پرەزيدەنت نۇرسۇلتان نازارباەۆ ارنايى ىسساپارمەن اتىراۋ وبلىسىنا كەلدى. بۇل تۋرالى «قازاقستان» تەلەارناسى حابارلادى.
ساپار بارىسىندا مەملەكەت باسشىسىنىڭ بىرقاتار نىسانداردى ارالاۋى, سونداي-اق وبلىس جۇرتشىلىعى وكىلدەرىمەن كەزدەسۋى جوسپارلانعان. بۇگىن سونىڭ ءبىرى -نازارباەۆ زياتكەرلىك مەكتەبىندە بولدى. حيميالىق-بيولوگيالىق باعىتتاعى 720 وقۋشىعا ارنالعان بۇل ءبىلىم مەكەمەسى 2013 جىلدىڭ قىركۇيەك ايىندا اشىلعان.
مەكتەپتە قاتاڭ ىرىكتەۋدەن وتكەن ايماق ۇستازدارى ساباق بەرەدى. سونداي-اق اقش, ۇلىبريتانيا ,رۋمىنيا, يرلانديا ەلدەرى مەن وڭتۇستىك افريكا رەسپۋبليكاسىنان كەلگەن 12 وقىتۋشى بار. ارنايى بەكىتىلگەن كونكۋرستىق كوميسسيا ۇسىنىسىنا ساي, وسىندا قىزمەت جاساۋ ءۇشىن 134 ادام ىرىكتەلگەن. سونىڭ ىشىندە 33 قىزمەتكەر مۇعالىمدەردىڭ بىلىكتىلىگىن ارتتىرۋدىڭ ءۇش دەڭگەيلى كۋرستارىنان ءوتىپتى. ال 4 ۇستاز نازارباەۆ ۋنيۆەرسيتەتى بازاسىنداعى جىلدىق كۋرستى بىتىرگەن ەكەن. جالپى ايتقاندا, ءبىر بوس ورىنعا 6 ادام ۇمىتكەر بولعان.
نازارباەۆ زياتكەرلىك مەكتەبىنىڭ 7-8-9-10 سىنىپتارىندا وقۋ ءۇشىن كونكۋرستىق ىرىكتەۋگە 2978 ءوتىنىش كەلىپ تۇسكەن. تاعى ءبىر دەرەك, «وركەن» گرانتىنىڭ 679 وقۋشىعا بەرىلگەنى ءمالىم بولدى. ال 7 سىنىپتا ءبىلىم الۋ ءۇشىن كونكۋرس ستراتەگيالىق سەرىكتەستەر - نيدەرلاندىداعى پەداگوگيكالىق ءبىلىم ينستيتۋتىمەن (Cito) جانە اقش-تاعى دجونس حوپكينس ۋنيۆەرسيتەتىنىڭ تالانتتى جاستار ورتالىعىمەن (CTY) بىرلەسە جۇرگىزىلدى.
ساپار اياسىندا ەلباسى اتىراۋ مۇناي وڭدەۋ زاۋىتىن ارالاپ, جۇزەگە اسىپ جاتقان ەكى ينۆەستيتسيالىق جوبامەن تانىستى. ول بويىنشا بيىل ۇدەمەلى يندۋستريالىق- يننوۆاتسيالىق دامۋ باعدارلاماسى شەڭبەرىندە اراماتيكالىق كومىرسۋتەك شىعاراتىن كەشەننىڭ ىسكە قوسىلاتىنى ءمالىم بولدى. ال ەكى جارىم جىلدان سوڭ مۇنايدى تەرەڭ وڭدەۋ كەشەنىن تاپسىرۋ جوسپارلانىپ وتىر.
ءامىرحان الماعانبەتوۆ.
دەرەككوز: «قازاقستان» تەلەارناسى, «حابار» تەلەارناسى.
فوتو: اقوردا. kz.