قوجالىق توراعاسى ايتكەن شورمانوۆ تاپقان تابىسىنىڭ ءبىر بولىگىن قايىرىمدىلىق شارالارىنا جۇمسايدى
شەمونايحا اۋدانىنىڭ اكىمى امانگەلدى توقتاروۆ قازىرگى كەزدە وڭىردە 28 مىڭنان استام ءىرى قارا,14 مىڭ قوي-ەشكى بار ەكەنىن, تىركەلگەن 334 شارۋا قوجالىقتارىنىڭ بيىل 5028 توننا ەت, 32 مىڭ توننادان استام ءسۇت وندىرگەنىن, اۋىلشارۋاشىلىق قۇرىلىمدارى سوڭعى ەكى جىلدا عانا 2 ميلليارد تەڭگەگە تەحنيكالار ساتىپ العانىن ايتا كەلىپ, ۆولچانكا اۋىلدىق وكرۋگىنە بارىپ كەلۋىمىزگە ءوتىنىش جاسادى. بۇل اۋىلدا ايتكەن شورمانوۆ دەگەن ىسكەر ازاماتتىڭ تۇراتىنىن, بيىل مول تابىسقا جەتكەنىن, سول جەردەگى پاناجايعا (پريۋت) كومەك جاسايتىنىن, ونىڭ ۇستىنە ازاماتتىڭ قايىرىمدىلىق شارالارىنا بەلسەنە ارالاساتىنىنان حاباردار ەتتى.
ۆولچانكا اۋىلدىق وكرۋگىنىڭ اكىمى الەكساندر گەككتىڭ ۇلتى نەمىس ەكەن. بۇل اۋىلعا نەمىستەر سوناۋ اۋمالى-توكپەلى زاماندا قونىس اۋدارعان. ءبىرازى وزدەرىنىڭ تاريحي وتانىنا كوشىپ كەتكەن. قالعانى التى-جەتى وتباسى.
– وسىندا تۋىپ-وستىك. ءبىزدىڭ وتانىمىز – قازاقستان. قازاقتار قيىن-قىستاۋ كەزدە تورىنەن ورىن بەردى, قازىر قۇداندالى بولىپ جاتىرمىز. شاعىن عانا اۋىلدا بىرنەشە ۇلتتىڭ وكىلدەرى تاتۋلىقپەن ءومىر ءسۇرىپ جاتىر. ورتا مەكتەپتە شاعىن ورتالىق بار. 20 جىل بويى مادەنيەت ءۇيى قاڭىراپ بوس تۇردى, ەندى ونى جوندەپ جاتىرمىز. اۋداندىق بيۋدجەت پەن ايتكەن شورمانوۆ كۇردەلى قۇرىلىسقا قىرۋار قارجى ءبولدى, – دەپ اۋىل اكىمى ءبىزدى ورتالىقتاعى ەكى قاباتتى مادەنيەت ۇيىنە ەرتىپ كەلدى.
ەدەنىنە پاركەت توسەلگەن, ايناداي جارقىراعان بولمەلەردە كىتاپحانا, مۋزىكا زالى, بيشىلەر جاتتىعاتىن ورىن بار. قاراشانىڭ 15-جۇلدىزىندا مادەنيەت ءۇيى سالتاناتتى جاعدايدا اشىلدى, دەپ اۋدان اكىمى ا.توقتاروۆ حاباردار ەتتى.
ەكى قاباتتى پاناجايعا كەلدىك. ول 2001 جىلى اشىلعان. مۇندا 3 جاسپەن 16 جاس ارالىعىنداعى اسىراۋشىسىنان ايىرىلعان نەمەسە اكەسى مەن شەشەسى جوق, تۇرمىسى ناشار جانداردىڭ بالالارى تاربيەلەنەدى ەكەن. ايتكەن شورمانوۆ پاناجايدىڭ سۋ قۇبىرىن تارتىپ بەرىپتى, ازىق-ت ۇلىكپەن دە كومەكتەسىپ تۇرادى. پاناجاي ديرەكتورىنىڭ ورىنباسارى گالينا كاليستراتوۆا تاربيەلەنۋشىلەرگە كۇنىنە ءتورت رەت تاعام بەرىلەتىنىن, اۋدان اكىمى مەن قوجالىق توراعاسىنا ىستىق ىقىلاسىن ءبىلدىردى.
– اۋىل شارۋاشىلىعىندا 30 جىلدان استام ەڭبەك ەتىپ كەلەمىن. كەڭشارعا دا جەتەكشىلىك ەتتىم. بىلتىر 3,5 مىڭ گەكتارعا ەگىن ەگىپ, ءار گەكتارىنان 19 تسەنتنەردەن استىق باستىردىق. 300 گەكتارعا قاراقۇمىق, 300 گەكتارعا س ۇلى ەگىپ ەدىك, ونىڭ ءتۇسىمى جامان ەمەس. بىزدە 140 ادام ەڭبەك ەتەدى, جالاقىلارىن اي سايىن الىپ تۇرادى. ن.كنيجەنتسەۆ, س.كوراچەۆ سياقتى ازاماتتىڭ ەڭبەگىنە ريزامىن. بيىلدىڭ وزىندە 10 ميلليون تەڭگەنى قايىرىمدىلىق شارالارىنا جۇمسادىم, دەيدى ايتكەن كامەن ۇلى.
– ايتكەندەي جانى جايساڭ, جومارت جاندار ارامىزدا كوپ بولسا, الار اسۋىمىز بيىكتەي بەرمەك, – دەپ وبلىستىق اۋىل شارۋاشىلىعى باسقارماسىنىڭ باستىعى دۇيسەمباي سەليحانوۆ جىلى لەبىز ءبىلدىردى.
جەتىمدەردى جەبەگەن ازاماتتىڭ بۇل ءىسى باسقالارعا دا ۇلگى بولعاي!
وڭداسىن ەلۋباي, «ەگەمەن قازاقستان».
شىعىس قازاقستان وبلىسى,
شەمونايحا اۋدانى.