتر بولاتىن 39 دانا ارماتۋرانى الىپ شىققان. ۇرلانعان ماتەريالداردى تاياۋ ماڭدا ورنالاسقان مەتالل قابىلداۋ ورنىنا ساتىپ جىبەرگەن. جەدەل ىزدەستىرۋ ءىس-شارالارى بارىسىندا كامەلەتكە تولماعاندار قولعا ءتۇستى. پوليتسيا قىزمەتكەرلەرى ۇرلانعان ارماتۋرالاردى تاركىلەپ, يەسىنە قايتاردى», دەلىنگەن نۇر-سۇلتان قالالىق پوليتسيا دەپارتامەنتى تاراتقان اقپاراتتا.
ۆەدومستۆو مالىمەتىنشە, ۇستالعان بالالار كىنالارىن مويىنداپ وتىر. ولاردىڭ ەلوردا اۋماعىندا جاسالعان وسىنداي قىلمىستارعا قاتىسى تەكسەرىلىپ جاتىر. قازىرگى ۋاقىتتا سوتقا دەيىنگى تەرگەۋ جۇرگىزىلۋدە. جاسوسپىرىمدەردىڭ قۇرىلىس الاڭدارىندا ورىن العان تاعى 3 ۇرلىققا قاتىسى بولۋى مۇمكىن.
«يۋۆەنالدى پوليتسيا قىزمەتكەرلەرى 16 جاستاعى ەكى ءجاسوسپىرىمدى ەرەكشە باقىلاۋعا الدى. ال ولاردىڭ اتا-انالارى بالالارىنا ءتالىم-تاربيە بەرۋ مىندەتتەرىن ورىنداماعانى ءۇشىن اكىمشىلىك جاۋاپكەرشىلىككە تارتىلۋى ىقتيمال», دەدى پوليتسيادان.