تۇرىك كومپانياسى اقتاۋ قالاسىنا جەراستى قوقىس كونتەينەرىن سىيعا تارتتى, دەپ حابارلايدى, Egemen.kz.
العاش رەت ورناتىلعان جەراستى كونتەينەرىنىڭ بىرنەشە ارتىقشىلىقتارى بار. ماسەلەن, قالانىڭ ەستەتيكالىق كەلبەتى جاقسارىپ, جاعالاۋ ايماعىنداعى ءتۋريزمنىڭ دامۋىنا وڭ اسەرىن تيگىزەدى. قالا تۇرعىندارى مەن قوناقتارىنىڭ دەمالۋىنا دا قولايلى بولماق. ويتكەنى, كونتەينەرلەردەن قولايسىز ءيىس شىقپايدى جانە ارنايى تەحنيكامەن شىعارۋ كەزدە قوقىس جان-جاققا توگىلمەيدى.
«اقتاۋ قالاسىنا كەلگەنىمە 2 جىلدان استى. اسەم قالادا ەسكى كونتەينەردىڭ تۇرعانىن كورىپ, كومپانيانىڭ اتىنان وسىنداي جەراستى قوقىس جاشىكتەرىن سىيعا تارتۋدى شەشتىم. كورشى ەلدەر اراسىنداعى ىنتىماقتاستىق نىعايا بەرسىن», دەدى كومپانيا ديرەكتورى ءالي دەليبۋداك.
سونىمەن قاتار, زاماناۋي كونتەينەردىڭ كولەمى قازىرگى قولدانىستاعى قوقىس جاشىكتەرىنەن ۇلكەن. بۇل ءوز كەزەگىندە رەيستەر سانىن ازايتىپ, قوقىس شىعاراتىن مەكەمەلەر ءۇشىن ءتيىمدى بولماق.
قالا اكىمىنىڭ ورىنباسارى س.گۋسماننىڭ ايتۋىنشا جاڭا ۇلگىدەگى قوقىس كونتەينەرىن ورناتۋ جونىندە قالالىق ءماسليحاتتىڭ كەزەكتى سەسسياسىنا ۇسىنىس بەرىلمەك.