اقتوبە قالاسىنداعى №12 شاعىن اۋدانىندا تاعى ءبىر جاڭا دەنساۋلىق ساقتاۋ سالاسىنىڭ نىسانى بوي كوتەردى. جاقىندا وسى №3 قالالىق ەمحانانىڭ سالتاناتتى اشىلۋى بولدى. بۇل ەمحانا №11 جانە №12, سونداي-اق, «كوكتەم» جانە «بولاشاق» اۋداندارىندا تۇراتىن 68,5 مىڭ ادامعا جوعارى ساپالى مەديتسينالىق قىزمەت كورسەتەتىن بولادى. ولاردىڭ 23 مىڭىن 15 جاسقا دەيىنگى بالالار قۇرايدى. بۇرىن وسى ەمحانا ورنالاسقان «سازدى» جانە «بولاشاق» شاعىن اۋداندارىنداعى ەمدەۋ ورىندارى بۇدان بىلاي فيليال رەتىندە جۇمىس ىستەي بەرەدى.
جاڭا ەمحانا اۋىسىمىنا 500 ادامدى قابىلدايدى. ەمحانا وسى زامانعى وزىق مەديتسينالىق تەحنيكالارمەن جاراقتاندىرىلعان. مۇندا فينليانديادان جانە ۆەنگريادان شىعارىلعان رەنتگەن قوندىرعىلارىمەن جابدىقتالعان ساۋلەلىك دياگنوستيكا ءبولىمشەسى بار. تەلەديدارمەن باسقارىلاتىن رەنتگەن اپپاراتى, مامموگراف جانە فليۋروگرافيالىق اپپارات جۇمىس ىستەپ تۇر. مامانداردىڭ بولمەلەرى اسقازان اۋرۋلارىن انىقتايتىن بەينەەندوسكوپيالىق جۇيەمەن, ۋلترادىبىستىق زەرتتەۋلەر جۇرگىزەتىن اپپاراتتارمەن جاراقتاندىرىلعان. ءتىس, كوز جانە لور دارىگەرلەرىنىڭ جۇمىس ورىندارى اۆتوماتتاندىرىلعان جۇيەلەرمەن قامتاماسىز ەتىلگەن. اۋرۋدى انىقتاۋ مۇمكىندىگىن كەڭەيتۋ ءۇشىن ەمحاناعا بيوحيميالىق, گەماتوگيالىق جانە يممۋنوفەرمەنتتىك زەرتحانالىق قوندىرعىلار ورناتىلعان.
جاڭا ەمحانانى پايدالانۋعا بەرۋگە بيۋدجەتتەن 1,2 ميلليارد تەڭگە قارجى جۇمسالدى. ونىڭ 800 ميلليون تەڭگەسىنە قۇرىلىس جۇمىستارى جۇرگىزىلسە, 400 ميلليون تەڭگەسىنە مەديتسينالىق قۇرال-جابدىقتار ساتىپ الىندى. ەمحانانىڭ باس دارىگەرى ءجانىبەك نارمۇحامەدوۆتىڭ ايتۋىنشا, ەمدەۋ مەكەمەسىنە قاجەتتى مامان دارىگەرلەر مەن مەدبيكەلەر تولىق قابىلدانىپتى. قازىر مۇندا 471 دارىگەر مەن مەدبيكە جۇمىس ىستەيدى. وتكەن جىلى م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىن بىتىرگەن ءۇش جاس ماماندى قابىلداپ, الماتىدا ءوز سالالارى بويىنشا ماماندانۋ كۋرسىنان وقىتىپ العان.
وبلىس ورتالىعىنداعى جاڭا №3 قالالىق ەمحانانىڭ سالتاناتتى اشىلۋىنا ارنايى كەلگەن وبلىس اكىمى ارحيمەد مۇحامبەتوۆ وتكەن جىلى دەنساۋلىق ساقتاۋ سالاسىن قارجىلاندىرۋعا 2,7 ميلليارد تەڭگە بولىنگەنىن, شۇبارقۇدىق اۋىلىندا 250 ورىندىق اۋرۋحانا, اقتوبەدە 300 ورىندىق ەرەسەكتەر اۋرۋحاناسى, سونداي-اق, 9 دارىگەرلىك امبۋلاتوريا پايدالانۋعا بەرىلگەنىن اتاپ ءوتتى. سالانى قارجىلاندىرۋ بيىل دا ارتا تۇسەتىنىن جەتكىزدى. ەندى وسى اۋداندا 600 ورىندىق ورتا مەكتەپ سالىناتىنىن ايتتى. شاعىن اۋدان تۇرعىندارى اتىنان ءسوز العان امانگەلدى ەسقاليەۆ تۇرعىندارعا قاجەتتى الەۋمەتتىك ماسەلەلەردى شەشۋدەگى يگى ىستەرى ءۇشىن ەلباسىنا جانە ءوڭىر باسشىسىنا ريزاشىلىعىن ءبىلدىردى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.