نۇر-سۇلتان-شىمكەنت اۋە رەيسىندە جولاۋشى كوز جۇمدى

Qazaq Air-دىڭ حابارلاۋىنشا, قايعىلى وقيعا 14 قىركۇيەكتە ورىن العان.

ۇشۋ كەزىندە ۇشاق ەكيپاجىنا سالونداعى جولاۋشىنىڭ ءبىرى ناۋقاستىڭ ءوزىن جايسىز سەزىنىپ, شۇعىل كومەككە مۇقتاج ەكەندىگى تۋرالى اقپارات ءتۇستى. بورتسەرىك جولاۋشىعا جاقىنداپ كەلگەندە ونىڭ ەسىنەن تانعانىن كورگەن, ال تامىرىن ۇستاعاندا ەشقانداي تىرشىلىك بەلگىسى بىلىنبەگەن, تىنىستاپ تا جاتپاعان. باس ۇشقىشقا ەسەپ بەرىلىپ, ول جولاۋشىلاردان كومەك سۇرادى. جولاۋشىلار اراسىندا دارىگەر بار بولىپ شىقتى.

«بورتتاعى مەديتسينالىق كومەك جونىندەگى نۇسقاۋلىققا سايكەس, اعا بورتسەرىكپەن بىرگە دارىگەر جۇرەك-وكپە رەانيماتسياسىن جاسادى», دەيدى اۋە كومپانيانىڭ ءباسپاسوز قىزمەتى

اۋە كومپانيانىڭ حابارلاۋىنشا, ۇشاق كومانديرى جاقىن ماڭداعى اۋەجايعا شۇعىل قونۋ تۋرالى شەشىم قابىلدادى.

«اۋە قوزعالىسىنىڭ باعىتى وزگەرگەنى تۋرالى ديسپەتچەرلەرگە ەكيپاج ەسكەرتىپ, ۇشاقتا بولعان جايدى ەگجەي-تەگجەيلى باياندادى, جەدەل جاردەم كولىگى شاقىرىلدى. جەزقازعان اۋەجايىنا قونعاننان كەيىن ۇشاققا جەتكەن دارىگەرلەر ءولىم فاكتىسىن تىركەدى. Qazaq Air جولاۋشىنىڭ وتباسى مەن جاقىندارىنىڭ قايعىلارىنا ورتاقتاسىپ, كوڭىل ايتادى», دەلىنگەن Qazaq Air ءباسپاسوز قىزمەتىنىڭ حابارلاماسىندا.