ماڭعىستاۋدا اۋىز سۋ ماسەلەسى جىلدار بويى وزەكتى كۇيىندە قالىپ كەلەدى, ءتىپتى تۇرعىندار سانى ارتقان سايىن ماسەلە قوردالانا ءتۇستى دەۋگە بولادى. ماسەلەنى شۇعىل شەشۋ قاجەتتىگى كۇن تارتىبىنە شىققالى از بولعان جوق.
وبلىس اكىمى نۇرلان نوعاەۆ اپپاراتتىق جيىن بارىسىندا حالىقتى اۋىز سۋمەن ۇزدىكسىز قامتاماسىز ەتۋگە باعىتتالعان جوبالاردى ىسكە اسىرۋدى جەدەلدەتۋدى تاپسىردى.
ول مەملەكەت باسشىسىنىڭ جولداۋىندا ايتىلعان وزەكتى ماسەلەلەردىڭ ءبىرى ەلدى مەكەندەردى اۋىز سۋمەن قامتاماسىز ەتۋ ەكەنىن اتاپ ءوتتى.
– وبلىستا ايماقتى سۋمەن قامتۋعا باعىتتالعان باعدارلاما بار, الايدا ءبىز ونىڭ ناتيجەسىن كۇتىپ وتىرا بەرمەي, وزەكتى ماسەلەلەردى شەشۋدىڭ قوسىمشا جولدارىن ىزدەۋىمىز كەرەك. بىزگە اقتاۋ قالاسىنىڭ اۋماعىنان سۋ تۇشىتاتىن زاۋىت قۇرىلىسىنا ءوز قاراجاتىن سالۋعا دايىن ينۆەستورلار حابارلاستى. ءبىز مۇنداي باستامالاردى تولىق قولدايمىز, – دەدى وبلىس اكىمى.
جاڭا زاۋىتتىڭ جوسپارلانعان قۋاتى 20 مىڭ تەكشە مەتردەن استام. وبلىس اكىمى كەلەر جىلدىڭ جازىندا العاشقى كەزەڭى اياقتالاتىن زاۋىت قۇرىلىسىن اقتاۋ قالاسىنىڭ اكىمى ن.قيلىبايعا جەكە باقىلاۋىنا الۋدى تاپسىردى. ءبىرىنشى كەزەڭىندە تاۋلىگىنە 5 مىڭ تەكشە مەتر سۋ تۇشىتىلماق.