ءماجىلىس توراعاسى نۇرلان نىعماتۋليننىڭ جەتەكشىلىگىمەن وتكەن پالاتانىڭ كەشەگى جالپى وتىرىسىندا قىلمىستىق ءىس جۇرگىزۋ جانە قىلمىستىق-اتقارۋ كودەكستەرىنىڭ جوباسى قارالدى. سونداي-اق, دەپۋتاتتار سەناتتان كەلگەن وڭالتۋ جانە بانكروتتىققا قاتىستى زاڭ جوبالارىنا ەنگىزىلگەن وزگەرىستەرگە كەلىسىمدەرىن بەردى.
قىلمىستىق ءىس جۇرگىزۋ كودەكسىنىڭ جوباسى ىلەسپە تۇزەتۋلەرىمەن ءبىرىنشى وقىلىمدا ماقۇلداندى. قوسىمشا بايانداما جاساعان جۇمىس توبىنىڭ جەتەكشىسى رامازان سارپەكوۆتىڭ ءمالىمدەۋىنشە, زاڭ جوباسى بويىنشا جۇمىس توبىنىڭ جيىرما ءبىر وتىرىسى وتكىزىلگەن. نەگىزىنەن, كودەكس جوباسىندا قىلمىستىق قۋدالاۋدى باستاۋ ءراسىمىن وڭايلاتۋ قاراستىرىلعان. اتاپ ايتقاندا, تەرگەۋ جانە انىقتاۋ ورگاندارىنىڭ ازاماتتاردىڭ كونستيتۋتسيالىق قۇقىقتارىن قورعايتىن ءىس جۇرگىزۋ ارەكەتتەرىن دەربەس قابىلداۋ جونىندەگى وكىلەتتىكتەرىنىڭ اياسىن تارىلتۋ, ادۆوكاتتىڭ سوتقا دەيىنگى ءىس جۇرگىزۋدەن باستاپ قاتىسۋىن كەڭەيتۋ كوزدەلەدى.
بۇدان باسقا, «كىناسىن مويىنداۋ تۋرالى مامىلە» ينستيتۋتى ەنگىزىلگەن. بۇل رەتتە جاساعان ارەكەتى ءۇشىن جازانى تەرگەۋ ورگانىمەن بەلسەندى ىنتىماقتاستىققا الماستىرۋمەن جەڭىلدەتۋ تۋرالى كەلىسىمگە قول جەتكىزۋ نورماسى دا بار. سوت ءىسىن جۇرگىزۋ دە وڭايلاتىلاتىنى بەلگىلى بولىپ وتىر. ويتكەنى, ۇلكەن كولەمدى تەرگەۋ مەن سوت ارەكەتتەرىن جۇرگىزۋدىڭ قاجەتى بولماي قالادى.
زاڭدىق قۇجاتتا جەدەل-ىزدەستىرۋ ءىس-شارالارىن (جاسىرىن تەرگەۋ ارەكەتتەرى) جۇرگىزۋ ءتارتىبىن رەگلامەنتتەۋ ۇسىنىلادى. مۇنداي ارەكەتتەرگە پروكۋروردىڭ سانكتسيا بەرۋى ازاماتتاردىڭ جەكە ءومىرىنە قولسۇعىلماۋشىلىقتان قورعاۋعا مۇمكىندىك بەرەدى دەپ كۇتىلۋدە. جانە دە سوتتىڭ سوتقا دەيىنگى ءىس جۇرگىزۋدى باقىلاۋىن كەڭەيتۋ ماقساتىندا قىلمىستىق پروتسەسكە تەرگەۋ سۋدياسى ينستيتۋتى ەنگىزىلەدى. ونىڭ وكىلەتتىگىنە جەكەلەگەن تەرگەۋ ارەكەتتەرىنە سانكتسيا بەرۋدەن باسقا, سوتقا دەيىنگى ءىس جۇرگىزۋ ساتىسىندا تاراپتاردىڭ شاعىمدارى مەن ءوتىنىشحاتتارىن قاراۋدى دا ەنگىزۋ قاراستىرىلىپتى. اسىرەسە, قىلمىستىق جولمەن جينالعان تابىستاردى, ونىڭ ىشىندە سوت تورەلىگىنەن جاسىرىنىپ جۇرگەن ادامداردىڭ وسىنداي تابىستارىن سوت شەشىمى نەگىزىندە مەملەكەت پايداسىنا الۋعا مۇمكىندىك بەرەتىن نورمالار دا بار.
جانە دە پالاتا «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر ەنگىزۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ جوباسىن ء(بىرىنشى وقىلىم) ماقۇلدادى. زاڭ جوباسى بويىنشا «قازاقستان رەسپۋبليكاسىنداعى سايلاۋ تۋرالى», «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ ءمارتەبەسى تۋرالى», «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» جانە «قازاقستان رەسپۋبليكاسىنىڭ سوت جۇيەسى مەن سۋديالارى مارتەبەسى تۋرالى كونستيتۋتسيالىق زاڭ جوبالارىنا تۇزەتۋلەر ەنگىزىلۋ ۇسىنىلعان.
جالپى وتىرىستا, سونىمەن قاتار, قىلمىستىق-اتقارۋ كودەكسى جوباسى دا ءبىرىنشى وقىلىمدا قولداۋ تاپتى. زاڭ جوباسىنىڭ ماڭىزدىلىعىنا ءماجىلىس توراعاسى ەرەكشە نازار اۋدارتتى. سپيكەر قىلمىستىق-اتقارۋ كودەكسىنىڭ ەڭ الدىمەن, قىلمىستىق زاڭنامانى جەتىلدىرۋگە جانە قىلمىستىق جازانى وتەۋدىڭ تيىمدىلىگىن ارتتىرۋعا باعىتتالىپ وتىرعانىن ەرەكشە اتادى. قىلمىستىق-اتقارۋ كودەكسىنىڭ جاڭا رەداكتسياسىندا ۇسىنىلىپ وتىرعان تەتىكتەر قىلمىستىق جازالاۋدا ادىلەتتىلىكتىڭ ۇستەمدىك قۇرۋىن قامتاماسىز ەتۋگە ءتيىس. الايدا, سوتتالعانداردىڭ دا قۇقى اياقاستى ەتىلمەۋى كەرەك. بۇل – الەمدىك تاجىريبە. سوندىقتان, زاڭ جوباسىنا ەكىنشى وقىلىمدا ءدال وسىنداي وڭتايلى, ۇيلەسىمدى تاجىريبە تۇرعىسىنان قاراۋىمىز قاجەت, دەدى نۇرلان زايروللا ۇلى.
جالپى, كودەكس جوباسى بويىنشا جازانى ورىنداۋ تەتىگى پروگرەسسيۆتىك جۇيە بويىنشا بوستاندىعىنان ايىرۋ مەن پروباتسيالىق باقىلاۋ تەتىگى ءۇشىن قۇقىقتىق نەگىز قالاۋدى, سوتتالعاندارعا قاجەتتى الەۋمەتتىك, قۇقىقتىق جانە پسيحولوگيالىق كومەك كورسەتۋدى قاراستىرادى. وسى رەتتە كەشە پالاتا ەركىن ساۋدا ايماعى تۋرالى شارتتى ونىڭ تاراپتارى مەن وزبەكستان رەسپۋبليكاسى اراسىندا قولدانۋ تۋرالى حاتتامانى راتيفيكاتسيالاۋ تۋرالى زاڭ جوباسىن جۇمىسقا العاندىعىن دا ايتا كەتكەن ءجون.
اسقار تۇراپباي ۇلى,
«ەگەمەن قازاقستان».