جەر بەتىندەگى ەڭ قارت ەگىزدەر بەلگىلى بولدى

بۇل تۋرالى BBC مالىمدەدى.

ۋمەنو سۋمياما مەن كۋمە كوداما 1913 جىلى كاگاۆا پەرفەكتۋراسىنداعى سەدو ارالىندا دۇنيەگە كەلگەن. ۋمەنونىڭ ءتورت بالاسى, ال كۋمەنىڭ ءۇش بالاسى بار. جاقىندارىنىڭ ايتۋىنشا, ەكەۋى دە ۇزاق ءومىر ءسۇرىپ جاتقانىن ماقتانىشپەن ايتىپ وتىرادى.

قازىر ۋمەنو مەن كۋمە جاپونيانىڭ ەكى شەتىندە ورنالاسقان قارتتار ۇيىندە ءومىر سۇرەدى. ال گينەستىڭ رەكوردتار كىتابىنا ەنگەنى جونىندەگى سەرتيفيكات كوروناۆيرۋس پاندەمياسى زيان كەلتىرۋى مۇمكىن دەگەن قاۋىپپەن پوشتا ارقىلى جىبەرىلدى.

جاڭا رەكورد جاپون ەلىندە جىل سايىن اتاپ وتىلەتىن ۇلتتىق مەرەكە – ۇلكەندەردى قۇرمەتتەۋ كۇنىنە ورايلاستىرىلدى.

ۋمەنو سۋمياما مەن كومە كوداما وزدەرىنىڭ وتانداستارى – اپكەلى-ءسىڭلىلى كين مەن جين 2000 جىلى ورناتقان رەكوردتى (ولار 107 جىل 175 كۇن بىرگە ءومىر ءسۇردى) جاڭارتتى. كين 2000 جىلدىڭ قاڭتارىندا قايتىس بولسا, جين ءبىر جىلدان كەيىن 108 جاسىندا ومىردەن ءوتتى.

جاپون حالقى الەمدە ءومىر ءسۇرۋ ۇزاقتىعى ەڭ جوعارعى ەل.

گيننەستىڭ رەكوردتار كىتابىنا سايكەس, قازىر كوزى ءتىرى ەڭ قارت ايەل 118 جاستا. بۇل اتاق فۋكوكا ارالىنىڭ تۇرعىنى كانە تاناكاعا تيەسىلى. ال ەڭ قارت ەر ادام – 1908 جىلى دۇنيەگە كەلگەن پۋەرتوريكالىق ەميليو فلورەس ماركەس, ول 112 جاستا.

جەر بەتىندە بۇگىنگە دەيىن ءومىر سۇرگەندەر اراسىندا ەڭ قارت ادام اتاعى فرانتسۋز ايەل جاننا كالمانعا تيەسىلى (122 جىل جانە 164 كۇن). ەرلەر اراسىندا بۇل رەكوردتى 116 جىل 54 كۇن ءومىر سۇرگەن جاپون تيتەتسۋ ۆاتانابە جاساعان.