جۇيەلى قۇرىلعان كومپوزيتسيا ءارى دۇرىس تاڭدالعان راكۋرس – ءساتتى كادردىڭ كەپىلى. ءفوتوتىلشىنىڭ بويىندا بولۋى ءتيىس وسى جانە وزگە دە قاسيەتتەر مەن داعدىلار جايلى ەۋرازيا ۇلتتىق ۋنيۆەرسيتەتى ۇيىمداستىرعان ZEREN-photo-fest بايقاۋىندا جان-جاقتى ساراپتالدى.
ەكى كۇنگە سوزىلعان فوتوتىلشىلەردىڭ شىعارماشىلىق سايىسىندا جۋرناليستيكا جانە ديزاين ماماندىقتارىن مەڭگەرىپ جاتقان ستۋدەنتتەر ۇزدىك شەبەرلەرمەن تاجىريبە الماسىپ, فوتوپورترەت, پەيزاج, فوتورەپورتاج, فوتووچەرك سىندى جانرلاردا ءساتتى كادر شىعارا ءبىلۋدىڭ تاسىلدەرى مەن داعدىلارىنا قانىقتى.
اتاپ ايتقاندا, فوتوونەرگە بەيىلى بار جاستارعا سوۆەتبەك ماعزۇم, شۇكىر شاحاي, ورىنباي بالمۇرات سىندى وتاندىق فوتوجۋرناليستيكا مايتالماندارىنىڭ شەبەرلىك ساعاتتارىنا قاتىسىپ, كاسىبي كەڭەس الۋعا مۇمكىندىك تۋدى.
ءتورت كەزەڭنەن تۇرعان بايقاۋدا قاتىسۋشىلار ارنايى تاپسىرمالاردى ورىنداپ, بار ونەرىن ورتاعا سالدى.
ەلتاڭبا اۆتورى جانداربەك مالىبەكوۆ باستاعان قازىلار القاسى ۇسىنىلعان جۇمىستاردى تابيعات كورىنىستەرىندەگى گوريزونت, راكۋرس, كومپوزيتسيا, الدىڭعى جانە ارتقى پلان, دياگونالدار ەرەجەسىنىڭ ساقتالۋى سىندى تالاپتارعا سايكەس باعالاپ, ۇزدىكتەردى انىقتادى.
ايتالىق, «ۇزدىك فوتوپورترەت» جانرىندا «Egemen Qazaqstan» گازەتىنىڭ ءفوتوتىلشىسى ەرلان وماروۆ توپ جاردى. «ۇزدىك فوتوپەيزاج» اتالىمىندا National Geographic جۋرنالىنىڭ ءفوتوتىلشىسى ەربولات شادراحوۆ جەڭىمپاز دەپ تانىلسا, «ۇزدىك فوتوەتيۋد» ساناتىندا «ارقا اجارى» گازەتىنىڭ ءفوتوتىلشىسى سوۆەتبەك ماعزۇم ءبىرىنشى ورىن يەگەرى اتاندى. «ۇزدىك فوتورەپورتاج» جانرىندا Tengrinews اقپاراتتىق سايتىنىڭ ءفوتوتىلشىسى تۇرار قازانعاپوۆتىڭ جۇمىسى جوعارى باعاعا يە بولدى. «ۇزدىك فوتووچەرك» اتالىمىندا كاzaknews.kz ءفوتوتىلشىسى دوعان يىلدىز ءبىرىنشى ورىندى يەلەندى. «ۇزدىك ءفوتوتىلشى» جۇلدەسى پرەمەر-ءمينيستردىڭ ءفوتوتىلشىسى شۇكىر شاحاي مەن «Egemen Qazaqstan» گازەتىنىڭ ارداگەرى ورىنباي بالمۇراتقا بەرىلدى. سونداي-اق ۇزدىك اتانعان ستۋدەنتتەردىڭ دە ەڭبەگى باعالاۋسىز قالعان جوق.