ەلباسى قازاقستان حالقىنا ارناعان «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا الداعى ءۇش جىلدا مەكتەپ جەتىسپەۋشىلىگىن جويىپ, ءبىلىم وردالارىن مۇمكىندىگىنشە ەكى اۋىسىمعا اۋىستىرۋ كەرەكتىگىن, 2020 جىلعا قاراي قازاقستانداعى 3-6 جاس ارالىعىنداعى بالالاردى مەكتەپكە دەيىنگى بىلىممەن 100 پايىز قامتۋ جوسپارلانعانىن ايتىپ ءوتتى. سونداي-اق, وقۋشىلارعا زاماناۋي باعدارلامالار مەن وقىتۋ ادىستەمەلەرىن, بىلىكتى ماماندار ۇعىندىرۋىنىڭ ماڭىزدىلىعى, ورتا ءبىلىم بەرۋ جۇيەسىندە جالپى مەكتەپتەردى نازارباەۆ زياتكەرلىك مەكتەپتەرىندەگىدەي وقىتۋ دەڭگەيىنە جەتكىزۋ كەرەكتىگىن شەگەلەي تۇسكەنى ءمالىم. مەكتەپ تۇلەكتەرى قازاق, ورىس جانە اعىلشىن تىلدەرىن ءبىلۋى, سىندارلى ويلاۋ, وزىندىك ىزدەنىس پەن اقپاراتتى تەرەڭ تالداۋعا ماشىقتانۋى دا قاجەت. وقۋ ۇلگەرىمى جوعارى ستۋدەنتتەر مەن وقۋشىلارعا قولداۋ كورسەتۋدىڭ ءتيىمدى جۇيەسىن قۇرۋ قاجەتتىگىن العا تارتتى. مۇنىڭ ءوزى جاس جەتكىنشەكتەردى قولداپ, جاس ۇرپاقتىڭ الاڭسىز ءبىلىم الۋى ءۇشىن قولعا الىنىپ وتىرعان يگى ءىس. ءبىلىم ساپاسىن كوتەرىپ, مۇعالىم بەدەلىن ارتتىرۋ, جاڭا مەكتەپ, بالاباقشا سالۋ سىندى جۇمىستار ەلباسى تاپسىرماسىنا سايكەس, كەزەڭ-كەزەڭىمەن وڭىرىمىزدە جۇزەگە اسىرىلۋدا. وتكەن جىلى اۋدانىمىزدا سالىنعان جاڭا №4 ورتا مەكتەپ پايدالانۋعا بەرىلسە, 2 بالاباقشا اشىلىپ, م.تايپوۆ اتىنداعى مەكتەپ كۇردەلى جوندەۋدەن ءوتتى. ەلباسى جولداۋىندا 2015 جىلعى 1 شىلدەدەن باستاپ ءبىلىم بەرۋ سالاسىنداعى قىزمەتكەرلەردىڭ جالاقىسىن 29 پايىزعا دەيىن ءوسىرۋ ۇستازدار جۇمىسىنا سونى سەرپىن بەرەدى. مۇعالىمدەر مەرەيىن ۇستەم ەتىپ, كەلەشەكتەن زور ءۇمىت كۇتتىرگەن جولداۋعا قاشاندا قولداۋ كورسەتۋ ءبىزدىڭ باستى مىندەتىمىز. ەلباسى جولداۋىن الدىمەن قولداۋشى دا, جالعاۋشى دا ۇستازدار قاۋىمى بولماق. ويتكەنى, ءبىز مۇعالىمدەر وقۋشىلارعا دۇرىس باعىت-باعدار بەرە وتىرىپ, ەلىمىزدىڭ بولاشاعىن قالاۋعا اتسالىسۋشىلارمىز. قازاقستاننىڭ كەلەشەگى – ءبىلىمدى ۇرپاق.
نازگۇل حەليلوۆا,
دولايتى ورتا مەكتەبى مۋزىكا ءپانىنىڭ مۇعالىمى.
الماتى وبلىسى,
ۇيعىر اۋدانى.