مەكسيكادا گۋاناحۋاتو شتاتىنىڭ ورتالىق بولىگىندەگى سالامانكا مۋنيتسيپاليتەتىندە بەلگىسىز بىرەۋلەر مەيرامحانا ماڭىندا جارىلىس جاساپ, ەكى ادام قازا تاپتى, تورتەۋى جارالاندى, دەپ جازادى Egemen.kz.
جارىلىس مەيرامحانا لىق تولى بولعان كەزدە جاسالعان. زارداپ شەككەندەر اۋرۋحاناعا جاتقىزىلدى. ايماق گۋبەرناتورى ديەگو ۆالەحو جارىلىستى تەرروريزمگە تەڭەدى.
«بۇل شتاتتا بۇرىن-سوڭدى بولماعان لاڭكەستىك شابۋىل. ول ايماقتىڭ بۇرىن باستان كەشكەندەرىمەن سالىستىرعاندا, زورلىق-زومبىلىق دەڭگەيىن ارتتىرعانى ءسوزسىز», دەدى ول.
پروكۋراتۋرانىڭ مالىمەتىنشە, بەلگىسىز ادامدار قولدان جاسالعان جارىلعىش زات سالىنعان بۋمانى مەيرامحانا مەنەدجەرىنە تاپسىرعان. پاكەت اشىلعان كەزدە جارىلىس بولىپ, ەكى ادام قازا تاۋىپ, ءتورت ادام اۋىر جاراقات العان. قاداعالاۋ اگەنتتىگىنىڭ شەنەۋنىكتەرى بولعان وقيعانىڭ ءارتۇرلى نۇسقاسىن قاراستىرىپ جاتىر. نەگىزگىلەرىنىڭ بىرىنە سايكەس, قاستاندىققا وسى ايماقتا ارەكەت ەتەتىن ۇيىمداسقان قىلمىستىق توپتىڭ ءبىرى جاۋاپتى بولۋى مۇمكىن.
گۋاناحۋاتو سوڭعى جىلدارى مەكسيكاداعى ەڭ قاۋىپتى شتاتتاردىڭ بىرىنە اينالدى. قاڭتار مەن شىلدە ارالىعىندا مۇندا 2,1 مىڭعا جۋىق قاساقانا كىسى ءولتىرۋ تىركەلدى. ساۋىردە مەكسيكانىڭ «قوعامدىق قاۋىپسىزدىك پەن قىلمىستىق ادىلەت جونىندەگى ازاماتتىق كەڭەس» ۇكىمەتتىك ەمەس ۇيىمىنىڭ ساراپشىلارى رەسپۋبليكانىڭ 18 قالاسىن الەمدەگى ەڭ قاۋىپتى 50 قالانىڭ تىزىمىنە ەنگىزدى. ءبىرىنشى ورىندى گۋاناحۋاتوداعى سەلايا قالاسى الدى.