«الماتى-وسكەمەن» تاس جولىندا ەكى كولىك سوقتىعىسىپ, 5 ادام زارداپ شەككەن, دەپ حابارلايدى Egemen.kz.
شقو پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, جول-كولىك وقيعاسى رەسپۋبليكالىق ماڭىزى بار «الماتى-وسكەمەن» تاس جولىنىڭ 13-شاقىرىمىندا بولعان.
«Lada» ماركالى اۆتوكولىكتى تىزگىندەگەن 31 جاستاعى جۇرگىزۋشى وسكەمەن قالاسىنان جارما اۋدانى كالباتاۋ اۋىلىنا قاراي باعىت العان. الدىندا كەلە جاتقان باسقا «Lada» كولىگىن باسىپ وزباق بولعان ول ابايسىزدا سوقتىعىسىپ قالدى», دەپ حابارلادى ۆەدومستۆو وكىلدەرى.
جول اپاتى سالدارىنان ەكىنشى كولىكتى باسقارىپ كەلە جاتقان 19 جاستاعى جۇرگىزۋشى مەن 4 جولاۋشى دەنە جاراقاتىن العان. ولارعا وسكەمەندەگى وبلىستىق مامانداندىرىلعان مەديتسينالىق ورتالىق قىزمەتكەرلەرى كومەك كورسەتتى. ال ءتارتىپ ساقشىلارى وقىس وقيعاعا كىنالى ەر ادامدى اكىمشىلىك جاۋاپكەرشىلىككە تارتتى.