وبلىسقا بالامالى ەنەرگەتيكا سالاسىندا جۇمىس ىستەيتىن بىرقاتار شەتەلدىك كومپانيالاردىڭ باسشىلارى كەلدى. Strand Partners كومپانياسىنىڭ ديرەكتورى امين ادجەمي, United Green Group كومپانياسىنىڭ ينۆەستيتسيالار جونىندەگى ديرەكتورى البرەحت فريشەنشلياگەر, Ecap Solution نەمىس كومپانياسىنىڭ باسقارۋشى ديرەكتورى ماركۋس حايس جانە قازاقستاندىق كومپانيالاردىڭ باسشىلارى وبلىستا قۋاتى 300 مۆت قۇرايتىن كۇن ەلەكتر ستانسالارىن سالۋ جوباسىن تالقىلادى. تالقىلاۋ بارىسىندا اتالعان جوبامەن وبلىس اكىمى كارىم كوكىرەكباەۆ تا مۇقيات تانىستى.
«Ecap Solution» نەمىس كومپانياسى اعىمداعى جىلى جۋالى اۋدانىندا قۋاتى 50 مۆت قۇرايتىن كۇن ەلەكتر ستانساسىن سالۋدى جوسپارلاپ وتىر, ولار ونى 2015 جىلى پايدالانۋعا بەرمەك. جالپى, نەمىس كومپانياسى وبلىس بويىنشا قايتا قالپىنا كەلەتىن ەنەرگيا كوزدەرى سالاسىندا بىرنەشە جوبا ۇسىنعان. سونىڭ ىشىندە, 2015 جىلى 3 جوبا, 2016 جىلى 2 جوبانى ىسكە اسىرۋدى ماقسات ەتۋدە. كۇن ەلەكتر ستانسالارىنىڭ ارقايسىسىنىڭ قۋاتى 50 مۆت-نى قۇراماق.
وبلىس اكىمى ۇسىنىلعان يننوۆاتسيالىق جوبالاردىڭ ماڭىزدىلىعىنا جانە ايماق ەكونوميكاسىنا تىڭ سەرپىن بەرەتىندىگىنە توقتالىپ, جوباعا كەرەكتى ينفراقۇرىلىمدى «بيزنەستىڭ جول كارتاسى-2020» مەملەكەتتىك باعدارلاماسى اياسىندا جۇرگىزۋدى ۇسىندى. سونىمەن قاتار, ينۆەستورلار اتالعان جوبا بويىنشا «تاراز» اكق» اق جانە «كەگوك» اق-پەن ىنتىماقتاستىق قارىم-قاتىناس ورناتپاقشى.
وڭىردە قازىردىڭ وزىندە 188 مۆت قۇرايتىن بالامالى ەنەرگەتيكا نىساندارى سالىنىپ جاتىر. بۇگىندە وبلىستا وسىنداي 5 جوبا جۇزەگە اسىرىلعان. ۇستىمىزدەگى جىلى قورداي جەل ەلەكتر ستانساسىنىڭ 4 مەگاۆاتتى قۇرايتىن العاشقى كەزەگىنىڭ قۇرىلىسى اياقتالادى. ونىڭ قۋاتى 2014-2015 جىلدارى 21 مۆت-عا جەتكىزىلەدى. سونىمەن قاتار, ينۆەستورلار قۋاتى 100 مەگاۆاتتى قۇرايتىن جاڭاتاس جەل ەلەكتر ستانساسىنىڭ, 19,8 مەگاۆاتت قۋاتى بار مەركى گەس-ءنىڭ كاسكادى قۇرىلىسىنىڭ جانە جامبىل اۋدانىنداعى 24 مەگاۆاتتى قۇرايتىن كۇن ەلەكتر ستانساسىنىڭ قۇرىلىسىن جۇرگىزبەك. سونىڭ ناتيجەسىندە الداعى جىلدارى وبلىستاعى بالامالى ەنەرگەتيكانىڭ ۇلەسى 40 پايىزعا جەتكىزىلمەك.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى.