توعىزقۇمالاق قازاقستان ەگەمەندىگىنە قول جەتكىزگەن جىلدان بەرى قارقىندى دامىپ كەلەدى. بۇل جەردە ەلىمىزدە قۇرىلعان توعىزقۇمالاق فەدەراتسياسىنىڭ ىقپالى زور بولىپ وتىر. بۇگىنگى تاڭدا وسى قاۋىمداستىقتىڭ ارقاسىندا ەلدىڭ تۇكپىر-تۇكپىرىندە ۇيىرمەلەر اشىلىپ, توعىزقۇمالاقتان جارىستار ءجيى وتكىزىلىپ ءجۇر.
جاقىندا قازاقستان رەسپۋبليكاسى قارۋلى كۇشتەرىنىڭ «استانا» وڭىرلىك قولباسشىلىعى اسكەرلەرىنە قاراستى 06708 اسكەري بولىمىندە توعىزقۇمالاقتان جارىس ۇيىمداستىرىلدى. سايىس ساربازدار مەن وقۋشىلار اراسىندا ءوربىدى. ساربازدار قاتارىن 06708 اسكەري ءبولىمنىڭ مەرزىمدى اسكەري قىزمەتتەگى اسكەري قىزمەتشىلەرى قۇراسا, وقۋشىلار لەگىن كوممۋنالدىق مەكەمەسىندە ءبىلىم الىپ جۇرگەن توعىزقۇمالاقتى ۇيرەنۋشى جاس جەتكىنشەكتەر تولىقتىردى. اسا تارتىستى وتكەن ۇلتتىق ونەر سايىسىندا العا سۋىرىلىپ شىققاندار قاتارى انىقتالدى.
اقتىق سىندا تاماشا ونەر كورسەتكەن قاراعاندى وبلىسى ءبىلىم باسقارماسىنىڭ پريوزەرسك قالاسى ءبىلىم ءبولىمىنىڭ «№1 جالپى ءبىلىم بەرەتىن مەكتەبى» كوممۋنالدىق مەملەكەتتىك مەكەمەسىنىڭ 9 «ب» سىنىپ وقۋشىسى الينا كارىموۆا جارىس جەڭىمپازى اتاندى. ال جۇلدەلى ءىى ورىندى 06708 اسكەري ءبولىمىنىڭ قاتارداعى جاۋىنگەرى ايدىن كەنجەباي يەلەنسە, ءىىى ورىن 06708 اسكەري ءبولىمىنىڭ قاتارداعى جاۋىنگەرى داۋرەن تازاباەۆقا بۇيىردى.
ايتا كەتەرلىك جايت, وسى توعىزقۇمالاق سايىسىنىڭ جەڭىمپازى الينا كارىموۆا بيىلعى ونلاين فورماتىندا وتەتىن VII رەسپۋبليكالىق «ايبىن-2021» اسكەري-پاتريوتتىق جيىنىنىڭ باعدارلاماسىنا ەنگىزىلگەن توعىزقۇمالاق سايىسىندا باعىن سىناماقشى.
ەندەشە, اسكەري ورتادا وتكەن جارىستا جەڭىستىڭ بيىك تۇعىرىنا كوتەرىلگەن اليناعا ساتتىلىك تىلەيمىز!
تىلەك كەنجەبەكوۆ