س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ اۋماعىندا پروفەسسورلار اللەياسىنا قاراعاي وتىرعىزۋ ءراسىمى وتەدى. بۇل تۋرالى اۋىل شارۋاشىلىعى مينيسترلىگىنىڭ ءباسپاسوز قىزمەتى حابارالادى, دەپ جازادى Egemen.kz.
مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا قورشاعان ورتانى قورعاۋ مەن ەكولوگيالىق دامۋ ماسەلەسى ەلىمىزدىڭ دامۋ باعدارلاماسىنىڭ كۇن تارتىبىندە ءبىرىنشى ورىندا بولاتىنىن ايتتى.
«بۇل ماسەلەمەن بۇكىل وركەنيەتتى الەم اينالىسۋدا. سول سەبەپتى ءبىز ودان تىس قالماۋىمىز كەرەك. وسىعان سايكەس, الداعى بەس جىلدا ورمان قورىندا 2 ميللياردتان استام, ال ەلدى مەكەندەردە 15 ميلليوننان استام اعاش وتىرعىزىلادى دەپ جوسپارلانۋدا. بۇل اكتسيا ەلىمىزدى كەڭ اۋقىمدا كوگالداندىرۋعا مۇمكىندىك بەرەدى», دەگەن ەدى پرەزيدەنت.
بۇگىن س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ اۋماعىندا پروفەسسورلار اللەياسى اشىلادى. سول جەرگە ۋنيۆەرسيتەتتىڭ جەتەكشى وقىتۋشىلارى مەن ارداگەرلەرى قاراعاي وتىرعىزادى. 55 پروفەسسوردىڭ قاتارىندا قر پارلامەنتى سەناتىنىڭ دەپۋتاتى اقىلبەك كۇرىشباەۆ, قازاتۋ باسقارما توراعاسى قايرات ايتۋعانوۆ, باسقارما توراعاسىنىڭ ورىنباسارى-رەكتور, نۇر-سۇلتان قالاسى ءماسليحاتىنىڭ دەپۋتاتى ايتجان ءابدىروۆ جانە تاعى باسقا دا بەلگىلى عالىمدار بار.