توكار ماماندىعىن يگەرىپ, داڭققا بولەنگەندەر اراسىندا قازاق جۇمىسشىلارى نەكەن-ساياق. كۇنى بويى زاۋىتتا دارىلداعان ستانوكتىڭ باسىندا تۇرىپ, زىرىلداپ جاتقان بەلتەمىردى جونۋ وڭاي جۇمىس ەمەس. جوڭقانىڭ ءبىرى – ءسال قالىڭ, ءبىرى – ءسال جۇقا بولىپ كەتسە ءونىم ساپاسىز شىقتى دەي بەر. وسىنداي ماشاقاتى كوپ ماماندىقتى يگەرۋگە ەرىك-جىگەر كەرەك. الايدا بۇل ماماندىقتى قازاق جاستارى دا يگەرىپ العان. سولاردىڭ ءبىرى – قىزىلجارلىق ساتان ماقانوۆ. ول بۇل ىستە ۇلكەن تابىسقا دا جەتىپ ءجۇر.
ول 16 جىل بۇرىن پەتروپاۆلداعى كيروۆ اتىنداعى زاۋىتقا ءۇشىنشى رازريادتى توكار بولىپ قابىلداندى. جاس جىگىت ول كەزدە ءوزىنىڭ ءومىر جولى وسى كاسىپورىنمەن جالعاسادى دەگەنگە سەنبەگەن. زاۋىتتىڭ شۋى وعان كوپ ۋاقىت جات بولىپ ءجۇردى. الايدا كۇننەن-كۇنگە ءوز كاسىبىنە دەگەن سۇيىسپەنشىلىك وياندى. كەيدە كۇندىز جونىپ, ءتيىستى كولەمىن كەلتىرە الماعان تەمىر بىلىكتى تۇسىندە جونىپ, شتانگەن-تسيركۋلمەن ەسەپتەگەندە ءدال شىعارىپ جاتادى. سوسىن ەرتەسىنە قۇلشىنا كىرىسىپ, كەشەگى كەلتىرە الماعان بولشەكتى تۋرا جونىپ شىعادى. مۇندايدىڭ دا ءوز قىزىعى بار ەكەن.
ۇجىمدا ەڭبەكقور جاس ءوزىنىڭ ۇلكەن بەدەلگە يە بولا باستاعانىن دا سەزىنە باستايدى. جۇمىستان شىققان بويدا سپورتزالعا جۇگىرىپ, بوكسپەن اينالىسقان ونى ساليقالى ارىپتەستەرى كەيبىرەۋلەر قۇساپ ارزان كافەلەرگە نەمەسە قۋىس-قۋىستى پانالاپ, «شارشاعاندى باسامىز» دەگەندى سىلتاۋراتىپ اششى سۋعا اۋەستەنگەندەر قاتارىندا بولماعانى ءۇشىن دە قاتتى سىيلايتىن. ەرىنبەگەن ەڭبەكتىڭ العاشقى ناتيجەلەرى دە سپورت جاعىنان كورىنە باستايدى. قالالىق جانە وبلىستىق جارىستاردا بىرنەشە دۇركىن جەڭىمپاز بولدى. ال 2017 جىلى جۇمىسشىلار اراسىندا وتكەن حالىقارالىق «رينگ كورولى» جارىسىندا ءبىرىنشى ورىن الىپ, كاسىپورىننىڭ داڭقىن كوتەرەدى. ودان ءارى ءوزىنىڭ نەگىزگى كاسىبى بويىنشا دا بيىك تابىستارعا قول جەتكىزە باستادى. «قازاقستان ينجينيرينگ» كومپانياسىنىڭ 10 جىلدىعىنا وراي وتكىزىلگەن كونكۋرستا «ۇزدىك توكار» اتالىمىن جەڭىپ الدى.
كاسىبي شەبەرلىگىن دە شىڭداپ, وسى جىلداردا التىنشى رازريادقا دەيىن كوتەرىلدى. قازىر ساتان ماقانوۆ ەڭ كۇردەلى دەگەن توكارلىق وپەراتسيالاردى ەركىن مەڭگەرگەن, زاۋىتتاعى بەدەلدى شەبەرلەردىڭ ءبىرى. ەسەلى ەڭبەگى دە اتاۋسىز قالماي, كاسىپورىن اكىمشىلىگىنىڭ, كاسىپوداقتىڭ ءتۇرلى العىستارى مەن سىيلىقتارىن العان. وبلىس اكىمى قۇمار اقساقالوۆتىڭ دا قۇرمەت گراموتاسىمەن ناگرادتالدى. بىلتىر رەسپۋبليكالىق كاسىپوداقتار فەدەراتسياسىنىڭ «ەڭبەك داڭقى» وردەنىمەن ماراپاتتالدى. ماراپاتتى تاپسىرعان وبلىستىق كاسىپوداقتارى ورتالىعىنىڭ توراعاسى ەرىك نۇراقاەۆ جاس جىگىتتىڭ الداعى الار اسۋى بيىك بولاتىنىنا سەنىم ءبىلدىردى. «ساتان سياقتى ەڭبەكقور, ايقىن ماقساتى بار جاستاردىڭ بولاشاعى زور بولاتىنىنا سەنىمدىمىن. ەشقانداي كولدەنەڭ تابىس پەن جەڭىل اقشاعا الاڭداماي, ءوز ىسىنە بەرىك بولعان جاندار عانا بيىك تابىسقا جەتە الادى», دەدى ول.
ساتان ماقانوۆتىڭ ءوزى ومىردە ۇياڭ, بىراق ىشكى قۋاتى بەرىك ەكەنى سەزىلىپ تۇرادى. جۇبايى ەكەۋى ءۇش بالا تاربيەلەپ وتىر. ء«بىزدىڭ ەڭبەك ۇجىمىمىز جاقسى. ءتۇرلى جاقسى ىستەرگە باستايتىن جىگىتتەر ارامىزدا كوپ. سولاردىڭ ءبىرىنىڭ اقىلىمەن قىستىگۇنى وزەنگە تۇسۋمەن دە اينالىسىپ ءجۇرمىن. بۇل ادامنىڭ بويىن تىتىركەندىرىپ, ۇزاق ۋاقىتقا سەرگىتەتىن ايرىقشا جاتتىعۋ. قازىر ونى دا مەڭگەرىپ الدىم. ءبىر كەزدە يوگامەن دە اينالىسقانمىن», دەيدى جالىندى جىگىت.
وسىعان قاراپ «جىگىتكە جەتى ونەر دە از» دەگەن ماقالدى ەسكە الاسىز. ادام تولىق ازامات بولۋى ءۇشىن دە ءبىر ونەردەن ەكىنشىسىنە ۇمتىلا بەرۋى كەرەك قوي. ءبىز ونىڭ بيىك ارماندارى مەن ماقساتتارىنىڭ ورىندالا بەرۋىن تىلەدىك.
پەتروپاۆل