بۇگىنگى تاڭدا ەلوردانىڭ 143 مەكتەبىندە, ونىڭ ىشىندە مەملەكەتتىك, جەكەمەنشىك, رەسپۋبليكالىق مەكتەپتەردە 17 981 مۇعالىم جۇمىس ىستەيدى, دەپ جازادى Egemen.kz.
قالادا پەداگوگتەرگە بارلىق جاعداي جاسالىپ جاتىر, دەپ حابارلايدى نۇر-سۇلتان اكىمدىگىنىڭ رەسمي سايتى.
«ۇستاز مارتەبەسى تۋرالى قر زاڭىنىڭ قابىلدانۋىمەن پەداگوگتەردىڭ ەڭبەكاقىسى جىل سايىن كوتەرىلە باستادى. مۇعالىمدەر اتالمىش زاڭنامالىق قۇجاتتى ءوز كاسىبىن قۇرمەتتەۋ مەن تانۋدىڭ بەلگىسى دەپ سانايدى. ماسەلەن, ەلوردالىق مۇعالىمدەردىڭ جالاقىسى سوڭعى ەكى جىلدا – 2020/2021 جىلدارى 50%-كە ءوستى. 2022 جىلى پەداگوگتەردىڭ جالاقىسى تاعى 25%-كە ارتادى. 2021 جىلدىڭ ءبىرىنشى جارتىسىندا نۇر-سۇلتاننىڭ 2384 مۇعالىمى بىلىكتىلىگىن ارتتىرۋ كۋرستارىنان تەگىن ءوتتى.
زاماناۋي الەمنىڭ جاڭا سىن-قاتەرلەرى يننوۆاتسيالىق پەداگوگيكالىق تەحنولوگيالاردى پايدالانۋ, وقۋشىلاردىڭ سىني ويلاۋىن دامىتۋ, شىعارماشىلىق داعدىلارىن اشۋ ماقساتىندا جاڭا وقۋ باعدارلامالارىندا شىعارماشىلىق يدەيالاردى قولدانۋ قابىلەتىن تالاپ ەتەدى. بۇعان ەلوردالىق وقۋشىلاردىڭ ءرىЅا حالىقارالىق ەمتيحانىنداعى جەتىستىكتەرى, سونداي-اق PIRLS حالىقارالىق زەرتتەۋىنە قاتىسۋى مىسال بولا الادى, وندا الەمدىك ءبىلىم بەرۋ ستاندارتتارى بويىنشا فۋنكتسيونالدىق, وقىرماندىق, ماتەماتيكالىق جانە جاراتىلىستانۋ-عىلىمي باعىتتار جۇيەلى دەڭگەيدە باعالانادى.
ەلوردا پەداگوگتەرىنىڭ الدىندا ءبىلىم بەرۋدىڭ الەمدىك ستاندارتتارىنا سايكەس وقىتۋ تاسىلدەرىن قايتا قاراۋ, سونداي-اق بار باعدارلامالاردى جەتىلدىرۋدە ۇلكەن مىندەت تۇر. وسىعان بايلانىستى نۇر-سۇلتاندا «SHARE» حالىقارالىق جوباسى ىسكە اسىرىلۋدا, ونىڭ ماقساتى پەداگوگتەردىڭ زەرتتەۋ قىزمەتى ناتيجەسىندە انىقتالعان مەنەدجمەنت پەن وقىتۋعا وزگەرىستەردى ەنگىزۋ ارقىلى ءبىلىم بەرۋ ساپاسىن ارتتىرۋ بولىپ سانالادى. جوبانى ىسكە اسىرۋ بارىسىندا كەمبريدج ۋنيۆەرسيتەتىنىڭ ءبىلىم بەرۋ فاكۋلتەتىنىڭ باسشىلىعىمەن بىرلەسكەن جۇمىس جۇرگىزىلۋدە.
ەلوردانىڭ 5 مەكتەبىنەن 25 مۇعالىم كەمبريدجدىك ارىپتەستەرىنەن ءبىلىم الدى. ءبىلىم بەرۋ جۇيەسىنىڭ ساپالى كادرلارىن دايارلاۋ ماقساتىندا جوو-لاردا پەداگوگيكالىق ماماندىقتارعا بولىنەتىن گرانتتار سانى ۇلعايۋدا. مىسالى, بيىل استانا حالىقارالىق ۋنيۆەرسيتەتىنە ءتۇسۋ ءۇشىن تالاپكەرلەردەن قۇجاتتار قابىلدانىپ, وندا پەداگوگيكالىق ماماندىقتار بويىنشا 515 گرانت ورنالاستىرىلدى. اتتەستاتتاۋ قورىتىندىسى بويىنشا مۇعالىمدەرگە پەداگوگيكالىق شەبەرلىگى ءۇشىن 30%-تەن 50%-كە دەيىن, ءبىلىم بەرۋ ۇيىمدارىنىڭ باسشىلارى مەن باسشى ورىنباسارلارى ءۇشىن لاۋازىمدىق جالاقىسىنىڭ 30%-تەن 100%-كە دەيىن قوسىمشا اقى تولەۋ كوزدەلگەن.
پەداگوگتەردىڭ ءوز سالالارىنداعى جەتىستىكتەرى جەكە كوتەرمەلەنەدى. جايلى تۇرعىن ءۇي جاعدايلارى دا جاسالۋدا. 2019 جىلى «تۋعان جەر» باعدارلاماسى اياسىندا جاس مۇعالىمدەرگە ارنالعان 350 ورىندىق جاتاقحانا سالىندى. ورىن ەلوردالىق ءبىلىم بەرۋدى دامىتۋعا ۇلەس قوسۋ ءۇشىن قازاقستاننىڭ باسقا وڭىرلەرىنەن كەلگەن پەداگوگتەرگە بەرىلەدى. سونىمەن قاتار, مۇعالىمدەرگە تۇرعىن ءۇي ساتىپ الۋعا باستاپقى جارنا تولەۋ ءۇشىن تۇرعىن ءۇي سەرتيفيكاتتارى بەرىلەدى.
ايتا كەتۋ كەرەك, بيىلعى وقۋ جىلىندا رەسپۋبليكالىق «ۇزدىك پەداگوگ» بايقاۋىندا ەلوردانىڭ 5 مۇعالىمى جەڭىمپاز اتاندى. «بۇگىنگى تاڭدا مۇعالىمدەرىمىز ەلىمىزدىڭ ءبىلىم بەرۋ پروتسەسىنە عانا ەمەس, سونىمەن قاتار الەمدىك ءبىلىم بەرۋ كەڭىستىگىنە ينتەگراتسيالاۋعا باعىتتالعان», دەپ اتاپ ءوتتى ەلوردالىق ءبىلىم باسقارماسىنان.