وتكەن جىلدىڭ اياعىندا كازتالوۆ اۋداندىق مادەنيەت ءۇيى مەن وسى اۋدانعا قاراستى جالپاقتال اۋىلىنداعى مادەنيەت ءۇيىنىڭ ەسىكتەرى كۇردەلى ءجوندەۋلەر جۇرگىزىلگەننەن كەيىن قايتا اشىلعان ەدى. مۇنىڭ العاشقىسىنا رەسپۋبليكالىق بيۋدجەتتەن 75 ملن. 948 مىڭ تەڭگە, ەكىنشىسىنە 77 ملن. تەڭگە بولىنگەن. ارينە ۇقىپتى, ءتيىمدى تۇردە پايدالانا بىلسە از قاراجات ەمەس. مادەنيەت ۇيلەرىنىڭ قايتا اشىلۋىنا بايلانىستى ءوتكىزىلگەن سالتاناتتى شارالار, وعان وبلىس اكىمىنىڭ ورىنباسارى باقتيار ماكەننىڭ قاتىسقانى جەرگىلىكتى باق-تا كەڭىنەن كورسەتىلدى.
«جاقسىنى كورمەك ءۇشىن» دەگەندەي, كازتالوۆ اۋدانى ورتالىعىنداعى كۇردەلى جوندەۋدەن وتكىزىلگەن مادەنيەت ءۇيىن تاماشالاۋدىڭ ءساتى بيىلعى جىلدىڭ 3 اقپانى كۇنى ءتۇستى. ءدال وسى كۇنى اتالعان مادەنيەت ۇيىندە كازتالوۆ اۋدانىنىڭ اكىمى نۇرلان بەكقايىر تۇرعىندار الدىندا ەسەپ بەردى. زالعا قىزعىلت ءتۇستى جاڭا ورىندىقتار قويىلىپتى. ورتاڭعى قاتارلاردىڭ بىرىندە وتىرعانبىز. ءبىر كەزدە الدىمىزداعى ارداگەرلەر ورنالاسقان ورىندىقتار ءبىرىنەن سوڭ ءبىرى سىنىپ, بەلدىك اعاشتارى قيراپ تۇسە باستادى. ولار جانباستارىن سىندىرىپ الماعانىمەن زالداعى لىق تولى حالىقتىڭ الدىندا اجەپتاۋىر قولايسىزدىققا ۇشىرادى.
وسىنىڭ الدىندا اۋىل تۇرعىندارى تاراپىنان ايتىلعان كۇردەلى جوندەۋدىڭ مۇلدەم ساپاسىز جۇرگىزىلگەنى, ونىڭ كوزگە ايقىن كورىنىپ تۇرعانى ءمادەنيەت ۇيىنە قويىلعان كەيبىر بۇيىمداردىڭ پايدالانىلماي جاتىپ سىنعانى مەن ب ۇلىنگەنى جونىندەگى اتتەگەن-اي دەگىزەتىندەي اڭگىمەلەردى ەستىگەن بولاتىنبىز. الايدا, بۇعان ونشا ءمان بەرمەگەن ەدىك. ەندى تۇپ-تۋرا كوز الدىمىزداعى جوعارىداعىداي كورىنىستەردەن كەيىن وعان سەنۋگە, يلانۋعا تۋرا كەلدى.
بۇعان نە دەۋگە بولادى؟ پايدالانىلماي جاتىپ قيراي باستاعان ساپاسىز ورىندىقتاردىڭ وتەۋىن كىم تولەمەك؟ وسىندايدا جەلگە ۇشقان ەسىل مەملەكەت قاراجاتى-اي, دەپ قىنجىلماسقا امالىڭ قالمايدى.
ءيا, ءومىر ءبىر ورىندا تۇرمايدى. الداعى كەزدە دە تالاي كۇردەلى جوندەۋلەر وتكىزىلەر. تەندەرلەر وينالار. سول كەزدە مەملەكەت قاراجاتىنىڭ تەككە ءراسۋا بولماعانىنا, ءىستىڭ ساپالى ءجۇرزىلگەنىنە نە جەتسىن؟
تەمىر قۇسايىن,
«ەگەمەن قازاقستان».
باتىس قازاقستان وبلىسى,
كازتالوۆ اۋدانى.