كەشە قازاقستان رەسپۋبليكاسى پرەمەر-ءمينيسترىنىڭ ورىنباسارى گۇلشارا ابدىقالىقوۆانىڭ, پارلامەنت دەپۋتاتتارىنىڭ, پرەزيدەنت اكىمشىلىگى, ۇكىمەت وكىلدەرىنىڭ, ورتالىق جانە جەرگىلىكتى مەملەكەتتىك ورگانداردىڭ, مادەنيەت جانە اقپارات مينيسترلىگىنە ۆەدومستۆولىق باعىنىستى ۇيىمداردىڭ, قوعامدىق ۇيىمداردىڭ, باق باسشىلارىنىڭ قاتىسۋىمەن مادەنيەت جانە اقپارات مينيسترلىگىنىڭ كەڭەيتىلگەن القا وتىرىسى ءوتتى.
مادەنيەت جانە اقپارات ءمينيسترى مۇحتار قۇل-مۇحاممەد ءوز سوزىندە مينيسترلىكتىڭ 2013 جىلعى جۇمىسىن قورىتىندىلاپ, مەملەكەت باسشىسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىن جۇزەگە اسىرۋدا سالا الدىندا تۇرعان مىندەتتەرگە توقتالدى. بايانداماشى قازاقستاندىقتاردىڭ باسەكەگە قابىلەتتى مادەني ءدىلىن قالىپتاستىرۋعا, زاماناۋي مادەنيەت كلاستەرلەرىن دامىتۋعا باعىتتالعان قازاقستان رەسپۋبليكاسىنىڭ ءمادەني ساياساتىنىڭ ۇزاقمەرزىمدى تۇجىرىمداماسىن ءازىرلەۋدىڭ ماڭىزدىلىعىن مادەنيەتتىڭ بارلىق سالاسى, شىعارماشىلىق قاۋىمداستىق بۇل قادامدى ەلباسى ۇسىنعان وتاندىق مادەنيەت پەن ونەردىڭ جاڭا بەلەستەرگە جەتۋىنىڭ, قازاقستاندىق قوعامنىڭ بىرەگەي شىعارماشىلىق الەۋەتىن جۇزەگە اسىرۋدىڭ ەرەكشە مۇمكىندىگى دەپ قابىلداپ وتىرعانىن اتاپ كورسەتتى. تۇجىرىمدامانىڭ باستى يدەيالىق ىرگەتاسى مەملەكەت باسشىسى ءوزىنىڭ جولداۋىندا ايتقان ماڭگىلىك ەل يدەياسى بولۋى ءتيىس ەكەندىگى باسا ايتىلدى.
سالانىڭ جاي-كۇيى تۋرالى اڭگىمەلەگەن مينيستر 20 جىل ىشىندە ەلدە 2 مىڭنان استام مادەنيەت نىساندارى اشىلعانىن تىلگە تيەك ەتتى. سوڭعى ون جىل ىشىندە تەاتر, كينو كورەرمەندەرىنىڭ, مۇراجايلارعا كەلۋشىلەردىڭ, كىتاپحانا وقىرماندارىنىڭ, كونتسەرتتىك باعدارلامالاردى تاماشالاۋشىلاردىڭ سانى ايتارلىقتاي ارتقان.
مادەنيەت سالاسىنىڭ پروبلەمالارىن شەشۋدىڭ باستى جولدارى 2030 جىلعا دەيىنگى الەۋمەتتىك جاڭعىرتۋدىڭ تۇجىرىمداماسى مەن جوسپارىنىڭ جوباسىنا بولەك تاراۋ بولىپ ەندى. مادەنيەت ۇيىمدارىنىڭ تيپتىك شتاتتارى, مادەنيەت ۇيىمدارىن ديففەرەنتسيالىق سۋبسيديالاۋدىڭ جاڭا ەرەجەلەرى بەكىتىلدى, 300 ورىنعا ارنالعان مادەنيەت ءۇيىنىڭ تيپتىك جوباسى ازىرلەندى, مادەنيەت جانە مۇراعاتتىق ءىس قىزمەتكەرلەرىنىڭ ازاماتتىق قىزمەتكەرلەر رەتىندەگى ەڭبەكاقىسىن تولەۋدىڭ جاڭا مودەلى ادىسنامالىق تۇرعىدا ازىرلەندى.
مينيستر مەملەكەت باسشىسىنىڭ 2015 جىلعى 1 شىلدەدەن باستاپ ازاماتتىق قىزمەتكەرلەردىڭ جالاقىسىن ارتتىرۋ تۋرالى تاپسىرماسىنىڭ مادەنيەت جانە مۇراعات ءىسى سالاسىنا تولىقتاي قاتىسى بار ەكەنىن ەرەكشە اتاپ ءوتتى.
جاڭا «استانا وپەرا» مەملەكەتتىك وپەرا جانە بالەت تەاترى, قازاق ۇلتتىق مۇراجايى قۇرىلدى, تۇڭعىش ۇلتتىق كوركەمونەر گالەرەياسى قۇرىلۋدا, «كازسپورت», «ءبىلىم جانە مادەنيەت» جاڭا تەلەارنالارى اشىلدى.
القا وتىرىسىندا م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى ەركىن جۋاسبەك, «ءبىلىم جانە مادەنيەت» تەلەارناسىنىڭ ديرەكتورى باقىت قايىربەكوۆ, ل.ن.گۋميلەۆ اتىنداعى ەۇۋ-ءدىڭ ازاماتتىق-قۇقىقتىق پاندەر كافەدراسىنىڭ پروفەسسورى, «ەۋرازيالىق قۇقىق قورعاۋ ورتالىعى» قق ساراپشىسى زاڭ عىلىمدارىنىڭ دوكتورى ەڭلىك نۇرعاليەۆا, الماتى وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ باسشىسى راحمەت ەسداۋلەتوۆ ءسوز سويلەدى.
القا وتىرىسىن قازاقستان رەسپۋبليكاسى پرەمەر-مينيسترىنىڭ ورىنباسارى گۇلشارا ابدىقالىقوۆا قورىتىندىلاپ, مينيسترلىككە بىرقاتار ناقتى تاپسىرمالار مەن ۇسىنىمدار بەردى.
«ەگەمەن-اقپارات».